Lagu urakng-urakng nang manang
15:1-4
15
Man ku neleꞌ kaꞌ langit hal nang ajaip man luar biasa hebatnya. Ada tujuh malaekat man tujuh bencana. Nianlah bencana nang pangabisatn barang lakaꞌ koa Allah inaꞌ bera agiꞌ.2 Lakaꞌ koa aku neleꞌ, ada nang kateleꞌanannya lea lautan kaca bacampur man api. Aku ugaꞌ neleꞌ urakng-urakng nang dah manang malawan laok nang pertama koa man pantaknya, man angka laok koa. Urakng-urakng nang manang koa badiri kaꞌ tapi lautan kaca sambil masing-masing nyingiꞌiꞌ kecapi nang di Allah mareꞌatn kaꞌ ia kaꞌ koa. 3 Man ia kaꞌ koa ngenyahan lagu nabi Musa, amba Allah, man ngenyahan lagu Anak Domba. Lea nian bunyinya,
“Tuhan, Allah mahakoasa,
Kitaꞌ manjawat hal-hal nang luar biasa man ajaip,
Kitaꞌ marentah sigana bangsa.
Tiap hal nang di Kitaꞌ manjawat adil man banar.a
4 Sigana talino galiꞌ kaꞌ Kitaꞌ, Tuhan.
Sigana talino muliaatn dama Kitaꞌ
Barang Kitaꞌ ihan lah nang suci.
Samua bangsa atakngngaꞌ nyambah Kitaꞌ
tagal sigana bangsa dah neleꞌ ahe nang dah di Kitaꞌ manjawat koa adil man dah nyata banar.”b
Tujuh buah cawan nang panuh man kaberaatn Allah
15:5-8
5 Lakaꞌ koa aku neleꞌ Rumah Allah kaꞌ saruga tabukaꞌ, man Kemah tampat Allah ada kaꞌ dalapmnya.c 6 Lalu katujuh malaekat man katujuh bencana koa kaluar mpat kaꞌ Rumah Allah koa. Pakean nya kaꞌ koa dari kaen lenan putih baraseh nang bakilat-kilat. Man ia kaꞌ koa make tutup dada tabuat dari banang amas. 7 Lalu saurakng dari kaampat mahluk koa mareꞌ kaꞌ katujuh malaekat koa tujuh buah cawan amas nang panuh man kaberaatn Allah, Allah nang idup sampe salama-lamanya. 8 Man Rumah Allah koa panuh man asap dari kamuliaatn man koasa Allah. Man salamaꞌ katujuh bencana nang diincakng katujuh malaekat koa napeꞌ abis, inaꞌ saurakngpun nang baya tamaꞌ kaꞌ dalapm Rumah Allah.d