Tambea á kɛkɛ ndea babeeki
3
1 Cɔ, úubhisa goto babeeki gea te, bébangɛ bakɔta na baamɛ nɛbɔ. Ekuma bhui nde a anja, bábeekeɛ ka bhɛdanagai. 2 Bákancɛmbɛ nkpa, bákasanɛmbɛ. Bábɛ ndiu batɔ-aphɔngɔ, bunde báokaba bɔjɛjɛ ka bakpa bɔbhu.
3 Nga, mosa á beekea á Yéso, besu bɔbhu débékéubhi nyɔngɔ á Mokonga. Nga, débeye beekea á nkpa, béoba batɔ-ódhemayɔ, bê phɔtɔ oba bakɔbɛ á kema bhui, nnde dásɔbɔngɛi. Tambea asu áoba ajede esa bhui, béoba na maibhe-maibhe, na ngini. Béokangeana ngungu asu.
4 Mpɔ, Namisi nɛsu Mokonga, â gǎkɛ osóphangia bonjánja n'ekondi nɛkɛ, 5 áosóamisa ka měma. Nna gǎkɛ ka nyɔngɔ á bonjánja ékuma nɛsu unge agi bo, a ndiu osóamisa k'aphe óbatisɔ na bii Měma akɛ asóbhisi měma á kɛkɛ.
6 Nga, ka nyɔngɔ á Yéso Kiísito, Namisi nɛsu, Mokonga dásophi Měma akɛ. Béoba na bukpɛkpɛ ángbó nɛkɛ. 7 Mokonga agi bo ka bonjánja ékondi nɛkɛ, ka gea, bébɛ batɔa-bonjánja mosa akɛ, bɛ́tɔɛ botukɔ nɛkɛ, nande enda á mɛyɔ.
8 Cɔ, Títɔ, tetemisa nyɔngɔ ndɔ bhui. Nekondi phɔtɔ óphangiɛgɛ phɛ̂ babeeki kema ndɔ bhui, na moingi nɛkɔ. Mpɔ, babeeki, báoikia tutuisa ékuma anja ka Mokonga.
Nyɔngɔ ndɔ bhui a goto anja na na kantiti ka bakpa bɔbhu.
9 Obangisa gǎkɛ na nyɔngɔ nde nna na kantiti, bea bikisa sani, kaba ína á batatabɔ bhui, na yɔngaga ási ka nyɔngɔ ɛ́ɔphi ndea Mósa. Nndɔ nna na kantiti, a tɔ jái.
10 Cɔ, nkea mɔngɔ ibɛ mmbe aókatisana baKiísito na bɔphɛi nɛkɛ ajede. Nakábeeki ye, mbeaga. 11 Nga, uubhande te, ntɔa-bojede ndɔ abungigi, á phɔtɔ uubhau sasa akɛ.
Mɔkɔ
12 Cɔ, nesǒokotekisia Aatɛ́ma, kabɛ Tukíkɔ. Kamisaga gǎkɛ dhonda ani ka Nikɔpɔ́li. Nga, nekondi ika ko ka matu á bɛjɔ.
13 Bii Apɔ́lɔ na mamei-nyɔngɔ Jɛ́na báɔmɛa tamba, óopha mpimbɔ.
14 Bakpa nɛsu bágoɛgɛ phɔtɔ gea anja ka bundɔ bána na kema. Mpɔ bakpa nɛsu bákátambeɛku jái-jái.
15 Bundɔ bá kimoti n'eme, bákosesi.
Oseseɛ badhasu baKiísito bɔbhu.
Cɔ, bonjánja ékondi ndea Mokonga, ábɛ na benu bɔbhu.