Kafir Mtalak
16:1-21
16
Mde tet toso salo kaf kat mahin Na Ron wfe Bol Kohok mabri ra. Salo om mrana man malaikat mtalak ekei mto: “Nein, nolio kat la ni mtalak hra ysilok yde kempir emas, hra yhon fe Na Ron wtrere ei yse fobi katak."2 Mde malaikat wasayen ou watik kempir ou wam maka, mhon fe Na Ron wtrere, wolio kat mse fobi. Ofo na tkoin hra yik fobi kei ykaini, ykain kafes hra ysamsa, ykoko. Na marok ei yidien wale erwas wayaka ou, wbarnia wale wfe ni sroin om, ysaesik wale man ni hra msilok mde erwas ou. Ofo ykaini, yhlet ni ysamsa. a
3 Mde malaikat walak fe watik kempir ou wam maka, wolio kat mse siwan wasa. Ofo kla when, hen msilok mde le wasit. Ofo erwas man hra yese yik siwan, ni kadio kat hra yhalie yron yik siwan, ykak kadio kat, mre yron dait.
4 Mde malaikat watolik ou watik kempir ou wam maka, wolio kat mse kla warok, kla yfle, kla yiwet, kayi de kla sitayi. Ofo kla yke ylelek, yhen kadio kat. b
5 Sba oko fo tet toso malaikat hra wslonti kla : kla yifle, kla yiwet, kawuak de kla sitai, oko wrana man Na Ron wto:
“Elek Nen nke, Na Ron nen nhirit mtatol, nkerek sadir om mtatol, mbot.
Nen nke nadien kamuolo nak wale lokdi ko, kawuak de hra ke ko, Nen deri nkohok nlais kat.
6 Fe hra na hra yidien erwas wayaka ekei le ma yala hen wale Nen nfe na ylais kat, yska wale Nen nfe nabi ei, nhnak satian mtatol yin na tkoin ei.
Mde nen nhnak wale hen man ei yokom;
ni okom matoron kat man ei!”
7 Ofo tet toso salo mhok mahin sala batalok makohok okom msamenie fe mto:
“Ya Sma Na Ron Nen hra Nakohok Nlais Kat,
Nen nkerek sadir om mtatol, Nen narin fit ni ke ytatol kadio kat."
8 Mde malaikat wahat fe watik kempir ou wam maka, wolio kat mse tali. Ofo, Nago whnak fle fe tali om, mabe msa na tkoin yik fobi kayi de bhait ma ykak fe mtbat. 9 Tali om mtbat msmeren kamyi kat, mska mhanak man nai yde yobo fe hra tali mska ei, mde yfruo kat Na Ron wkedim, mabe kafir okom. Ynok Nago le whnak kafir kadio ekei hra yhot wale, mahin yket oli dait yse Ou wak, yhdin dait man Ou, ha ybren kat yaha kat Ou.
10 Mde malaikat wamahot fe watik kempir ou wam maka, wolio kat mse erwas wayaka ou wfe ni maleli kohok om. Wto wolio kat ofo, na kadio hra ysamenie fe wale man erwas wayaka oko, yfe wi ei ymian kadio kat. Mde yatanti yadel fe hra kafir kadio kat hra Nago whnak wale man ei. c 11 Mde ei yfruo kat Na Ron hra wak wi mayehet ago, mabe ei ykaini adit ni ysamsa ykoko, kafes, ni hra ykaini ekei. Yhlet ykoko mahin ei yket oli dait mabe ni hra ysiok kadio hra yiyaka yin Nago.
12 Mde malaikat wamtamre fe watik kempir ou wam maka, wolio kat mse kla hra wafle, kla Efrat. Wto wolio kat ofo, kla oko wkerek se bo raja yehin tali mhok yidien yfe kaisin yfoto. d 13 Ofo tet thot fot fo, klebet yiyaka tolik hra ysilok yde le kako ei yka. Mres man whok wahin lua bres wayaka om mgiet, mres man whok wahin erwas wayaka ou wgiet, mres man whok wahin nabi hra wgebra sawuan na ou wgiet om. 14 Klebet yiyaka ysgia tolik ei, le ma hra ysiok-sak ni yiowuok ei, ygebra na marok. Yein ywayen raja warok yik fobi katak, yibe ykohliowo ei yibe ykhan ykafa yidien tali wagiet maflem, o le ma Na Ron Wakohok Walais Kat wfe tali om.
15-16 Klebet tolik ei yka mde ykohliowo raja ei yik wi hra nai ysalo Ibrani ywit yto Harmagedon. e
Mde hra tali Na Ron wfe om ofo, tet toso Yesus ou wrana wto: “Noso la! Basak Tet tke taka ro kat tde le na wasliak. Mabot man na hra wsi todo, amuk wrat tali wsmit lien wkan om, wfe not trik ei. Ye, nnok deri ma nain kablok nse Tet tak! bo nhes nak tfe na marok ysifuon.” f
17 Mde malaikat wtalak fe ou watik kempir ou wam maka, wolio kat mse yik ago. Wto wolio kat ofo, toso ro kat salo kaf kat mhok mahin Bol Kohok mabri, mahin Na Ron wfe ni maleli raja om, mto: “Ydain wale!” 18 Felek bra wadien rgiho yka yit-yit kat, wadien frero wasamsa kat. Frero ou nai yhot dait latiot, wahin kamuolo Na Ron wsiok latiot na tkoin yik fobi ko, kawuak de hra ke ko, mfle kaka kat. g 19 O le ma kota mayaka mafle om, kota Babel, frero whok waka fo, mfla mkabiya tolik. Na sa hra ynok dait Na Ron, yfe kota kadio ei yti fot, fe hra frero wasamsa. Mde le ke, fe hra] Na Ron wnok tmol Babel, kota hra mafle okom, msiok lis ni sgia, mde ou warin fit om. Ou whnak man om mako met hra mhon fe wtrere wayaka om. h 20 Rwe kadio kat yisi yisak, yidien sfa yisak fot, mre yiheit oli dait. i 21 Mde amak kyen es yifle, man hra ytian mde na tkoin, bo mal sadik le kilogram na lak yeigi whri na wna yahar (50), yti yehin yik ago yba na tkoin ei, mde na tkoin ei ytbekein yfruo kat Na Ron fe hra kafir kyen es oko, fe hra kafir okom msamsa kat. j