Kitap tabukaꞌ
10:1-11
10
Lalu aku neleꞌ saurakng malaekat nang lain nang miah kuat turutn mpat kaꞌ saruga. Ia di rahuꞌ mungkus, man mamuraja ngalingkariꞌ kapalanya. Muhanya basinar lea mataari, man pahanya lea tihakng api. 2 Kaꞌ kokotnya ada sabuah gulongan kitap enek nang tabukaꞌ. Paha kanannya ninyak kaꞌ laut, man paha kebaꞌnya ninyak kaꞌ darat. 3 Lalu ia ngampak man suara nang nyarikng bunyi suara singa. Lakaꞌ malaekat koa ngampak, katujuh guntur nyahut man suara guruh-guruh. 4 Lakaꞌ katujuh guntur koa ngomong, aku maoꞌ nyontengannya, tapi aku nangngar suara dari saruga bakata, “Rahasiaatnlah ahe nang di tujuh guntur koa ngataatn; ame nyontengannya!”5 Lalu malaekat nang ku neleꞌ badiri kaꞌ laut man kaꞌ darat koa ngangkat kokot kanannya kaꞌ langit untuꞌ basumpah. 6 Ia basumpah demi dama Allah nang idup salama-lamanya, nang nampaꞌ langit, aiꞌ tanah man laut sarata sigananya nang ada kaꞌ dalapmnya. Malaekat koa bakata, “Waꞌtunya inaꞌ ditundaꞌaꞌ agiꞌ! 7 Tapi kadeꞌ malaekat katujuh nyiup tarompetnya, jaji ganapaꞌ kaputusan rahasia Allah, lea nang dah Ia ngesahatn kaꞌ amba-amba-Nya, yakoa nabi-nabi.”a
8 Lakaꞌ koa suara nang dah ku nangngar mpat kaꞌ saruga koa, ngomong agiꞌ man aku. Ia bakata, “Ampuslah taap gulongan kitap nang tabukaꞌ kaꞌ kokot malaekat nang badiri kaꞌ laut man kaꞌ darat koa.” 9 Lalu akupun ampus kaꞌ malaekat koa man mintaꞌ biar ia mareꞌatn gulongan kitap koa kaꞌ aku. Ia bakata, “Taaplah man makatnlah nian. Kaꞌ dalapm parutnyu jajiaꞌ sakit, tapi kaꞌ dalapm molotnyu ia manseꞌaꞌ lea madu.” 10 Aku pun naap gulongan kitap koa dari kokot malaekat koa lalu ku makatniꞌ. Kaꞌ dalapm molotku rasanya manseꞌ lea madu, tapi lakaꞌ aku nalatnnya, parutku tarasa sakit.b 11 Lalu ia bakata kaꞌ aku, “Kao arus nyampeatn pasatn mpat kaꞌ Allah agiꞌ tentang sigana bangsa, nagari, bahasa man raja-raja.