Pasatn Yesus untuꞌ jamaat kaꞌ Sardis
3:1-6
3
“Untuꞌ malaekat jamaat kaꞌ Sardis, tulisatnlah lea nian:Nianlah pasatn dari Ia nang ngampuꞌ tujuh roh mpat kaꞌ Allah man tujuh bintakng koa: Aku naꞌuan ahe nang di kitaꞌ panjawat. Katanya kitaꞌ idup, sabatolnya kitaꞌ mati! 2 Tagal koa, lumpatlah dari kamatiatn kitaꞌ! Kapucayaꞌatn kitaꞌ amper mati, kuatatnlah ahe nang masih ada kaꞌ kitaꞌ sanapeꞌ koa batol-batol mati. Barang Ku neleꞌ inaꞌ soteꞌpun dari pakarajaꞌatn kitaꞌ nang pas man kamaoꞌan Allah-Ku. 3 Tagal koa, ingatlah ahe nang dah di ngajaratn kaꞌ kitaꞌ man ahe nang dah dikitaꞌ nangngar. Turutiꞌlah koa man barantilah manjawat dosa! Kadeꞌ kitaꞌ inaꞌ lumpat dari kamatiatn kitaꞌ, Aku atakngngaꞌ lea pangalit. Man kitaꞌ inaꞌ nauꞌan kamile waꞌtunya, Aku tiba-tiba atakng kaꞌ kitaꞌ.a 4 Tapi kaꞌ tangah-tangah kitaꞌ kaꞌ Sardis masih ada urakng nang inaꞌ ngotoriꞌ diriꞌnya man dosa. Ia kaꞌ koa bajalatnnaꞌ sama-sama man Aku man pakean putih, tagal ia kaꞌ koa pantas untuꞌ koa.
5 Sae nang manang kaꞌ ia dipakeatnnaꞌ pakean putih sama lea ia kaꞌ koa. Aku inaꞌ ngapusaꞌ damanya dari kitap kaidupatnb, man Aku ngakoꞌiꞌaꞌ damanya kaꞌ adapatn Apaꞌ-Ku man malaekat-malaekat-Nya.c
6 Sae nang batarenyekng, aruslah ia nangaratn ahe nang di Roh Kudus ngataatn kaꞌ jamaat-jamaat.”
Pasatn Yesus untuꞌ jamaat kaꞌ Piladelpia
3:7-13
7 “Untuꞌ malaekat jamaat kaꞌ Piladelpia, tulisatnlah lea nian:
Nianlah pasatn dari Ia Nang Kudus man Nang Banar. Ia lah nang nyingiꞌiꞌ kunci Karajaan nang di raja Daut ngampuꞌd; kadeꞌ Ia mukaꞌ, inaꞌ saurakngpun nang baya nutupnya, man kadeꞌ Ia nutupnya, inaꞌ saurakngpun nang baya mukaꞌnya:e 8 Aku nauꞌan sigana ahe nang dah di kitaꞌ manjawat. Aku nauꞌan kadeꞌ kitaꞌ inaꞌ sangahe kuat; tapi kitaꞌ dah nurutiꞌ ajaran-Ku man satia kaꞌ Aku. Teleꞌlah! Untuꞌ kitaꞌ dah Ku mukaꞌatn sabuah pintu nang inaꞌ baya di tutup di saepun ugaꞌ. 9 Dangngarlah nian: Urakng-urakng nang jaji umat Ibalis koa, pangalok-pangalok nang ngakoꞌiꞌ diriꞌnya Yahudi padahal bukeꞌ Ku buataꞌ sampe-sampe ia kaꞌ koa atakng basujut kaꞌ adapatn kitaꞌ. Man ia kaꞌ koa nauꞌanaꞌ kadeꞌ Aku ngasihiꞌ kitaꞌ.f 10 Tagal kitaꞌ dah nurutiꞌ pakataatn-Ku, untuꞌ satia ngantiꞌatn Aku, jaji Akupun ngalinukngiaꞌ kitaꞌ dari kasingsaraatn nang atakngngaꞌ kaꞌ dunia untuꞌ nyobaiꞌ ia kaꞌ koa nang badiapm kaꞌ saluruh aiꞌ tanah. 11 Inaꞌ lama agiꞌ Aku atakngngaꞌ. Kitaꞌ arus tatap pucayaꞌ kaꞌ Aku, biar inaꞌ saurakngpun nang naap mahkota, adiah kamanangannyu.
12 Sae nang manang, Ku jajiatnnaꞌ tihakng kaꞌ dalapm Rumah Allah-Ku, man ia badiapmaꞌ kaꞌ tampat koa salama-lamanya. Dama Allah-Ku, man dama kota Allah-Ku, yakoa Yerusalem baharu nang turutnaꞌ mpat kaꞌ saruga dari Allah-Ku, Ku contengannaꞌ kaꞌ diriꞌ urakng koa. Ugaꞌ dama-Ku nang baharu Ku contengan kaꞌ diriꞌnya.g
13 Sae nang batarenyekng, aruslah ia nangngaratn nang di Roh Kudus ngataatn kaꞌ jamaat-jamaat.”
Pasatn Yesus untuꞌ jamaat kaꞌ Laodikia
3:14-22
14 “Untuꞌ malaekat jamaat kaꞌ Laodikia, tulisatnlah lea nian.
Nianlah pasatn dari Ia, nang nyabut Amin. Ia lah saksi nang satia nang madahatn kabanaran tentang Allah, man lewat Ia lah Allah nampaꞌ sigananya: 15 Aku nauꞌan ahe nang dikitaꞌ manjawat; Aku nauꞌan kitaꞌ inaꞌ dingin, inaꞌ ugaꞌ angat. Saarusnya kitaꞌ dingin ato angat. 16 Tapi tagal kitaꞌ satangah ati jaꞌ pucayaꞌ kaꞌ Aku, inaꞌ dingin tapi inaꞌ ugaꞌ angat, jaji aku nulakaꞌ kitaꞌ. 17 Kitaꞌ bakata, ‘Kami kaya saraba cukup; kami inaꞌ kakurangan ahe-ahe.’ Tapi kitaꞌ inaꞌ nauꞌan, sidi malarat man malangnya keadaan kitaꞌ, kitaꞌ kodo, butaꞌ man baranjong. 18 Tagal koa Aku nasehatiꞌ kitaꞌ biar kitaꞌ mali amas kaꞌ Aku, amas murni, biar kitaꞌ jaji kaya. Balilah ugaꞌ pakean putih kaꞌ Aku biar kitaꞌ bapakean, biar kitaꞌ inaꞌ marasa tabeꞌ tagal urakng neleꞌ kitaꞌ baranjong. Man malilah ugaꞌ obat mata, biar mata kitaꞌ baya neleꞌ. 19 Urakng-urakng nang Ku-ngasihiꞌ, ia Ku-beraatn man Ku-tagur. Tagal koa aruslah kitaꞌ sidi-sidi, man batobatlah.h
20 Teleꞌ! Aku badiri kaꞌ depan pintu man narodok. Kadeꞌ ada urakng nang nangngar suara-Ku man mukaꞌatn pintu, Aku tamaꞌaꞌ namuiꞌ ia man makatn sama-sama man ia.
21 Sae nang manang, Kuijinannaꞌ duduk kaꞌ tahta-Ku sama-sama man Aku, sama lea Aku dah manang man ampeatn duduk man Apaꞌ-Ku kaꞌ tahta-Nya.
22 Sae nang batarenyekng, aruslah ia nangaratn ahe nang di Roh Kudus ngataatn kaꞌ jamaat-jamaat.”