Malaekat kalima nyiup tarompetnya
9:1-12
9
Lakaꞌ koa malaekat kalima nyiup tarompetnya, man ku neleꞌ sabuah bintakng jantuꞌ mpat kaꞌ langit kaꞌ atas aiꞌ tanah. Bintakng koa di mareꞌ kunci arokng kamatiatna. 2 Lalu bintakng koa mukaꞌ pintu arokng kamatiatn koa, lalu asap kaluas dari dalapmnya lea asap dari tongkoꞌ nang ayaꞌ. Mataari man langit jaji patakng di asap dari arokng koa.b 3 Lalu dari dalapm asap koa kaluaslah buntak-buntak nang turutn kaꞌ aiꞌ tanah. Buntak-buntak koa mareꞌ koasa sama lea nang di mareꞌatn kaꞌ kalajengking.c 4 Buntak-buntak koa dimaiꞌan ngarusak rumput-rumput, ato puhutn-puhutn kayu, ato tanam-tanaman lainnya. Ia kaꞌ koa kahe mulih nyarang urakng-urakng nang kaꞌ kaningnya inaꞌ ada tanda cap mpat kaꞌ Allah.d 5 Buntak-buntak koa inaꞌ diijinan munuh urakng-urakng koa, tapi kahe nyiksa nya kaꞌ koa salamaꞌ lima bulatn. Sakit kana sanget buntak-buntak koa sama lea sakit nang dikalajengking koa nyanget. 6 Salamaꞌ lima bulatn koa, urakng-urakng kaꞌ koa barusaha biar mati, tapi ia kaꞌ koa inaꞌ bisa mati; ia kaꞌ koa labih suka mati daripada idup, tapi inaꞌ bisa.e7 Buntak-buntak koa lea kuda nang siap baparang. Kaꞌ kapala nya kaꞌ koa ada nang lea mahkota amas. Muha nya kaꞌ koa lea muha talino.f 8 Buꞌuk nya kaꞌ koa lea buꞌuk nangbini, man gigi nya kaꞌ koa lea gigi singa.g 9 Dada nya kaꞌ koa kateleꞌanan lea dinutup man baju basi. Bunyi seap nya kaꞌ koa lea bunyi sangahe buah kareta-kareta kuda nang badakah nang tagah nyarang kaꞌ dalapm parang.h 10 Ia kaꞌ koa baekoꞌ man sanget lea kalajengking. Man kaꞌ dalapm ekoꞌ nya kaꞌ koalah ada kakuatan nya kaꞌ koa untuꞌ nyiksa talino salamaꞌ lima bulatn. 11 Raja nang marentah nya kaꞌ koa malaekat arokng kamatiatn; damanya kaꞌ dalapm bahasa ibrani Abadon ratinya parusak man kaꞌ dalapm bahasa Yunani Apolion ratinya pangancur. 12 Kasingsaraatn nang pamulaꞌatn dah lewat. Ampeatn nyusulaꞌ dua kasingsaraatn agiꞌ.
Tarompet nang kaanam
9:13-21
13 Lalu malaekat nang kaanam nyiup tarompetnya, man ku nangngar bunyi suara atakng dari kaampat tanuk mesbah amas nang ada kaꞌ depan Allah.i 14 Suara koa bakata kaꞌ malaekat nang kaanam koa, “Lapasatnlah kaampat malaekat nang tarikat kaꞌ sunge Eprat koa!” 15 Kaampat malaekat koa pun dingalapasatn. Malaekat-malaekat koa dinyiapatn kusus kaꞌ jam, ari, bulatn man tahutn nang ditantuatn Allah untuꞌ munuh sepertiga dari sigana talino. 16 Aku dimadahiꞌ kadeꞌ jumbalah pasukan-pasukan bakuda koa samanyak dua ratus juta. 17 Man kaꞌ dalapm paneleꞌanan, ku neleꞌ kuda-kuda koa man panunggang-panunggangnya. Panunggang-panunggangnya make baju basi nang bawarna sidi calah, biru tuha, man kuning balerang. Kapala kuda-kuda koa lea kapala singa, man dari molotnya kaluas api, asap, man malerang. 18 Sepertiga dari umat talino tabunuh di katalu bencana koa; api, asap, balerang nang kaluar dari molot kuda-kuda koa. 19 Kakuatan kuda-kuda koa ada kaꞌ molotnya man ugaꞌ kaꞌ ekoꞌnya. Ekoꞌ-ekoꞌ koa lea bakapala ular. Man ekoꞌnya koa, kuda-kuda koa nyiksa talino.
20 Tapi sisaꞌ dari umat talino nang inaꞌ tabunuh di bencana-bencana koa pun, inaꞌ ugaꞌ ningngalatn perbuatan kokot nya kaꞌ koa babaro: ia kaꞌ koa inaꞌ baranti nyambah roh-roh jahat man berhala-berhala amas, perak, timaga, batu man kayu nang inaꞌ baya neleꞌ ato nangngar, atopun bajalatn.j 21 Ia kaꞌ koa inaꞌ ugaꞌ ninggalatn perbuatan-perbuatan nya kaꞌ koa nang jahat, pambunuhan, ilamu-ilamu gaip, kalakuan nang cabul man pangalit.