Yohanes whot Yhirit Babel
17:1-18
17
Ofo mres wahin yikan malaikat mtalak ekei hra yotik kempir mtalak ekei, waka wto man tet wto: “Naka la fein, bo tet tkakniet man nen, kafir mafle hra bo mhok man kota mafle om, kota hra mleli mak wi hra madien kla warok ana. Kota okom mde le na dli dlok. a 2 Raja warok yik fobi ke ei yemir sgia wale yidien om. Na kadio kat hra yese yik fobi ke ei ymsit fe twok anggur hra na dli dlok om mhnak man ei." b3 Nago Ou Wawua om mkororo matik tet tain tse wi samdi. Tet thot na dli mrem mleli mak erwas wahen bakbis mre wkedim. Mak erwas wfalek, na ysroin kedi yrok hra ytbekein ymset ybasadit Na Ron. Wsafakos mtalak wadien wsa sagiatan yahar. c 4 Na dli mdo okom mtrik not ybot, not yhibia yidien not yihen ybakbis, madien mhriet fot madien manik-manik yehin emas, yehin amak yibot ydlen kamyi kat, yidien mutiarad. Mak mna om mslon dor emas mre mhon fe kla anggur msgia. Kla met om mhnak flet mabe, ni hra ysgia yde le, om mamir sgia, yidien msaesik man ni wat-wat ei, ofo kla okom mdahan kat. e 5 Mak om msadit msroin kedi mrem, kedi hra mahlok, hra mkhan:
“Babel mafle kom,
na dli mdo yeme le mkom
hra mhnak sgia fe fobi kom.
Mhnak kakniet man na kadio se ei ysiswain om,
ysiok ni sgia karmiak kat.”
6 Tet thot na dli okom mmsit mkashok kat fe mska wale na marok hra yikohok ylais kat, mde le mmsit kat fe hen mahin na hra yrana sawuan Yesus wgedi.
Hra oko tto thot fo, tawua main kat. 7 Ofo malaikat oko wto man tet wto: “Hra nen nawua main fe me? Bo tet trana man nen khan na dli okom madien khan erwas hra wkafem okou, erwas hra wsafakos mtalak wadien wsa sagiatan yahar.
8 Mde hra erwas wayaka hra nen nhot wale okou, kamuolo wron, hra ke ko wron oli dait, bo kyamre fo wron oli. Whok wahin kmain solot kafir. Na hra yese yik fobi katak, bo yteit yrioro fe hra yhot erwas ou wron oli. f Hra yteit yrioro le ma, na tkoin hra ykedi Nago wsroin dait yik Buku Ron om. Mahin, kafir fle bo matsi kawuak kat wata erwas ou. (Buku Ron om, na ykedi Nago wsroin wale yehin Ou wafik fobi katak om.)
9 Nto naisi nnok ni hra ke fo, nnok saswain kayi de nsiafolo. Mde hra safakos mtalak hra erwas wfe ekei, o le ma sfa mtalak, na dli okom mleli kakrok mak ysa. 10 Yibe fot raja mtalak: mahot man ei yti wale, ykanas oli dait. Mres wkanas le wkom. Mres waka latiot. Mde hra bo ou waka, bo ou wase senfe dait. 11 Erwas wayaka kamuolo wron, hra ke ko wron oli dait, ou ekei basak waka wabe raja mtadolik feu. Basak wslonti na tkoin wde le man hra raja mtalak ei. Ofo basak kafir fle bo matsi kawuak kat ou.
12 Mde hra erwas wayaka wsagatan yahar hra nen nhot wale ei, sagatan ekei yibe raja yahar. Bo yibe raja yahar mahin, ysiokti latiot tita*** mrem. Basak ykedi fle yslonti yibe raja, mahin tali mkedi mres deri, yslonti fle yidien sisi erwas wayaka ou. Yslonti yfe fle okom yese senfe dait. g 13 Raja yahar ekei ysadir sisi, ysamenie fe, yibri mres, yibe yhnak ei yfe kanas yidien fle man erwas wayaka okou. 14 Yto bo ykhan kayi yidien Wet Domba ou. Mahin, Wet Domba bo warin fit kayi ei. Fe hra Ou ekei wabe kayi Na Kohok wan na kohok kadio kat, wabe Raja wan raja kadio kat. Waka wadien na hra yhron kein, yten kawuak ykaso man ou. Wwit wale ei, wlouk helwain wale ei, ysanini yidien kawuak Ou.”
15 Malaikat wrana sba oli man tet wto: “Mde hra kla kei, kla hra na dli dlok om mleli ei, o le ma na tkoin yehin na sa kadio kat, fobi kadio kat, ysalo heit-hat kadio kat. Na dli dlok afe kota Babel om mleli fali. 16 Sagatan yahar hra nen nhot wale ekei, le ma raja ei, yidien sisi erwas wayaka ou bo basak ybafelek yhat ymset ybasadit na dli dlok om. Ofo ykafdaok falim kawuak de mkablok, mde yeit mkan fokot yidien ytatik kat mse sala. 17 Ysiok mde le ke fe hra Na Ron wkororo wale ysablit, se ysiok deri ni hra Ou wsin fe. Wkororo ysablit ysamenie sisi yibri mres yhnak yfe fle kohok yin erwas wayaka ou, se bo erwas wslonti ni. Ysiok kayi de, giet Nago wfe okom msasisi***. 18 Mde hra na dli hra nen nhot wale okom, o le ma kota mafle kat om, hra msiokti raja kadio kat yik fobi kei.”