Anak Domba mukaꞌ segel nang katujuh
8:1-5
8
Takaꞌ Anak Domba koa mukaꞌ segel nang katujuh, saruga jaji sunyiꞌ kira-kira satangah jam. 2 Lalu ku neleꞌ katujuh malaekat nang badiri kaꞌ depan Allah, man kaꞌ ia kaꞌ koa di bareꞌ tujuh buah tarompet.3 Saurakng malaekat lain, nang ngincakng sabuah mangkok amas, atakng man badiri kaꞌ depan mesbah. Kaꞌ ia dibareꞌ manyak kamanyan untuꞌ sama-sama doꞌa-doꞌa samua umat Allah man untuꞌ diparemahan kaꞌ mesbah amas nang ada kaꞌ depan tahta.a 4 Naiklah asap kamanyan sama-sama man doꞌa umat Allah koa dari kokot malaekat koa kaꞌ adapatn Allah. 5 Lalu malaekat koa naap mangkok amas koa, ngisiꞌnya man bara api dari mesbah man nabakatnnya kaꞌ aiꞌ tanah. Lalu tajajilah bunyi guruh, disarataiꞌ ugaꞌ selak nang basambung-sambung man gempa aiꞌ tanah.b
Tarompet nang pamulaꞌatn sampe nang kaampat dinyiup
8:6-13
6 Lakaꞌ koa katujuh malaekat nang nyingiꞌiꞌ katujuh tarompet koa siap-siap untuꞌ nyiup tarompet.
7 Malaekat pertama nyiup tarompetnya, lalu jajilah ujatn es, man api bacampur darah; man samuanya koa di nabakatn kaꞌ aiꞌ tanah; jaji katunuan sepertiga aiꞌ tanah man sepertiga dari puhutn-puhutn kayu, man ratoknglah sigana rumput-rumput.c
8 Lalu malaekat kadua nyiup tarompetnya, ada sesuatu nang kateleꞌanannya lea panamukng nang sidi ayaꞌ nang nyala-nyala dinabakatn kaꞌ dalapm laut. Jaji sepertiga dari laut koa jaji darah, 9 man matilah sepertiga dari samua nang idup kaꞌ laut man musnahlah sepertiga dari sigana macam parahu.
10 Lakaꞌ koa malaekat katalu nyiup tarompetnya, lalu sabuah bintakng nang ayaꞌ, nang nyala lea obor, jantuꞌ mpat kaꞌ langit, lalu ninihiꞌ sepertalu dari sunge-sunge man mata-mata aiꞌ.d 11 Dama bintakng koa Apsintus.e Man sepertiga dari samua aiꞌ jaji pahit, man manyak urakng mati tagal aiꞌ koa, barang dah jaji pahit.f
12 Malaekat kaampat nyiup tarompetnya. Lalu baranti basaho sepertiga dari mataari, sepertiga dari bulatn, man sepertiga dari bintakng-bintakng sampe-sampe ilanglah ssepertiga dari kakuatan sahonya koa. Lalu sepertiga dari siakng ari inaꞌ agiꞌ tarakng man lea koa ugaꞌ malam ari.g
13 Lalu ku neleꞌ man ku nangngar sekoꞌ burukng binaul nang tagah tarabakng tingi kaꞌ langit, bakata man suara nyarikng, “Cilaka! Cilaka! Cilakalah sigana talino kaꞌ aiꞌ tanah kadeꞌ kadangngaratn katalu malaekat lainnya nyiup tarompetnya naꞌe!”