Ekuma Ndea Bateki 20

Pɔ́lɔ agě ka Makɛdhɔnía na ka Ugiíki

1 Mbusa á sia á eongo bhubhui, Pɔ́lɔ áɔ̌bɔphana bagoigi, áǒgbagisaga ka měma. Mpɔ, áɔɔkɔana na bɔ, áoga na Makɛdhɔnía. 2 Bii dátú ɔtabanga ka nji ndɔ, dáɔ̌phɛa bagoigi nyɔngɔ ásii á gbagisaga á bɔ měma. Mbusa índɔ, áoga ka nji á baGiíki, 3 áoika kó ka basonge basaɔ. N'asǒokambea ka koko ka gǎ na Sulía, áɔɔka gea baYúdha báonca. Ka bondɔ, áosuia sikianaga k'aphe á Makɛdhɔnía. 4 Badhakɛ bundɔ dátambi na bɔ dábatú: Sɔpatɛ́i muna-Píɔ, ntɔa ka Bɛlɔ́ia, Aisitákɔ na Sɛkúndɔ batɔa ka Tɛsalɔníka, Gáyɔ ntɔa ka Dhɛ́ɛbhɛ, Timɔtɛ́ɔ na batɔa ka Asía babɛ, Tikíkɔ na Tɔɔphímɔ. 5 Bakpa ndɔ báoga mosá, báosóbondea na Tɔ́a. 6 Besu gǎkɛ béokambea ka koko ka Philípi, mbusa á maseye á mokati kanga á cacu. Mbusa á b'esa bɔku, béobhika odhondana na bɔ ka Tɔ́a, béoika kó pɔsɔ moci.

Pɔ́lɔ anjujukisi Ɛutíkɔ ka kukua

7 Esa á pɔsɔ ɔgɔgɔ, béodhondana ka eaga kimoci. Oa, bii dákondi mɛa á mama i, Pɔ́lɔ áobota bɔphɛi nɛkɛ na ka bii esa dángɛndi dhakɛ. 8 Ɔbhɛa ásii dáoola k'endu á gǔ ɔma nde débedhondanigi. 9 Kó, moganda moci ina akɛ Ɛutíkɔ dáiki ka boenga. Pɔ́lɔ áphɛa enda, tɔ̌ áɔmbhɛda Ɛutíkɔ phɛ̂. Bii tɔ̌ ndɔ am'bɔtei áosodokana ka boenga á k'endu á k' oisaɔ á gǔ. Báonsamboa n'aye ku. 10 Mpɔ, Pɔ́lɔ áodhidha, áǒnanoa gǔ á mǒnda akɛ, áonkotoa, áogea: «Bókoagatanɛmbɛ, aphɔ́tɔ koenda. » 11 Mbusa, Pɔ́lɔ â goto odapha, áoeaga. Áotutuisa boabhi na ka bii dágeojua ka mɔkɛsuɛ, mpɔ áoga. 12 Bâ gǎkɛ onjisa moganda ndɔ mɔtɛkɛ n'aoenda. Bakpa bɔbhu báoba na maseye phɛ̂.

Pɔ́lɔ atoki na Tɔ́a ka gǎ na Milɛ́tɔ

13 Besu gǎkɛ, dábege mosá, béokambea ka koko ka gǎ asu na Asɔ́si. Kó, dátokeni bémbhɛdɛ Pɔ́lɔ ka nyɔngɔ nde dásui gǎ n'ecinji. 14 Beju ye na Asɔ́si, béodhondana na Pɔ́lɔ, mpɔ áokambea ka koko, béoga na bɔ na Mitilɛ́nɛ. 15 Oa, béoga ka koko mama i, béokidia ka Kíɔ. Mama i goto, béokaia ka Samɔ́si na mama i, béokidia ka Milɛ́tɔ. 16 Oa, Pɔ́lɔ áosuia phoda á Ɛphɛ́sɔ kanga á mama nga, dákákondi iphia ka Asía, â ndiu okamisaga gea, kabɛ n'atɔki, ákidiɛ na Yɛusalɛ́ma k'esa á Pɛntɛkɔ́stɛ.

Pɔ́lɔ aɔɔkɔana na bagbɛga á kanisa á ka Ɛphɛ́sɔ

17 Cɔ, ka Milɛ́tɔ, Pɔ́lɔ áotekisa mbino ka ɔphana á bagbɛga á kanisa á ka Ɛphɛ́sɔ. 18 Bii dábaju ye bhíbhí akɛ, áǒngodea be: «Booúbha tambea ani ka mbenɔ bhui nde détú sɔsɔbɛ anu, kpanga á bii déju ka Asía. 19 Dɛ́ɔmbhɛdaneaga Mɔkɔta k'edhidhisa bhui, n'ibo á ngamɔ, subi á tambaga nde baYúdha dábaomotambisaga ka nyɔngɔ á maca nɛbɔ. 20 Boúbha gea, kɛ́nɔsɔmɛi tanda nyɔngɔ moci, nnde anókeni. Dɛ́nɔphɛi na goisaga ka ntanga, phɔtɔ subi á endu nɛnu. 21 Nɛ̌phɛi baYúdha na bunde báná baYúdha bhase gea, bákětiɛ tambea abɔ mosá á Mokonga na bám'beekeɛ Mɔkɔta nɛsu Yéso. 22 Cɔ, kɛ̌kɛ nde, Měma á Mokonga amososi gea négɛ na Yɛusalɛ́ma. Kéoúbha kema nde amogeeande kó. 23 Měma á Mokonga amoengekisi ndiu gea, ka kenombe bhui mɛkakɔ na tambisaga aomobondea. 24 Enda ani nna gǎkɛ na kantíti. Kema nnde ana kantíti k'eme ande gea négɔbeɛ ánja tamba na tɔtɔkisa ekuma nde Mɔkɔta Yéso dámopi gea, nɛ́phɛ̂ bhase Mbino Anja á bonjánja á ekondi ndea Mokonga. »

25 « Détú ɔphɛa nyɔngɔ á koboamɛ ndea Mokonga sɔsɔbɛ anu benu bɔbhu. Kɛ̌kɛ nde gǎkɛ, neoúbha te bɔ́kɔ́mɔɔnɛku ye. 26 Ka bondɔ, nenóngodi doni gae, kabɛ ká benu n'abungigi, nna ye nyɔngɔ nɛmɔ. 27 Nga, dɛ́nɔphɛi bhase mɔphɛ á Mokonga kánga sɔmɛanu u. 28 Cɔ, engani tambea anu sasanu n'inde á babeeki bɔbhu bundɔ Měma á Mokonga anóphi ka amba abɔ. Ambani kanisa ndea Mokonga nnde dásombi na magia akɛ sasakɛ. 29 Nga, neoúbha gea, mbusa á gǎ ani, bakpa bakae bea bamabhianga báěngisande sɔsɔbɛ anu, bákáekuiɛku babeeki ngomi. 30 Sɔsɔbɛ anu phɔtɔ, badhemigi bákidianande báɔyɔnga mbɛa na bootea á babeeki k'aphe nɛbɔ. 31 Cɔ, ɛngɛphani na bókóboseɛmbɛ gea ka basaga basaɔ keiphe n'esa dékédeketi phɛa ka nkpa sɔsɔbɛ anu na ibo á ngamɔ. »

32 « Kɛ̌kɛ nde, nenóbhisi ka njaga á Mokonga na mbino á bonjánja á ekondi nɛkɛ. Mokonga aámbé ana bukpɛkpɛ á gbagisaga anu ka měma na opha botukɔ nnde abhisi ka bakpa nɛkɛ. 33 Eme gǎkɛ, dɛ́kɛ́nɔmɛmigi tanda bangɔa, ɔ́lɔ, kabɛ bhɔngɔ ndea nkpa. 34 Bo ndiu oúbha gea, eme sasani dɛ́túɔbhɛdanaga ka tɔa á kema nde dámokeni, phɔtɔ na ka badhani. 35 Ka kema bhui nenóphangi gea bɔ́bhɛdanɛgɛ tɔ bó ka enga á bauki, bíndɔ Mɔkɔta Yéso yɛ sasakɛ asóngodi gea: «Maseye ásii á ka bagabhi kɔnyɛ́nya batɔi. »

36 Bii Pɔ́lɔ agɔbi ye yɔnga, báogbuka muanku abɔ bɔbhu, báɔmɛma Mokonga. 37 Bɔbhu báogama, báonkotoa Pɔ́lɔ, báɔɔkɔana na bɔ. 38 Báoba na ngomi ka měma abɔ phɛ̂ nga, dáyɔngi, bɔkɔmɔɔnɛ ku ye k'eme. Mbusa, báoga ɔmɔkɔa ka ikɔ.