Dasar-dasar pangajaran nang banar
2:1-10
2
Tapi kao, Titus, aruslah kao ngajaratn ajaran nang tapat. 2 Nanglaki nang dah tuha aruslah idup inaꞌ suka kamabuk, sampe ia kaꞌ koa jaji urakng nang patut dihormatiꞌ man baya ngoasaiꞌ diriꞌ. Ia kaꞌ koa arus mampautiꞌ ajaran nang banar, sidi-sidi ngasihiꞌ page samadiꞌatn sakapucayaꞌatn, man kuat batahan waꞌtu ngadapiꞌ kasusahatn. 3 Ajariꞌlah ugaꞌ nangbini-nangbini nang labih tuha biar bakalakuan baraseh, inaꞌ pane molot man panyabut urakng, man inaꞌ panyocok arak. Ia kaꞌ koa arus ngajaratn hal-hal edoꞌ, 4 biar man hal koa ia kaꞌ koa baya ngajariꞌ nangbini-nangbini mudaꞌ untuꞌ ngasihiꞌ laki man anak-anaknya. 5 Ia kaꞌ koa arus idup bijaksana, idup suci, rajitn ngurus rumah tangaꞌ, baik ati, man tunduk kaꞌ lakinya. Man hal koa, inaꞌ ada urakng nang baya majahat pakataatn Allah. 6 Lekoa ugaꞌ nasehatiꞌlah urakng-urakng mudaꞌ biar ia kaꞌ koa idup bijaksana 7 dalapm samua hal, aruslah kao jaji conto mareꞌ kalakuan nang edoꞌ. Kadeꞌ kao ngajar, kao arus jujur man sidi-sidi. 8 Pakelah kata-kata nang bijaksana, biar inaꞌ diolekiꞌ urakng, biar lawan-lawannyu jaji tabeꞌ. Tagal inaꞌ ada hal-hal jahat nang baya dinya kaꞌ koa kataatn tentang diriꞌ. 9 Amba ulutn arus tunduk kaꞌ tuannya, man ngarepoatn atinya kaꞌ dalapm samua hal. Ia kaꞌ koa inaꞌ mulih ngalawan 10 ato ngalit. Aruslah ia kaꞌ koa neleꞌatn kadeꞌ ia kaꞌ koa gia basikap edoꞌ man setia, biar man sikap nya kaꞌ koa urakng muji ajaran tentang Allah, Panyalamat diriꞌ.Kasalamatan kahe dari Allah
2:11-15
11 Tagal Allah dah neleꞌatn kabaikatn ati-Nya, Ia mareꞌ maraga untuꞌ samua urakng biar salamat. 12 Lewat kabaikatn ati-Nya koalah, Allah ngajariꞌ diriꞌ ningalatn kajahatatn man kainginan-kainginan duniawi man biar diriꞌ idup bijaksana, adil man baibadah kaꞌ dalapm dunia ampeatn nian. 13 Ampeatn diriꞌ tagah sidi karepoatn ngantiꞌatn ari nang diriꞌ ngarap-ngarapatn koa. Kaꞌ ari koa dunia neleꞌaꞌ kamuliaatn Yesus Karistus, Ia koa Allah nang sidi luar biasa man Raja Panyalamat diriꞌ. 14 Ia dah nyarahatn diriꞌ-Nya untuꞌ mebasatn diriꞌ dari samua kajahatatn, man nyajiatn diriꞌ umat nang bebas dari dosa man nang jaji ampuꞌ-Nya ihan, nang rajitn babuat hal nang edoꞌ.a 15 Koalah hal-hal nang arus nyu sampeatn kaꞌ jamaat. Babalah ia kaꞌ koa ngikutiꞌ hal-hal koa. Kadeꞌ ia kaꞌ koa inaꞌ taat, tagurlah. Kao ngampuꞌ kuasa panuh untuꞌ manjawat hal koa, jaji ame biaratn saurakngpun nganggap kadeꞌ ia kaꞌ koa bisa inaꞌ maduliatn kao.