Títɔ 1

Baobá́ ndea Pɔ́lɔ ka

Títɔ

Nsesɔ

1 Dhani Títɔ, samba!

Eme Pɔ́lɔ, ndundu á baobá́ nde, nende mbhɛdanigi nde ba Mokonga na nteki nde ba Yéso Kiísito.

Ekuma nɛmɔ ande: bhɛda á bundɔ Mokonga ɛ̌sɔmbu, botea abɔ ka beekea, na ubhisa abɔ bɔphɛi á doni. Mpɔ, báuubha tambea anja, 2 báosebea enda á mɛyɔ. Nga, Mokonga, mmbe nnaɔyɔnga mbɛa, dáɔku nndɔ mosa á conja á mokonda. 3 Mbenɔ nde dábhisi, dámophangi bhase, nyɔngɔ nɛkɛ, nande subi á bɔphɛi ndɔ dámopi. Ande gea te, nɛ̌tɔmiɛgɛ nyɔngɔ á Namisi nɛsu, ka beana na moangɔ ndea Mokonga.

4 Títɔ, miki nɛmɔ á ka měma doni, nekodundui baobá́ nde. Nga, bebeeki ka moangɔ moti.

Cɔ, Abhɛ Mokonga, na Kiísito Yéso, Namisi nɛsu, ákophɛ bonjánja na bɔjɛjɛ.

Moangɔ á bhisa a bagbɛga na baambi-kanisa

5 Cɔ, nekosagi ka Kɛɛ́tɛ ka gea, ɔ́gɔbɛ nyɔngɔ nde ajigi.

Obhisɛ phɔtɔ bagbɛga á kanisa ka nji bhui, bíndɔ dékososi mosa. 6 Ngbɛga á kanisa ábɛ bende:

Abɛ nkpa kanga á nyɔngɔ ajede gu akɛ.

Moko ábɛ tɔ na nke moti.

Banakɛ bábɛ babeeki, kanga á kitɔngi á tambea ajede, bundɔ bá phɔtɔ obea bɔphɛi ndea abhabɔ.

7 Nambi-kanisa, kabɛmbɛ na nyɔngɔ ajede. Nga, yɛ aoamba kanisa k'ina Mokonga.

Cɔ, kabɛmbɛ ntɔ-ébhebha,

ntɔ-ésuia,

ntɔa-boita,

ntɔa-etu,

ntɔa-maibhe-maibhe ka bangɔa.

8 Abɛ ndiu nsesi-bakɛni,

nkabi-bonjánja,

nteni nyɔngɔ anjanja,

ntɔa-doni,

mbangi-Mokonga,

ntɔa-ɛngɛpha.

9 Bɔphɛi á doni, nnde akeni ka beekea nɛsu, ángiɛ subi á mɛngɛ akɛ bíndɔ bemphangi. Mpɔ, áǒbhisa babeeki nɛkɛ k'aphe á doni, áotetemisa beekea nɛbɔ. A gǎkɛ ophangia bhase kampápa á bunde báokaba ketia á bɔphɛi nɛkɛ.

Dhakanisa á batɔa-kampápa

10 Cɔ, batɔa-kampápa bábiki phɛ̂. Báoya bɔphɛi á doni, báophangiaga jái-jái, bâ phɔtɔ ǒdhemaga bakpa. Ka bɔ, batɔa-k'ekuna á baYúdha bábiki. 11 Cɔ, ambe dhakanisa abɔ. Nga, báophanja ekombo bhui na bɔphɛi nɛbɔ ajede. Bâ phɔtɔ okaba bangɔa ka bɔphɛi nɛbɔ, nande á soni.

12 Nga, mɔtu-nyɔngɔ moti ntɔa-ka Kɛɛ́tɛ agi: «BaKɛɛ́tɛ bánde batɔa-mbɛa, bamabhianga, bakákutɛ, bautu.» 13 Cɔ, ande doni akɛ. Ka bondɔ, ókeɛ akpɛ phɛ̂. Mpɔ, bábeekeɛ bɔphɛi á doni, 14 báodoa egani étiti ndea baYúdha, báoya ɛɔphi ndea batɔa-kampápa.

15 Cɔ, mmbe a na měma anja mosa á Mokonga, kabangɛmbɛ kema ésomba danga-danga, nga, kángɔnɛku. Ka bundɔ bána gǎkɛ na měma anja mosa á Mokonga, kema bhui ésomba aɔ́gɔna. Báujukani phɔtɔ ka měma na ka mɔ. 16 Bâ gǎkɛ ogea, bámǔbhi Mokonga. Bojede nde báogea, a gǎkɛ uubhisa gea, bánye. Nga, báogea bɔjɔɔkiɔ, báoya Mokonga, bána phɔtɔ uubha gea á kema anja.