Bagbɛga, baganda, bakɔbɛ, tambea abɔ ábɛ tɔ anja
2
1 Obɛ gǎkɛ, óphangiaga tɔ bakpa kodoni ndea Mokonga.2 Ongodeaga baphomi á boko gea,
bákanoɛ mɔnɔ makana ási,
bátambeɛ bíndɔ bakpa bɔbhu bákondi,
bábɛ batɔa-ɛngɛpha na babeeki akpɛ ka Mokonga,
bábɛ batɔ-ékondani na phiphia.
3 Ongodeaga phɔtɔ baphomi á bake gea, bátambeɛ bíndɔ Mokonga akondi.
Nga, bákangiɛ mɔnɔ k'ekingi á batɔa-maca,
bákabɛ́ mɔnɔ bakɔbɛ á makana.
Bamponjɔ á bake békondɛ gǎkɛ bamunyabɔ na banabɔ.
5 Bábɛ phɔtɔ batɔa-ɛngɛpha, kanga á nkiki ka měma abɔ.
Bátɔtɔkisɛ anja ekuma nɛbɔ k'endu.
Bégeeɛ badhabɔ anja.
Bébangɛ bamunyabɔ.
Ande ka gea, bakpa bákatɛbhɛɛgɛ mɔnɔ nyɔngɔ á Mokonga.
Ande ka gea, bakpa bákatɛbhɛɛgɛ mɔnɔ nyɔngɔ á Mokonga.
N'obɛ phɔtɔ, óbɛ mphaniɔ anja k'ekuma nɛkɔ. Ka phangiaga nɛkɔ, gea tɔ bo na měma moti, na měma á kodoni. 8 Yɔnga tɔ doni, nnde bákáyɛku. Bondɔ unge okuisande batɔa-kampápa na soni. Mbusai, bákásɔyɔngɛɛku ye nyɔngɔ ajede.
9 Ophangiaga bakɔbɛ gea, bébangɛ bakɔta nɛbɔ ka nyɔngɔ bhui. Ekuma nɛbɔ, ɛ́bɔngɛɛ phɔtɔ bakɔta nɛbɔ ka gea, bákabɛ́ mɔnɔ na kampápa. 10 Bákěubiɛ mɔnɔ bakɔta nɛbɔ, béphangiɛ sasa abɔ gea, bánde batɔa-doni. Mpɔ, bakɔbɛ ndɔ, béubhisande bakpa ka tambea abɔ gea, bɔphɛi á Namisi nɛsu Mokonga, a anja phɛ̂.
11 Eya, Mokonga asóphangi bonjánja ékondi nɛkɛ, nande cina á boamia ka bakpa bɔbhu. 12 Bonjánja ékondi ndɔ ungɔ, asóphangisi ya á kema ajede, na deketa á kaba a kema á jái-jái á ka mokonda. Mpɔ, bɛ́ɔɔngɛpha, kanga á maibhe, nndɔ ungɔ aɔmbɔngɛa Mokonga ka matu nde. 13 Beogea bo ka nyɔngɔ nde, besebei esa á maseye, nabande esa á kidia á Mokonga, mɛna-mokonda, na Namisi nɛsu Kiísito Yéso. Bájuande phɔtɔ na boombia nɛbɔ. 14 Yéso Kiísito ámbé dásokui ka tokisa asu ka bojede bhui, áosógaia ka ye gea, bébɛ k'ekuna nɛkɛ, béoba na moingi ka gea á kema anja.
15 Cɔ, kema nde ophangiagande a unge: Ɔphɛa, ókeɛ phɔtɔ, na kɔkɔta nde Mokonga akophi. Nkpa kakɔbɛɛnjiɛgɛ mɔnɔ.