Kadua puluh ampat pamimpin-pamimpin man kaampat mahluk
4:1-11
4
Lakaꞌ koa aku Yohanes namu paneleꞌanan dari Tuhan agiꞌ: Sabuah pintu tabukaꞌ kaꞌ saruga man aku nangngar suara nang suah kunangngar sanapeꞌnya lea bunyi tarompet. Suara koa bakata kaꞌ aku, “Injeꞌ naik kaꞌ keatn. Aku nojokatnnaꞌ kaꞌ kao ahe nang arus jaji lakaꞌ nian.” 2 Aku langsung di Roh Kudus ngoasaiꞌ, ku neleꞌ kaꞌ saruga ada sabuah tahta, man ada Saurakng duduk kaꞌ tahta koa. a 3 Ia nang duduk kaꞌ tahta koa basaho ijo merah lea batu yaspis man batu sardis. Ada mamuraja nang ngulilikngiꞌ tahta koa nang sahonya lea batu jamrut. 4 Kaꞌ sakulilikng tahta koa ada dua puluh ampat tahta lainnya, ada dua puluh ampat pamimpin-pamimpin duduk kaꞌ atas tahta-tahta koa. Ia kaꞌ koa bapakean putih man kajah bamahkota amas kaꞌ kapalanya. 5 Dari tahta Raja koa kaluar selak man bunyi guntur nang kuat, man kaꞌ depan tahta koa ada tujuh obor nang nyala; koalah katujuh roh dari Allah. b 6 Man kaꞌ adapatn tahta koa kateleꞌatn lea lautan kaca calikng lea kristal. Kaꞌ sakulilikng tahta, kaꞌ tiap sisinya, ada ampat mahluk nang panuh man mata bagian depan man bagian balakangnya.c d 7 Mahluk nang pamulaꞌatn kateleꞌanan lea singa. Nang kadua lea sapi nanglaki. Nang katalu bamuha lea muha talino. Nang kaampat kateleꞌanan lea burukng bindalu nang tagah tarabakng. 8 Kaampat mahluk koa kajah baseap anam, sakulilikngnnya man kaꞌ sabalah dalapmnya panuh man mata. Siakng malaman mahluk-mahluk koa inaꞌ baranti-barantinya barenyah:“Kudus, kudus, kuduslah Allah, nang Mahakuasa;
nang ada, nang dah ada, man nang ada satarusnya.”e
9 Kaampat mahluk koa ngenyahan lagu-lagu pujian, menghormatiꞌ man basukur kaꞌ Ia nang duduk kaꞌ tahta koa, yakoa Ia nang idup untuꞌ salama-lamanya. Man kaꞌ waꞌtu mahluk-mahluk koa barenyah, 10 kadua puluh ampat pamimpin-pamimpin koa tasungkapm kaꞌ adapatn Urakng nang duduk kaꞌ tahta koa, lalu nyambah Ia nang idup salama-lamanya. Lakaꞌ koa, ia kaꞌ koa ngalakaꞌatn mahkota-mahkota nya kaꞌ koa kaꞌ depan tahta koa sarata ugaꞌ bakata,
11 “Ya Tuhan, ya Allah kami! Kitaꞌ ihanlah nang layak narimaꞌ pujian, hormat man koasa. Tagal Kitaꞌlah nang nampaꞌ sigananya, man atas kamaoꞌan Kitaꞌ ugaꞌlah sigananya koa dinampaꞌ man tetap ada.”