6
Da namon tete so iwot go keng yakua
1-2 Ayanang, mianang! Nggeasui go namboy Iram Yesus go tap kuduong so nguok go-a se itak! No, way so wali segu genang-a imot ya nguok go se! Tandali kutrui-a sesey genang-a kua nguok ne. Yangga: piam konkebamling lo uwaluk go sik so teguey genang-a ngunguok go; Ki Wali Iram no dabui lo kekeng genang tap; bu dedegut go, tatui genang tap; kebong sik so nglong go nogo tap; kisebui taling genang tap-a ngunguok go. 3 Namboy tap-tap ngga itak genang, Ki Wali Iram lo iwat go, dabui lo atnang mo duing.
4-6 Kua kay! Walitap sik sogo, nando teguey go, da namon tete so walitap sono wawi go, iwot go keng genang, mea kua. Yang! Nando ngge mo tra go,
- dabui ba Ki Wali blong lo ngap go;
- walipega blo sik sogo ey mo tetra go;
- Ki Wali Waglo logo ey mlak go;
- Ki Walinebut teguop golo dabui ey suot go;
- yansi go wali sik so pupung go don ey tra go,
ngga naklay tra gono teguey go, esang, dabui klum! Se duing! Teguey go ngga, Ki Wali Danon da namon tete sogo, nemot tang nogo so di no gemang ne guglung. Ngga ey, ibe sono Ki Wali Danon wayang-a tandali gemang tetaling.
7-8 Se duing: udong ey wong eygo-a pung go, ikum go mea pu, “Seni kua! Piam so pu go-a, koy lo puit go se kuim!” Walitap sik sogo nando teguey go, ngga kalik mea lemoy. No, nan ba nogo, sabu gluk go tang so, tatemang seni so lemoy go, seni mea tagot. Ngga ey, kebali so semu go sedue blo nogo Ki Wali Iram logo so taiti mea iti.
Nemudi so Ki Wali Iram lo mea taling
9 Dem-debui sop nang! Nemot-a atnang lo pepen go yatrang ngga kalik, idekeba ya taling go, motnang sogo ngge-a imot mo senong gabe, “Sesuoy genang tap seni, suey golo motnang gabe koklong.” 10 Kua kay! Ki Wali Iram nemudi sogo. Motnang go seguot pung go, klum taling genang, Nemot logo yakua kay. Nemot sui no dabui lo keng go tang so, blong duoyap sono motnang lo mo tetebok, e... nggeasui gono gabe pung. 11 No, don ey at lo duduing go, mottang-mottang so dabui lo se usey, e… i go sogo no se pung. Duduing ey imot lo bubung go tegadi-a, seni eygo mea lemoy. 12 Sesrok eygo so motnang lemoy go, genam moyso. No, blong duoyap temu logo yatrang-a, motnang se keng. Gigling ey keng go tang so, tegadi Ki Wali Iram lo dok go nemotnang-a mo iti.
13-14 Se senong! Ki Wali Iram, Ki Wali Kumam gabe. Nemot blo nogo, blongdon meno kua! Ngga tang so, babu Ablaham no tegadi dok-ngam go nogo, Nemot go sui tang gono tanat go, Ki Wali Iram lo mo pu-ngam,
“Mot blo so Genam go blongdon-a, mea gigit.
Mot go mlena walasrang no miam dega ey tip mea pung.” (Ke jadian 22:16-17)
15 Yang! Don ey gigling ey, babu Ablaham bubung go, nemot no tegadi so Ki Wali Iram lo dok go ngga, mo lemoy gabe.
16 Se senong: tanat genang, sui eygo don meno sono sikabung logo mea pu, “Woy mo ikum, banu mo ikum!” Ngga ey, tanat go sik so, ibe senong go mea yang, “Seni so lo: sagui se itak!” Ngga tang so tandali go sagui mea kua pung. 17 Tanat go tap ngga, Ki Wali Iram lo mo keng. Nemot go duduing lemoy genang so, don ey babu Ablaham go mlena walasrang nogo so, ngge mo pen, “Ki Wali Iram, Ki Wali Kumam, Genam gabe! At go sui no tanat go, tegadi dok-situgu go ngge, nemudi so mea lemoy! Kua lemoy go, kua.”
18 Yang! Wamoymlue Ki Wali Iram kua. Tasam namon ngge, idi logo yakua iwot-sing gabe. Yangga: tegadi ey, tanat eygo logo so, imot ngge ip sogo, don ey gabe kokok. Yang! Ku santugun go nogo so dok go tegadi, duduingbubung ngganemot no waysagi ey imot mlak go, ngga imot suing genang ndengtabang gabe. 19 Imot go wali nogo, tutuing kua tra go don, gabe. Bayi so dok go demu ide eygo ngga, Iram Yesus tang go gabe. Se senong! Ki Wali yakena ba sono Iram Yesus tang so degut go koklong, Ki Wali Iram go suongku no, Kiki Degu so luep go amka lo mea degut. 20 Yang! Tap ngganemot Yesus tang golo mo kebuo gabe. Kuduong so imot nogo so, ngga ba sono Nemot-a mo degut. Nemot ngga: Ngengam Iram, deguena Melkisedek kalik senang so mea susuing.