Pasatn-pasatn panutup
3:1-14
3
Ingatiꞌ ugaꞌ ia kaꞌ koa biar tunduk kaꞌ pamarentah man urakng-urakng nang bakuasa, ngasiꞌ man siap untuꞌ manjawat satiap pakarajaatn nang baik. 2 Sampeatn kaꞌ ia kaꞌ koa biar ame majahat urakng lain, tapi arus idup badame man samua urakng. Ia kaꞌ koa ugaꞌ arus lemah lembut man ngarah-ngarah kaꞌ tiap urakng. 3 Tagal doloꞌnya diriꞌpun urakng baga nang inaꞌ ngasiꞌ kaꞌ Allah. Diriꞌ sasat man tarikat di bamacam-macam kainginan nang kahe ngarepoatn tubuh jasmani. Diriꞌ ugaꞌ panuh man rusiꞌ ati man rancana jahat. Urakng-urakng teget kaꞌ diriꞌ, man diriꞌ teget kaꞌ ia kaꞌ koa. 4 Tapi Allah panyalamat diriꞌ nojokatn kasih man kabaikatn ati-Nya kaꞌ diriꞌ, 5 Ia nyalamatatn diriꞌ, bukeꞌ tagal diriꞌ dah manjawat hal-hal nang baik, tapi tagal Ia babaro ngasihiꞌ diriꞌ. Ia nyalamatatn diriꞌ lewat Roh Kudus, nang mareꞌ diriꞌ kalahiran baharu man idup baharu man cara marasehatn diriꞌ. 6 Allah mareꞌatn Roh-Nya kaꞌ diriꞌ, lewat ahe nang dah di Yesus Karistus manjawat, Ia koa Raja Panyalamat diriꞌ, 7 barang Ia dah nojokatn kabaikatn ati-Nya, sampe diriꞌ urakng nang dah dingangap banar kaꞌ adapatn-Nya, bahak narimaꞌ idup nang salamanya pas man arapan diriꞌ. 8 Ajaran koa sidi banar. Man aku maoꞌ kao inaꞌ ragu-ragu ngajaratn samuanya koa, sampe urakng-urakng nang pucayaꞌ kaꞌ Allah sidi-sidi barusaha untuꞌ tarus manjawat hal-hal nang edoꞌ. Cara idup lekoalah nang pantas untuꞌ diriꞌ nang jaji pangikut Karistus man baguna untuꞌ talino. 9 Amelah ngalibatatn diriꞌnyu takaꞌ ada patangkaratn tentang ajaran Yahudi, misalnya kadeꞌ ia kaꞌ koa batangkar tentang dama-dama eneꞌ moyang ato tentang ukum Taurat. Patangkaratn macam koa inaꞌ baguna man kahe muang waꞌtu ihan. 10 Kadeꞌ ada urakng nang jaji panyabab pacahbalah kaꞌ dalapm jamaat, tagurlah sakali ato dua kali. Kadeꞌ ia inaꞌ barubah, amelah bagaul man ia. 11 Kao nauꞌan kadeꞌ urakng-urakng lea koa badosa man inaꞌ make ajaran nang banar. Dosa-dosa nya kaꞌ koa muktiatn kadeꞌ ia kaꞌ koa basalah.12 Aku ngiripmaꞌ Artemas ato Tikhikus kaꞌ kao. Waꞌtu salah saurakng dari ia kaꞌ koa atakng, aku sidi bapintaꞌ biar kao gance-ganceh atakng kaꞌ aku kaꞌ kota Nikopolis, tagal aku baniat badiapm kaꞌ naun salamaꞌ musim dingin.a 13 Basatiarlah sidi-sidi untuꞌ mantoꞌ Jenas, ahli ukum koa, man Apolos, biar ia kaꞌ koa bisa barangkat man inaꞌ kakurangan ahe-ahe.b 14 Diriꞌ nang jaji pangikut Karistus arus balajar kajah babantoꞌ man kaja siap manjawat hal nang baik kaꞌ waꞌtu mantoꞌ urakng lain nang sasak. Ame sampe idup diriꞌ inaꞌ baguna.
Salam pangabisatn
3:15
15 Salam dari samua urakng nang sama-sama man aku kaꞌ dian man sampeatn ugaꞌ salamku kaꞌ page samadiꞌatn nang sakapucayaꞌatn nang ngasihiꞌ kami. Kiraꞌnya Allah nojokatn kabaikatn ati-Nya kaꞌ kitaꞌ samuanya.