Ekuma Ndea Bateki 19

Ekuma ndea Pɔ́lɔ ka Ɛphɛ́sɔ

1 Bii Apɔ́lɔ dátú ka Kɔlítɔ, Pɔ́lɔ áophoda ka nji á mamba-mamba, áodhidha ka Ɛphɛ́sɔ. Kó, áǒdhonda bagoigi buangbo, 2 áǒúsia te: «Bɔtɔ́tɔi Měma á Mokonga mbenɔ nde dóbobeeki? » Báonsikisia te: «Bɛ́kɛ́ɔkimbɛ mɔnɔ na báɔyɔnga nyɔngɔ á Měma á Mokonga. » 3 Pɔ́lɔ áǒúsia te: « Cɔ, obatisɔ nɛnu dátu na kantíti sina? » Báonsikisia te: «Dábasóbatisi bíndɔ Yoáni dáphɛi. » 4 Pɔ́lɔ áǒngodea te: « Yoáni débatisi bundɔ dábakěti tambea abɔ ajede, na ngodea á bakpa gea, bám'beekeɛ mmbe abhikande mbusa akɛ, ande gea Yéso. » 5 Ka ɔka á bɔ nyɔngɔ ndɔ, báǒbatisa k'ina á Mɔkɔta Yéso. 6 Mpɔ, Pɔ́lɔ áobhisa njaga gǔ á bɔ, Měma á Mokonga áodhidha gǔ á bɔ, báokpanga yɔnga ka yɔngɛa danga-danga na ɔtɔa á nyɔngɔ. 7 Bakpa ndɔ dábatú ka bɔbhu bea bakpa nkama moci na babɛ (12).

8 Cɔ, Pɔ́lɔ dáongiaga k'endu á bɔphɛi ndea baYúdha. Ka basonge basaɔ dáɔphɛa na bukpɛkpɛ nyɔngɔ á koboamɛ ndea Mokonga. Yɛ, dá gǎkɛ opua na bɔ, áokonda gea bakpa bábeekeɛ u. 9 Buangbo bâ gǎkɛ odaka kecue, báoya beekea, báɔbɛnjɛaga aphɛ á Mɔkɔta Yéso mosá á bakpa. Ka bondɔ, Pɔ́lɔ áokatana na bɔ, â tɔ oga na bagoigi k'endu á goaga ndea Tiánɔ. Oa, dáogoisaga esa bhui 10 ka basaga babɛ. Ka bondɔ unge, baYúdha na baGiíki bɔbhu bundɔ dábaiki ka nji á Asía, dábaɔki nyɔngɔ á Mɔkɔta.

Bana Sikɛ́wa dábapúi na bansombo

11 Cɔ, Mokonga áogea ketangaɔ ángbó phɛ̂ ka njaga á Pɔ́lɔ. 12 Bakpa bâ phɔtɔ ɔbhɛda bhɔngɔ nde dábhou nyama akɛ ně, báoga ně ka basambi, báoama, bansombo bâ gǎkɛ otoka.

13 Cɔ, baYúdha buangbo bundɔ dábaɔgaga ɔma danga-danga k'aphe á juanisa bansombo, báokengea kumia á ina á Mɔ́kɔta Yéso, ka juanisa bansombo subi á bakpa. Báǒgea bansombo te: « K'ina á Yéso mmbe Pɔ́lɔ aɔphɛa k'ina akɛ nenososi, juanani! » 14 Ka bundɔ dábagi bo, dábatú baganda ngia á njaga ibɛ (7). Dábatú bana Sikɛ́wa, ka batobei-phɛa bangbóngbó ndea baYúdha. 15 Bansombo báǒsikisia te: «Beomǔbha Yéso, bê phɔtɔ omúbha Pɔ́lɔ. Cɔ, benu gǎkɛ, bonde ba ani? » 16 Nkpa ndɔ bansombo dábatú subi akɛ áǒbhutukia, áɔ̌nyɛ́nya bɔbhu ka bukpɛkpɛ, áǒgea ajede phɛ̂ na ka bii dábáti k'endu ndɔ ndumbu na báotege. 17 Bakpa bɔbhu bunde dábatú ka Ɛphɛ́sɔ, baYúdha na bunde báná baYúdha, báɔɔka nyɔngɔ ndɔ, báoba na kɔbɔbɔkɔ phɛ̂. Ka bondɔ, ina á Mɔkɔta Yéso áoba n'obhebhɔ.

18 Bakpa básii, bunde dábam'beeki Mɔkɔta Yéso, báobhika ɔbɔngisaga nyɔngɔ nɛbɔ na yɔnga i mosá á bakpa. 19 Bakume básii dábabhiki na buku nɛbɔ á kokume, báotoboa mosá á bakpa. Dábatangi esombi i áoba bangɔa bɛa ɛlɛphu nkama bɔku (50). 20 Ka bondɔ unge, nyɔngɔ ndea Mɔkɔta dándandi na bá na bukpɛkpɛ.

Batɔa ka Ɛphɛsɔ báyomboki

21 Mbusa índɔ, Pɔ́lɔ áosuia ka měma akɛ tenisia ka Makɛdhɔnía na Akáya ka gea, ájuɛ na Yɛusalɛ́ma. Aɔyɔnga te: « Mbusa á ga á kó, akeni phɔtɔ négɛ na Lɔ́ma. » 22 Ka bondɔ, áǒteka badhakɛ babɛ na Makɛdhɔnía. Badhakɛ kau dábatu: Timɔtɛ́ɔ na Ɛástɔ. Pɔ́lɔ â gǎkɛ ojiga ka Asía k'esa abhɔa.

23 Ka matu ndɔ unge, bakpa dábayɔmbɔki phɛ̂ ka phɔa á aphe ndea Mɔkɔta. 24 Cɔ, nkpa moci ina akɛ Dhɛmɛtíɔ, dáotúa etombe á ngɔa ka iii á endu ndea mɔkɔta á na kobha, nke Aatɛ́mi. Etombe ndɔ dáɔ̌tɔisisa batombe phɛ̂. 25 Dhɛmɛtíɔ â gǎkɛ ǒdhondanisa badhakɛ batombe bɔbhu, áǒngodea te: «Baya, boúbha gea, bɛɔtɔa ásii phɛ̂ k'ekuma nde bɛɔbhɛdanaga. 26 Cɔ, bɔɔki na ɔna gǎkɛ bii Pɔ́lɔ aǒbotea bakpa básii ka kětia á měma abɔ, nna tɔ ka Ɛphɛ́sɔ, phɔtɔ ka Asía bhubhui, ka yɔnga akɛ te, ‹ Iii á bakɔta á na kobha, nnde bakpa bábɔngisigi, báká tanda bakɔta. › 27 Cɔ, ka nyɔngɔ ndɔ, bojede i a be: Bakpa bákábɛnjiɛgɛku tɔ ekuma nɛsu, phɔtɔ endu ndea mɔkɔta á na koba nke, Aatɛ́mi abande k'iso á bakpa kema jǎi jǎi. Boombia ndea moamɛ nɛsu nke mmbe báombhɛbha ka Asía na mokonda bhui asiande. »

28 Bii báɔki ye nyɔngɔ ndɔ, báɔtuma na esuia, báokpanga koga gea te: « Obhebhɔ ka Aatɛ́mi á ka Ɛphɛ́sɔ! » 29 Kɛ̌kɛ ndɔ, oyombo áɔɛmba ka kenombe bhui. Báǒdhunga Gáyɔ na Aisitákɔ batɔa ka Makɛdhɔnía bunde dábaotamba na Pɔ́lɔ. Báokamisaga ngia bɔbhu ka ntanga á njoko. 30 Cɔ Pɔ́lɔ áokonda ngia subi á usɛsɛ á bakpa, bagoigi bâ gǎkɛ onimisia. 31 Ka bakɔta á ka Asía, bundɔ dábankɔndigi Pɔ́lɔ, báontekea mbino ka dengemisaga akɛ gea kangiɛ mɔnɔ ka ntanga á njoko ndɔ. 32 Ka mbeno ndɔ, usɛsɛ á bakpa n'ayɔmbɔki ye. Bakpa bundɔ dábadhondanigi ka ntanga á njoko ndɔ, buangbo báɔyɔnga nyɔngɔ moci, buangbo nyɔngɔ nɛngbɔ, bákaubhɛ gǎkɛ cina á dhondanaga abɔ. 33 Oa, baYúdha bunɛngbɔ, báɔntɔmɛaga Alɛsandúɔ nyɔngɔ nde dágeani. Báommɛsa mosá á bakpa, yɛ áosambɔa njaga ka gea te áyɔngɛ mosá á usɛsɛ á bakpa. 34 Bii bakpa báubhi ye gǎkɛ gea, ande moYúdha, bɔbhu báɔyɔnga akpɛ ka mbenɔ ibɛ gea: « Obhebhɔ ka Aatɛ́mi á ka Ɛphɛ́sɔ! »

35 Ka sungiaga, n'dundu á kenombe áǒdhakanisa bakpa, áogea te: «BaƐphɛ́sɔ baya, ani mmbé aobosa gea, kenombe á Ɛphɛ́sɔ ande ɔma á bondeaga endu á Aatɛ́mi angbóngbó na iii akɛ nnde agu ka toka na kobha? 36 Ka bondɔ, nna na nkpa nde ayande. Bii a bó, dhakanani tɔ phio! Bókogeɛ mɔnɔ kema ka mbangɔ-mbangɔ. 37 Bǒbhiki na bakpa nde oani, na bákáubi nkumba á k'endu ndea mɔkɔta á na kobha. Bákámbhómi phɔtɔ mɔkɔta á na kobha nɛsu nke. 38 Cɔ, aobá́ Dhɛmɛtíɔ na badhakɛ batombe, na bá na nyɔngɔ á tɔnga á bakpa, bágɛ ka ntua á tena a nyɔngɔ, mosá á bateni-nyɔngɔ. Kó unge akeni bántɔngɛ. 39 Aoba na bo phɔtɔ na nyɔngɔ nɛngbo, bhisani phɔ́ mosá á madhondanɔ nde aubhikani na babɔngisigi ɛɔphi. 40 Nga, beobanga tɔnga asu mosá á baLɔ́ma k'eongo b'inde. Madhondanɔ nɛsu ndea k'esa nde, nna na kantíti nga, béké na kema nde beyɔngande ka phɔa i. » 41 Agɔbi ye boabhi, áǒphanja bakpa.