Kamus
Abraham (Indonesia: Abraham) Urakng nian asalnya mpat kaꞌ Ur-Kasdim nang kaꞌ Mesopotamia selatan nang ampeatn jaji nagari Irak. Abraham di Allah nyuruh untuꞌ ampus kaꞌ tanah Kanaan. Allah bajanji untuꞌ mareꞌaꞌ Abraham manyak katurunan nang ngampuꞌaꞌ nagari Kanaan koa. Ia ugaꞌ bajanji marakatiaꞌ sigana bangsa lewat Abraham. Abraham man Isak man Yakup, dingakoꞌiꞌ jaji eneꞌ uyut bangsa Israel (Kej. 12-25). Kaꞌ dalapm Perjanjian Baharu dingakoꞌiꞌ ugaꞌ jaji apaꞌ sigana urakng pucayaꞌ (Rom. 4:11).
Anak Manunsia (Indonesia: Anak Manusia) Kaꞌ kitap Daniel 17:13 kata nian ditujuatn kaꞌ tokoh panyalamat nang atakngngaꞌ. Yesus kaja make galar Anak Manunsia koa untuꞌ nojok diriꞌ-Nya babaro. Galar koa mareꞌ nauꞌan sae Yesus koa sabatolnya:
1. Ia atakng dari Allah, man sabatolnya Ia ihan Allah.
2. Ia batol-batol saurakng talino.
3. Ia ngampuꞌ kuasa Allah, baik kaꞌ aiꞌ tanah maoꞌpun kaꞌ saruga.
Baranti babuat dosa (Indonesia: bertobat) Baranti babuat dosa man mulakng manjawat nang saarusnya di talino panjawat, ia koa ngasiꞌ man satia kaꞌ Allah. Urakng nang maoꞌ Allah tarimaꞌ man amponiꞌ ia koa arus baranti babuat dosa. Urakng atakng kaꞌ Yohanes Pamaptis untuꞌ dibaptis, nojokatn kadeꞌ urakng-urakng kaꞌ koa dah baranti babuat dosa.
Babalak (Indonesia: Bersunat) Babalak jaji tandahan man Allah man sebagai warga nagari Kerajaan Allah. Secara adat istiadat urakng Yahudi inaꞌ mulih makatn man urakng nang napeꞌ babalak.
Bukit Jaitun (Indonesia: Bukit Jaitun) Bukit Jaitun nian, tampatnya kaꞌ sabalah timur Kota Yerusalem. Kaꞌ diꞌkoa ada manyak puhutn jaitun man ugaꞌ Kompokng Getsemani tampat Yesus biasa badoꞌa. Yesus biasa bamalam kaꞌ Bukit Jaitun koa takaꞌ Nya lakaꞌ ngajar kaꞌ Rumah Allah.
Dewan Agama Yahudi (Indonesia: Mahkamah Agama) Badan pangurus umat Yahudi nang miah tingi. Ada 70 urakng anggota (imam-imam kapalaꞌ, guru-guru agama Yahudi, man naꞌ pamimpin Yahudi). Nang pamimpinnya koa Imam Agung. Dewan Agama Yahudi nian ngampuꞌ kuasa nang sidi luas kaꞌ atas urakng Yahudi nang badiapm kaꞌ propinsi Yudea. Bukeꞌ kahe ngatur ibadah man agama urakng Yahudi pas man ukum Musa, ia kaꞌ koa ugaꞌ jaji akim kaꞌ pakara urakng-urakng. Ia kaꞌ koa baya mutusatn pakara, tapi inaꞌ mulih nyantuꞌatn ukuman mati kadeꞌ inaꞌ di pamarentah Roma satujuiꞌ.
Dosa (Indonesia: Dosa) Dosa nian tabiat nang jahat ahe jaꞌ nang nyimpang dari parentah Allah nang taconteng kaꞌ Ukum Musa man kitap-kitap lainnya. Baik ia koa nang nya manjawat babaro maoꞌpun bakalompok. Urakng-urakng badosa inaꞌ bisa nyalamatatn diriꞌnya dari kuasa dosa. Kaꞌ dalapm Perjanjian Baharu Yesus atakng untuꞌ nyalamatatnnaꞌ talino dari kuasa dosa koa.
Eneꞌ Uyut (Indonesia: Nenek Moyang) Naꞌ eneꞌ uyut bangsa Israel, kususnya Abraham, Isak man Yakup. Allah ngikat perjanjian man ia kaꞌ koa man katurunannya kaꞌ koa.
Galilea (Indonesia: Galilea) Galilea nian dama soteꞌ binua nang marikng utara nagari nang di urakng Israel niapmiꞌ. Kaꞌ dalapm binua koa ada ugaꞌ dano nang badama Galilea. Waꞌtu panjajahan Roma, Galilea jaji propinsi nang di saurakng gubernur Romawi nguasaiꞌ. Kota Nasaret, tampat Yesus badiapm, ada kaꞌ Galilea nian, man Yesus mulaiꞌ tugas-Nya kaꞌ tampat nian.
Gawe Paska (Indonesia: Hari raya Paskah) Gawe Paska nian ari raya untuꞌ ngingat waꞌtu urakng-urakng Israel kaluas mpat kaꞌ tanah Mesir, tampat diꞌmae ia kaꞌ koa dinyajiatn budak. Waꞌtu koa sigana bangsa Israel nyambaleh anak domba man nolesatn darahnya kaꞌ tihakng-tihakng pintu rumahnya kaꞌ koa. Man tanda koa, ia kaꞌ koa salamat takaꞌ Allah munuh sigana anak nang tuha urakng Mesir. Allah nyuruh urakng Israel ngarayaatn Gawe Paska koa untuꞌ ngingatatn cara Allah nyalamatatn ia kaꞌ koa. Jaji tiap tahutn urakng Israel nyambaleh anak domba man manjawat Gawe Paska. Kaꞌ dalapm Perjanjian Baharu Yesus nianlah Anak Domba Paska diriꞌ (1Kor. 5:7).
Gawe Roti Inaꞌ Baragi (Indonesia: Hari raya roti tidak beragi) Urakng Yahudi manjawat gawe nian salamaꞌ tujuh ari takaꞌ dah abis Gawe Paska. Roti nang inaꞌ baragi nian modelnya rata jukut dimanjawat inaꞌ dibareꞌ pangamakng. Roti koa ditunu untuꞌ ngingatatn malam diꞌmae Allah mebasatn urakng Israel mpat kaꞌ nagari Mesir nang nyajiatn ia kaꞌ koa budak (Kel. 12:14-20; Mat. 26:17).
Guru agama Yahudi (Indonesia: ahli Torat) Guru agama Yahudi nian sakalompok pamimpin agama Yahudi. Pamulaꞌatnnya ia kaꞌ koa kahe nyalitn ihan parentah Allah, kususnya kalima kitap Torat Musa. Kaꞌ jaman Yesus tugasnya kaꞌ koa jaji sidi luas:
1. Nyontengan parentah Allah;
2. Ngajaratn parentah koa man aturan adat nang lain nang inaꞌ taconteng;
3. Mareꞌ nasehat kaꞌ Dewan Agama Yahudi mpahe caranya nyalanan parentah Allah kaꞌ dalapm kaidupatn saari-ari.
Ibalis raja setan-setan (Indonesia: Iblis raja setan-setan) Pamimpin setan man roh-roh jahat nang paling tingi. Ia koa ular nang tuha nang ngoda Hawa makatn buah puhutn pamane nang baik man nang jahat (Kej. 3:1-6). Lakaꞌ koa, tujuannya ngalawan Allah man nyasatatn urakng sampe badosa. Ia ugaꞌ barusaha ngarusakatn ubungan talino man Allah.
Imam (Indonesia: Imam) Urakng-urakng nian batanggong jawap nyalanan ibadah kaꞌ Rumah Allah. Sigana imam koa katurunan urakng Lewi. Nang karajanya:
1. Mareꞌ paremahan nang di urakng ngincakng kaꞌ Rumah Kudus Allah untuꞌ dibareꞌatn kaꞌ Allah
2. Nunu kamanyan nang kusus untuꞌ nyambah Allah man bapamang untuꞌ bangsa Israel
3. Mimpin ibadah kaꞌ Rumah Allah
Imam Agung (Indonesia: Imam Besar) Imam Agung urakng nang ngampuꞌ jabatan nang miah tingi kaꞌ dalapm ibadah urakng Israel. Sakali satahutn ia tamaꞌ kaꞌ Ruang Mahakudus nang kaꞌ dalapm Rumah Allah. Kaꞌ diꞌkoa ia mareꞌ persembahan korban untuꞌ nabus dosa sigana bangsa Israel. Kaꞌ jaman Yesus, Imam Agung ugaꞌ jaji pamimpin Dewan Agama Yahudi. Harun Imam Agung nang pamulaꞌatn, sigana Imam Agung katurunan Harun.
Imam-imam kapalaꞌ (Indonesia: Imam-imam kepala) Nian imam-imam nang paling panting kaꞌ babah Imam Agung. Ia nian di Imam Agung milih untuꞌ mimpin kalompok-kalompok imam nang batugas kaꞌ Rumah Allah. Ia nian ugaꞌ jaji anggota Dewan Agama Yahudi.
Kaajaipatn (Indonesia: Mujizat) Kaajaipatn nian ugaꞌ disabut “tanda-tanda ajaip.” Tanda-tanda ajaip nian kaja nyarataiꞌ kaatangan Allah untuꞌ nyalamatatnnaꞌ umat-Nya. Yesus manjawat manyak tanda-tanda, contonya: Nyamuhatn urakng nang rongkoꞌ man cacat, nyajiatn urakng mati mulakng idup agiꞌ, man mareꞌ makatn lima ribu urakng. Ahe nang di Yesus panjawat man koasa-Nya koa jaji tanda kadeꞌ Allah inaꞌ lama agiꞌ mulaiꞌaꞌ marentah jaji Raja.
Kabar nang Gagas (Indonesia: Injil) Kabar nang Gagas nian kadeꞌ Yesus dah atakng kaꞌ dunia jaji Raja Panyalamat (Mesias), man Allah bamulaaꞌ marentah jaji Raja kaꞌ dunia. Yesus ampus dari soteꞌ tampat kaꞌ tampat lain nyampeatn kabar nang gagas koa. Baruꞌ Yesus ngiripm naꞌ murit-murit-Nya untuꞌ ampus kaꞌ mae-mae maꞌan untuꞌ nyampeatn kabar koa.
Kaisar (Indonesia: Kaisar) Kaisar nian galar raja untuꞌ pamarentah Roma. Ia jaji pamimpin nang paling bakuasa, kaꞌ atas sigana binua nang di urakng Roma nguasaiꞌ, termasuk Yudea man Galilea. Takaꞌ Yesus dimaranakatn, nang marentah jaji Kaisar Agustus (31 SM - 14 Masehi; teleꞌ Luk. 2:1). Baruꞌ lakaꞌ ia, Kaisar Tiberius (14-37 Masehi) marentah kaꞌ jaman palayanan Yohanes Pamaptis man Yesus.
Kitap Suci (Indonesia: Kitap Suci) Nian pakataatn Allah nang taconteng kaꞌ dalapm sangahe kitap. Kitap-kitap nang dinalah “Kitap Suci” kaꞌ jaman Yesus, ampeatn dikanal lea Perjanjian Lama. Termasuk kaꞌ dalapmnya lima kitap nang di Musa nyonteng (Ukum Musa/Torat Musa), kitap-kitap naꞌ nabi, man ugaꞌ tulisan lain lea Masmur man sajarah bangsa Israel. Samuanya dinganggap suci man sidi bakuasa tagal samuanya koa mpat kaꞌ Allah.
Kudus (Indonesia: Kudus) Allah Kudus, ratinya Ia babeda man sigana nang Nya nampaꞌ. Ia kaꞌ atas sigananya koa: baik aiꞌ tanah nian man sigana isiꞌnya, ugaꞌ roh-roh man mahluk surgawi. Ia inaꞌ bacacat ato banoda, inaꞌ nganal dosa. Kadeꞌ talino ato barang-barang disabut kudus, ratinya urakng ato barang koa dimilih man dingususatn untuꞌ palayanan Allah. Barang nang kudus inaꞌ mulih dipagunaan untuꞌ hal-hal nang biasa. Allah nang ngudusatn talino, ratinya Ia nang milih talino untuꞌ jaji umat-Nya nang Ia ngampuꞌ.
Malaekat (Indonesia: Malaekat) Mahluk surgawi nang ngalayaniꞌ man manjawat kamaoꞌan Allah. Kadang-kadang Allah ngiripm malaekat untuꞌ nyampeatn pasatn-Nya kaꞌ urakng-urakng. Lea talino, malaekat ugaꞌ di Allah nampaꞌ. Tapi malaekat tatap babeda man talino, man urakng nang udah mati inaꞌ jaji malaekat.
Maptis (Indonesia: Baptis) Nyalapm man dimarancekiꞌ make aiꞌ, tanda kadeꞌ urakng koa dah baranti babuat dosa man mulakng kaꞌ Allah (Mrk. 1:4). Dibaptis koa ugaꞌ tanda kadeꞌ urakng koa anggota umat Allah.
Mesbah (Indonesia: Mezbah) Tampat urakng nunu korban laok ato paremahan lain untuꞌ diremahan kaꞌ Allah.
Murit (Indonesia: Murid) Murit nian urakng nang nunaꞌan saurakng pamimpin ato guru untuꞌ balajar kaꞌ ia. Yohanes Pamaptis man urakng Parisi ngampuꞌ murit-murit. Saurakng murit bukeꞌ ihan nangngar ajaran dari gurunya, tapi ugaꞌ neleꞌ man nunaꞌan taladan cara idupnya. Yesus secara kusus milih dua balas urakng untuꞌ jaji murit-Nya, tapi ugaꞌ ngampuꞌ pangikut-pangikut nang lain. Sigana urakng pucayaꞌ ugaꞌ jaji murit Yesus, man tugas urakng pucayaꞌ nyajiatn sigana bangsa-bangsa murit Yesus.
Nabi (Indonesia: Nabi) Nabi koa saurakng amba ulutn Allah, nang dinyaruꞌ untuꞌ nyampeatn pakataatn Allah kaꞌ talino. Kaꞌ jaman Perjanjian Lama, Allah dah ngiripm nabi-nabi, lea Musa, Elia, Amos, Yesaya man nang lainnya untuꞌ nyampeatn pakataatn Allah. Ugaꞌ Yohanes Pamaptis (Mat. 11:5) man Yesus babaro disabut nabi (Luk. 24:17). Yohanes Pamaptis nabi nang di Allah nyanjiatn untuꞌ nyiapatn urakng Israel narimaꞌ kaatangan Tuhan Yesus (Ul. 18:1, 18; Yoh. 6:14). Yesus madahatn atakngngaꞌ nabi-nabi palsu nang maoꞌ nyasatatnnaꞌ urakng pucayaꞌ (Mat. 24:11, 24).
Nyambah (Indonesia: Menyembah) Nojokatn sikap hormat man patuh kaꞌ dewa. Ada manyak macam cara nyambah, kaꞌ antaranya basujud, nunu korban, barenyah muji, mareꞌ adiah nang dingususatn.
Kaꞌ dalapm Alkitap, Allah dah nyampeatn lemae caranya talino arus nyambah kaꞌ Ia. Contonya, urakng nang nyambah kaꞌ Allah inaꞌ mulih manjawat pantak ato nyambah kaꞌ dewa-dewa lain (Kel. 20:3-5). Nyambah kaꞌ Allah bukeꞌlah sakadar ngincakng persembahan man nyalanan kegiatan ibadah ihan, man urakng inaꞌ agiꞌ arus nyambah-Nya kaꞌ tampat-tampat kusus (Yes. 1:11-17; Yoh. 4:21-23). Urakng arus nyambah Allah man sigana atinya, ngasiꞌ man satia kaꞌ Ia (Mi. 6:6-8; Luk. 10:27).
Padang paser (Indonesia: Padang Pasir) Abut nang karikng, babatu-batu man babukit. Aiꞌ man rumput miah sabebet kaꞌ koa. Inaꞌ ada urakng nang badiapm natap kaꞌ koa. Tapi sangahe urakng tokoh Kitab suci nang badiapm untuꞌ samintara kaꞌ koa. Bangsa Israel maranto kaꞌ padang paser salamaꞌ 40 tahutn, man Daut nariatn diriꞌ kaꞌ koa takaꞌ Raja Saul maoꞌ munuhaꞌnya. Bukeꞌꞌ padang paser nang ada kaꞌ Arab saudi ato gurun Sahara.
Panagih pajak (Indonesia: Pemungut Cukai) Kaꞌ jaman Yesus, panagih pajak koa urakng Yahudi nang bakaraja mungut duit pajak untuꞌ pamarentahan Roma. Ia kaꞌ koa kaja mungut labih dari nang dinantuatn. Tagal koa ia kaꞌ koa inaꞌ disukaiꞌ di sabayaatnnya urakng Yahudi.
Pati Perjanjian (Indonesia: Tabut perjanjian Allah) Pati perjanjian Allah, pati kayu nang tabuat dari kayu akasia man dilapisiꞌ amas murni. Nang melambangkan/mengambarkan kehadiran Allah kaꞌ tangah-tangah umat-Nya. Pati koa barisiꞌ dua batu nang ditulisiꞌ kasapuluh parentah Allah (Kel. 25:10-22; Ibr 9:45)
Panyaga Domba (Indonesia: Gembala) Panyaga domba nian urakng nang batanggong jawap untuꞌ ngingu kabatn domba ato kambing. Saurakng panyaga domba arus ngirikng kabatnnya kaꞌ tampat diꞌmae ada manyak rumput biar domba-domba kaꞌ koa namu pamakanan. Ia ugaꞌ arus nyaga domba-dombanya dari pangalit man sarangan laok-laok nang liar, baik siakng maoꞌpun malam ari. Kadeꞌ ada sekoꞌ domba nang langit, ia arus ngagoꞌiꞌnya man ngincakngnya pulakng kaꞌ kabatnnya. Dalapm masarakat urakng Yahudi, panyaga domba dinganggap inaꞌ barati. Tapi kaꞌ dalapm Alkitap, Allah kaja diumpamaan lea panyaga domba untuꞌ umat-Nya bangsa Israel (Mas. 23; Yes. 40:11; Yeh. 34).
Parentah Allah (Indonesia: Hukum Torat) Nian ukum man paraturan nang di Allah mareꞌatn kaꞌ urakng Israel. Biasanya kata-kata nian nojok kaꞌ parentah-parentah nang dimareꞌatn kaꞌ Musa, nang taconteng kaꞌ lima kitap pamulaꞌatn Perjanjian Lama. Parentah-parentah koa ngatur kaidupatn bangsa Israel, man ugaꞌ ibadah bangsa koa kaꞌ Allah.
Parisi (Indonesia: Farisi) Parisi nian kalompok agama nang bapangaruh kaꞌ dalapm masarakat urakng Yahudi kaꞌ jaman Yesus. Urakng-urakng nian nyoba naatiꞌ sigana parentah Allah nang taconteng kaꞌ dalapm Perjanjian Lama, man ugaꞌ paraturan-paratuan agama nang lainnya nang di guru-guru agama Yahudi ngajaratn. Kususnya urakng Parisi koa sidi miah naatiꞌ paraturan lea pasapuluhatn, puasa, man ari Sabat (ari istirahat man baibadah).
Parumpamaan (Indonesia: Perumpamaan) Gesah-gesah nang dipake untuꞌ ngajar. Gesah koa tentang idup saari-ari. Tapi tujuannya mareꞌ ajaran tentang Allah, talino man nang lainnya. Yesus kaja make parumpamaan untuꞌ mareꞌ gambaran tentang Allah man cara idup urakng nang ngarepoatn ati Allah.
Persembahan (Indonesia: Korban) Barang nang dimareꞌ kaꞌ Allah kaꞌ atas mesbah jaji cara nyambah-Nya. Bisa barupa laok, asil panen, tapukng gandum, ato keꞌ aiꞌ anggur. Urakng Yahudi mareꞌ persembahan untuꞌ ngucap sukur kaꞌ Allah, ato ugaꞌ untuꞌ nyaga ubungan baik man Ia, ato pun biar dosanya kaꞌ koa diamponiꞌ.
Pilatus (Indonesia: Pilatus) Pontius Pilatus di pamarentah Romawi nojok untuꞌ mangkoꞌ jabatan gubernur kaꞌ atas propinsi-propinsi Yudea, Samaria, man Idumea, tahutn 26-36 Masehi. Ia mampautiꞌ kadudukatn panting kaꞌ waꞌtu Yesus diadiliꞌ (Mrk. 15:1-15). Kahe pamarentah Romawi ihan nang mulih nyantuꞌatn ukuman mati, bukeꞌ naꞌ pamimpin Yahudi. Jaji naꞌ pamimpin Yahudi koa ngincakng Yesus kaꞌ Pilatus takaꞌ maoꞌ ngukumaꞌ mati Yesus kaꞌ atas kayu salip. Pilatus koa nang ngakimiꞌ Yesus man nyantuꞌatn ukuman mati kaꞌ Yesus.
Raja Panyalamat (Indonesia: Mesias/Karistus) Raja nang di Allah nyanjiatn, nang ngalapasatnnaꞌ man nyalamatatnnaꞌ talino. Dalapm bahasa Ibrani dinalah “Mesias,” nang dinalah “Karistus” dalapm bahasa Yunani. Baik “Mesias” maoꞌpun “Karistus” ratinya, “nang diurapiꞌ.” Kata koa nojokatn kaꞌ urakng nang dilantik untuꞌ jabatan kusus, caranya dilelehiꞌ binyak kaꞌ kapalanya. Nian tanda kadeꞌ urakng koa dah dimilih untuꞌ ngalayaniꞌ Allah man umat-Nya. Kadeꞌ nurut adat-istiadat Israel, koalah tanda urakng nang dipilih jajiaꞌ raja. Dalapm Perjanjian Baharu, nang dimaksut man kata “Karistus” Raja Panyalamat koa Yesus (Mat. 16:16; Mrk. 14:61-62; Kis. 2:36).
Rasul (Indonesia: Rasul) Kata nian kaja nojok kaꞌ kadua balas murit Yesus nang Nya ngiripm untuꞌ turut nyalanan pakarajaatn-Nya (Mat. 10:1-2). Tapi ugaꞌ urakng-urakng lain nang dinyaruꞌ untuꞌ ngesahatn Kabar nang Gagas ugaꞌ dinalah “rasul” (Rom. 16:7). Kususnya, Paulus dinalah “rasul” untuꞌ bangsa-bangsa nang bukeꞌ urakng Yahudi (Rom. 11:13).
Roh Kudus (Indonesia: Roh Kudus) Allah, Ia koa ugaꞌ Apaꞌ, Anak, man Roh. Kaꞌ dalapm Alkitap, Roh Kudus disabut ugaꞌ: “Roh Kudus,” man “Rohnya Tuhan” man “Rohnya Yesus” (Kis. 16:7). Ia mimpiniꞌ, mantoꞌ, man ugaꞌ mareꞌ kuasa kaꞌ urakng-urakng nang pucayaꞌ kaꞌ Allah.
Rumah Allah (Indonesia: Bait Allah/Bait Suci) Rumah Kudus Allah nian kaꞌ Yerusalem, pusat agama urakng Yahudi baibadah. Urakng Yahudi arus ngincakng korban-korban kaꞌ Rumah Kudus Allah untuꞌ mareꞌ persembahan kaꞌ Allah. Kaꞌ luasnya ada mesbah untuꞌ nunu korban laok, man kaꞌ dalapmnya ada mesbah untuꞌ nunu kamanyan nyambah Allah. Bagian paling dalapm dinalah Ruang Mahakudus. Kaꞌ diꞌkoalah tampat pati perjanjian nang jaji lambang kadeꞌ Allah ada kaꞌ antara umat-Nya.
Rumah Tampat Sumbayang (Indonesia: Rumah Ibadah) Tampat kaꞌ masing-masing desa urakng Yahudi untuꞌ bakomoꞌ sumbayang kaꞌ ari Sabat. Kaꞌ diꞌkoalah urakng Yahudi nangngar Pirman Tuhan man ajaran agama. Nian ugaꞌ tampat untuꞌ pangurus-pangurus kampokng urakng Yahudi ngadiliꞌ pakara kaꞌ desa koa. Rumah tampat sumbayang ugaꞌ dipake untuꞌ tampat bahaupm, man sakolah tampat kamudaꞌ-kamudaꞌ nanglaki balajar untuꞌ maca Kitap Suci.
Sabat (Indonesia: Sabat) Manurut kalender urakng Yahudi, Sabat nian ari katujuh, nang ampeatn diriꞌ kanal ari Saptu. Kaꞌ dalapm Sapuluh Parentah, Allah ngalarang urakng Israel untuꞌ bakaraja kaꞌ ari Sabat (Kel. 20:8-11). Takaꞌ sampe kaꞌ jaman Yesus, ada manyak paraturan tentang ari Sabat, ahe nang mulih man nang naꞌ mulih dipanjawat kaꞌ ari Sabat koa. Urakng Parisi man guru agama Yahudi sidi ngasiꞌ ngikutiꞌ paraturan koa. Sampe ampeatn, urakng Yahudi nyambah kaꞌ Allah kaꞌ ari Sabtu. Urakng pucayaꞌ baibadah kaꞌ ari Minggu tagal Yesus mulakng idup kaꞌ ari Minggu.
Setan-setan (Indonesia: Setan-Setan) Koasa-koasa jahat nang bamusuhatn man Allah man ugaꞌ barusaha ngalawan Allah. Koasa-koasa koa pane tamaꞌ kaꞌ urakng sampe urakng koa inaꞌ mangkeh ngandaliatn diriꞌnya, lalu manjawat dosa man sakit. Yesus ngampuꞌ kuasa untuꞌ ngoser setan-setan dari urakng nang katamaan setan, Ia ugaꞌ mareꞌ kuasa koa kaꞌ murit-murit-Nya.
Sumpah (Indonesia: Sumpah) Kata nian barati nguatatn panyataan koa man nyabut dama Allah nang jaji saksi.
Allah marentah jaji Raja (Indonesia: Kerajaan Allah) Kata-kata nian nojok kaꞌ pamarentahan Allah kaꞌ antara urakng-urakng nang tunduk kaꞌ Ia. Jaji raja, Allah nyaga, mihara, man mimpin umat-Nya. Urakng-urakng nang jaji anggota umat Allah naatiꞌ Ia, tunduk man satia kaꞌ Allah nang jaji Rajanya kaꞌ koa. Kata-kata “Allah marentah jaji Raja” baya ugaꞌ nojok kaꞌ jaman ampeatn, maoꞌpun ugaꞌ kaꞌ waꞌtu Tuhan Yesus atakng kaꞌ pangabisatn dunia naꞌe. Kata “Allah marentah jaji Raja” inaꞌ nojok kaꞌ soteꞌ nagari nang kaꞌ dunia nian, man inaꞌ ugaꞌ nojok kaꞌ saruga ihan. Kata-kata koa labih nojok kaꞌ ubungan Allah man umat-Nya.
Urakng Lewi (Indonesia: Orang Lewi) Suku katurunan Lewi. Lewi nian salah sekoꞌ dari dua balas anak Yakup, eneꞌ uyut urakng Israel koa. Harun, Imam Agung nang pamulaꞌatn, man ugaꞌ sigana imam-imam nang lainnya, dari katurunan suku Lewi. Urakng-urakng lain kaꞌ suku nian batanggong jawap mantoꞌ naꞌ imam-imam untuꞌ ngalayaniꞌ kaꞌ Rumah Kudus Allah kaꞌ Yerusalem. Kahe nanglaki ihan nang biasanya mantoꞌ kaꞌ dalapm palayanan.
Kalompok Saduki (Indonesia: Kelompok Saduki) Kalompok Saduki nian golongan agama Yahudi nang balawanan man kalompok Parisi. Manyak imam man urakng Lewi masok kaꞌ dalapm golongan nian. Ia kaꞌ koa kahe pucayaꞌ kaꞌ lima kitap pamulaꞌatn dalapm perjanjian lama ihan, Kejadian, Keluaran, Imamat, Bilangan, man Ulangan. Ia kaꞌ koa pucayaꞌ kadeꞌ talino inaꞌ idupaꞌ agiꞌ kadeꞌ dah mati.
Urakng Samaria (Indonesia: Orang Samaria) Urakng Samaria badiapm kaꞌ binua kaꞌ antara Yudea man Galilea. Urakng Samaria nian katurunan dari panganten campur antara urakng Israel man urakng asing nang badiapm kaꞌ sakitarnya. Urakng Samaria, urakng nang nyambah Allah man cara nang babeda, inaꞌ lea urakng Yahudi nyambah Allah. Tagal koa urakng Samaria man urakng Yahudi kaja bamusuhatn.
Yerusalem (Indonesia: Yerusalem) Yerusalem nian ibu kota urakng Israel dari jaman Raja Daut. Salain pusat pamarentahan, kota koa ugaꞌ pusat agama untuꞌ urakng Yahudi, tagal Rumah Kudus Allah ada kaꞌ diꞌkoa.
Yohanes Pamaptis (Indonesia: Yohanes Pembaptis) Yohanes Pamaptis nian lahir dari Elisabet bini imam Sakaria takaꞌ nyadua dah tuha (Luk. 1). Tugas Yohanes Pamaptis nyiapatn urakng-urakng untuꞌ kaatangan Yesus jaji Raja Panyalamat. Ia maptis urakng jaji tanda kadeꞌ urakng kaꞌ koa dah baranti babuat dosa man mulakng kaꞌ Allah.
Yunani (Indonesia: Yunani) Bangsa Yunani nguasaiꞌ binua-binua nang cukup luas kaꞌ gunar Laut Tanggah, kaꞌ abat-abat sanapeꞌ Masehi. Baruꞌ binua koa di urakng Roma nguasaiꞌ, tapi budaya man bahasa urakng Yunani koa masih cukup kuat, termasuk kaꞌ Yudea man Galilea. Kaꞌ jaman Perjanjian Baharu, bahasa Yunani dah jaji bahasa umum nang dipake rami urakng. Sigana kitap Perjanjian Baharu dinyonteng make bahasa Yunani.