Pasatn Yesus untuꞌ jamaat Epesus
2:1-7
2
Saurakng nang lea Anak Talino koa bakata kaꞌ aku, “Tulisatnlah untuꞌ malaekat jamaat Epesus lea nian:Nianlah pasatn dari Ia nang mampautiꞌ tujuh bintakng kaꞌ kokot kanan-Nya, man bajalatn kaꞌ antara katujuh paha lampu amas koa: 2 Aku nauꞌan ahe nang kitaꞌ manjawat, kitaꞌ bakaraja karas man kitaꞌ sidi sabar kaꞌ kasingsaraatn. Aku nauꞌan kadeꞌ kitaꞌ inaꞌ mareꞌ ati kaꞌ urakng jahat. Man urakng-urakng nang ngakoꞌ diriꞌnya rasul sabanarnya bukeꞌ, kadeꞌ kitaꞌ dah nguji ia kaꞌ koa, man kitaꞌ namuiꞌ ia kaꞌ koa pangalok. 3 Kitaꞌ tatap sabar man singsara tagal dama-Ku; man kitaꞌ inaꞌ nganal latih. 4 Tapi soteꞌ hal nang manjawat Aku kacewa kaꞌ kitaꞌ, kitaꞌ inaꞌ agiꞌ ngasihiꞌ Aku lea waꞌtu kitaꞌ baruꞌ pucayaꞌ kaꞌ Aku. 5 Tagal koa, ingatlah sidi dah jauh kitaꞌ jantuꞌ! Batobatlah dari dosa-dosa kitaꞌ, man panjawatlah ahe nang kitaꞌ panjawat samula. Kadeꞌ kitaꞌ inaꞌ batobat, Aku atakngngaꞌ kaꞌ kitaꞌ man naap paha lampu kitaꞌ dari tampatnya. 6 Tapi nian kabaikatn nang kitaꞌ manjawat, kadeꞌ kitaꞌ busak kaꞌ sigana ahe nang di pangikut-pangikut Nikolaus panjawat, Aku ugaꞌ busak kaꞌ cara idup nang jahat koa.
7 Sae batarenyekng, aruslah ia nangngaratn ahe nang di Roh Kudus ngataatn kaꞌ jamaat-jamaat:
Sae nang manang, ia Ku bareꞌaꞌ makatn dari puhutn kaidupatn nang ada kaꞌ Taman Pirdaus Allaha.” b
Pasatn Yesus untuꞌ jamaat Smirna
2:8-11
8 “Untuꞌ malaekat jamaat Smirna, tulisatnlah lea nian:
Nianlah pasatn dari Ia nang Pamulaꞌatn man nang Pangabisatn, nang dah mati man mulakng idup:c 9 Aku nauꞌan kasusahatn-kasusahatn kitaꞌ, man Aku nauꞌan kitaꞌ kodo tapi sabatolnya kitaꞌ kaya! Aku nauꞌan tuduhan-tuduhan nang alok-alok nang di nujuatn kaꞌ kitaꞌ di urakng-urakng nang ngakoꞌ diriꞌnya Yahudi, sabanarnya bukeꞌ; ia kaꞌ koalah umat Ibalis! 10 Amelah galiꞌ kaꞌ kasingsaraatn nang inaꞌ lama agiꞌ kitaꞌ arus alamiꞌ. Dangngar boh, Ibalis namaꞌanaꞌ sabagian dari kitaꞌ kaꞌ dalapm pinjara untuꞌ nyobaiꞌ kitaꞌ. Kitaꞌ singsaraaꞌ sapuluh ari lamanya. Aruslah kitaꞌ satia kaꞌ Aku sampe mati, lalu Aku mareꞌaꞌ kaꞌ kitaꞌ idup salama-lamanya untuꞌ adiah kamanangan.
11 Sae batarenyekng, aruslah ia nangngaratn ahe nang di Roh Kudus ngataatn kaꞌ jamaat-jamaat:
Sae nang manang, ia inaꞌ singsaraaꞌ ahe-ahe kaꞌ kamatiatn nang kadua.” d
Pasatn Yesus untuꞌ jamaat Pergamus
2:12-17
12 “Untuꞌ malaekat jamaat Pergamus, tulisatnlah lea nian:
Nian pasatn dari Ia, nang make pedang nang tajapm man bamata dua: 13 Aku nauꞌan diꞌmae kitaꞌ badiapm, yakoa kaꞌ tampat Ibalis marentah. Tapi kitaꞌ tatap satia kaꞌ Aku, kitaꞌ inaꞌ suah baranti pucayaꞌ kaꞌ dama-Ku. Bahkan takaꞌ Atipas saksi-Ku nang satia dimunuh. 14 Tapi sangahe hal nang manjawat Aku kacewa kaꞌ kitaꞌ, kaꞌ antara kitaꞌ ada basangahe urakng nang nganut ajaran Bileam, nang mareꞌ nasehat kaꞌ Balak untuꞌ nyasatatn urakng Israel, biar ia kaꞌ koa makatn makanan nang dah di maremahan kaꞌ berhala man manjawat kalakuan-kalakuan nang cabul.e 15 Lekoa ugaꞌ ada kaꞌ antara kitaꞌ urakng-urakng nang mampautiꞌ ajaran pangikut Nikolaus. 16 Tagal koa, batobatlah dari dosa-dosa kitaꞌ! Kadeꞌ inaꞌ, Aku atakngngaꞌ kaꞌ kitaꞌ man Aku marangiaꞌ ia kaꞌ koa man pedang dari molot-Ku nian.
17 Sae batarenyekng, aruslah ia nangngaratn ahe nang di Roh Kudus ngataatn kaꞌ jamaat-jamaat:
Sae nang manang, kaꞌ ia Ku bareꞌaꞌ manna nang di nosokatn; man Aku mareꞌatnnaꞌ kaꞌ ia batu putih, nang kaꞌ atasnya taconteng dama baharu, nang inaꞌ di saepun tauꞌatn, kahe di nang narimaꞌnya.”f
Pasatn Yesus untuꞌ jamaat Tiatira
2:18-29
18 “Untuꞌ malaekat jamaat Tiatira, tulisatnlah lea nian:
Nianlah pasatn dari Anak Allah nang mata-Nya lea nyala api man paha-Nya lea timaga: 19 Aku nauꞌan sigana pakarajaatn kitaꞌ: Baik kasih kitaꞌ maoꞌpun iman kitaꞌ, baik palayanan kitaꞌ maoꞌpun kasabaran kitaꞌ kaꞌ kasingsaraatn. Aku nauꞌan kadeꞌ pakarajaatn kitaꞌ nang ampeatn labih manyak dari pada nang pamulaꞌatn. 20 Tapi soteꞌ hal nang manjawat Aku kacewa kaꞌ kitaꞌ, jukut kitaꞌ miaratn Isebel, nangbini nang ngakoꞌ diriꞌnya nabiah, ngajar man nyasatatn amba-amba-Ku biar manjawat nang cabul man makatn makanan nang dah di paremahan kaꞌ berhala.g 21 Aku dah mareꞌnya waꞌtu untuꞌ batobat, tapi ia baiꞌ batobat dari hal-hal nang cabul koa. 22 Ingatlah! Aku nabakatnnaꞌ ia kaꞌ tampat tidur urakng sakit. Diꞌkoa ia man urakng-urakng nang babayaꞌ man ia, sidi singsaraaꞌ. Samuanya koa Ku panjawataꞌ ampeatn, kacoali kadeꞌ ia kaꞌ koa sama-sama baranti manjawat hal-hal nang jahat. 23 Aku munuhaꞌ urakng-urakng nang nunaꞌannya biar jamaat samua nauꞌanaꞌ kadeꞌ Akulah nang nguji pikiran man isiꞌ ati urakng. Aku malasaꞌ kaꞌ samua urakng masing-masing nurut ahe nang nya panjawat.h 24 Tapi kaꞌ kitaꞌ, urakng-urakng lain kaꞌ Tiatira, nang inaꞌ nunaꞌan ajaran koa man inaꞌ nyalidikiꞌ ahe nang di nya kaꞌ koa nyabut ilamu-ilamu Ibalis, kaꞌ kitaꞌ Aku bakata: Aku baiꞌ nanggongannaꞌ beban lain kaꞌ kao. 25 Tapi tataplah mampautiꞌ kabanaran nang kitaꞌ ngampuꞌ sampe Aku atakng.
26 Sae jaꞌ nang manang man sae jaꞌ nang manjawat ahe nang Ku maoꞌiꞌ sampe pangabisatn dunia, Aku mareꞌaꞌ koasa kaꞌ ia kaꞌ koa untuꞌ marentah bangsa-bangsa lain. 27 Ia kaꞌ koa marentahaꞌ bangsa-bangsa koa man tungkat basi, sampe bangsa-bangsa koa di ngancuratn lea kawah dari tanah liat. Ia kaꞌ koa ngampuꞌaꞌ kuasa lea nang Ku narimaꞌ dari Apaꞌ-Ku.i 28 Aku mareꞌaꞌ ia kaꞌ koa Bintakng Timur.
29 Sae batarenyekng, aruslah ia nangngaratn ahe nang di Roh Kudus ngataatn kaꞌ jamaat-jamaat.”