SURAT PAULUS UNTUꞌ
TITUS
Salam
1:1-4
1
Anakku Titus! Aku, Paulus, nyontengan surat nian jaji amba Allah man rasul Yesus Karistus. Aku dimilih man diutus untuꞌ mantoꞌ urakng-urakng pilihan Allah biar jaji kuat kaꞌ dalapm kapucayaꞌatn nya kaꞌ koa. Aku ugaꞌ arus ngirikng ia kaꞌ koa kaꞌ dalapm ajaran nang banar biar ia kaꞌ koa ngikutiꞌ kamaoꞌan Allah. 2 Ajaran koa dasarnya arapan kadeꞌ diriꞌ narimaꞌaꞌ idup nang sabatolnya man idup nang salamanya. Allah dah nyanjiatn idup koa sanapeꞌ pamulaꞌatn jaman man Allah inaꞌ mungkin alok-alok. 3 Kaꞌ waꞌtu nang di-Nya maoꞌiꞌ, Allah nantuatn biar Kabar Baik di talino tauꞌatn. Kabar Baik koa dah dimucayaꞌatn kaꞌ aku, man aku ngesahatnnya atas parentah Allah Panyalamat diriꞌ.4 Titus, kao banar-banar anakku, tagal kao man aku sama-sama dah pucayaꞌ kaꞌ Karistus. Aku badoꞌa kiraꞌnya Allah Apaꞌ diriꞌ man Karistus Yesus Raja Panyalamat diriꞌ neleꞌatn kabaikatn ati-Nya man mareꞌ idup nang panuh dame kaꞌ kao.a
Palayanan Titus kaꞌ Kreta
1:5-16
5 Aku ningalatn kao kaꞌ Kreta biar kao baya ngurus hal-hal nang masih palalu diatur. Ugaꞌ, biar kao ngangkat pamimpin-pamimpin jamaat kaꞌ tiap kota. Lea pasatnku kaꞌ kao. 6 Saurakng pamimpin jamaat aruslah saurakng nang bakalakuan edoꞌ; ia arus babini sekoꞌ man ia arus satia kaꞌ bininya koa, anak-anaknya arus dah pucayaꞌ kaꞌ Karistus, bukeꞌ anak-anak nang bandel man baiꞌ diatur.b 7 Pamimpin jamaat koa, urakng nang ngurus pakarajaatn Allah. Ia inaꞌ bakalakuan jahat. Ia inaꞌ mulih sombong ato pamera, ato pamabuk, ato suka bakalahi, ato mata duitan. 8 Saurakng pamimpin jamaat arus siap mantoꞌ urakng lain man narimaꞌ ia kaꞌ koa kaꞌ rumahnya. Ia arus kaja ngusahaatn nang paling edoꞌ untuꞌ samua urakng, bapikir tajapm, bakalakuan banar, sidi-sidi idup untuꞌ Allah, baya nguasaiꞌ diriꞌnya babaro. 9 Saurakng pamimpin jamaat arus satia ngikutiꞌ ajaran nang diriꞌ ngajaratn, biar ia bisa mantoꞌ urakng-urakng man ajaran nang banar, man nojokatn kasalahatn urakng-urakng nang nantakngnya.
10 Tagal ada manyak urakng nang baiꞌ taat, ia kaꞌ koa ngalokiꞌ urakng lain man omongan nang kosong. Tarutama urakng-urakng nang tadinya baagama Yahudi, ia kaꞌ koa nang ngataatn kadeꞌ samua nanglaki arus dibalak. 11 Urakng-urakng lea koa arus ditutup molotnya, tagal ia kaꞌ koa ngacauwatn manyak kaluarga man ajaran nang inaꞌ-inaꞌ. Ia kaꞌ koa manjawat koa kahe tagal maoꞌ ngagoꞌ untukng nang inaꞌ pantas! 12 Saurakng nang di nya kaꞌ koa ngangap nabi urakng Kreta, ugaꞌ bakata: “Urakng-urakng Kreta gia pangalok, man lea laok nang ganas nang dirangkaꞌ man pamalas.” 13 Kasaksian koa ingkaꞌ banar. Koa tagalnya kao nagur ia kaꞌ koa arus sidi-sidi karas; biar ia kaꞌ koa tatap pucayaꞌ kaꞌ ajaran nang banar, 14 man inaꞌ agiꞌ mampaut kaꞌ curita-curita alok Yahudi ato paraturan-paraturan nang dimanjawat di urakng-urakng nang nolak ajaran nang banar koa. 15 Sigana hal baraseh untuꞌ urakng-urakng nang atinya baraseh. Tapi untuꞌ urakng-urakng nang bapikiran kotor man inaꞌ pucayaꞌ kaꞌ Tuhan, inaꞌ ada soteꞌ hal pun nang baraseh, tagal pikiran man ati nya dah kotor! 16 Ia kaꞌ koa ngakoꞌ nganal Allah, tapi kalakuannya kaꞌ koa inaꞌ muktiatn hal koa. Ia kaꞌ koa nolak untuꞌ ngasiꞌ kaꞌ Allah man inaꞌ mampu manjawat hal nang baik. Allah busak kaꞌ cara idup nya kaꞌ koa.