5
Yahudi go taitisopuit go trang dega
1 Ayanang, mianang! Taitisopuit go trang dega a nemot go seni sogo piam? Se senong! Blung sik so, klaya duo-a usi go mea kuoy. Ngga ey, Ki Wali Iram ey blung eygo nogo, ‘dikuoytap’ so mea lemoy. Ki Wali Iram nogo taitisuey teguop-a keklak genang, nemot lo gemang ya puit. Konkebamling suep go ngengam keduik genang taiti, nemot lo gemang pupuit dali. 2 No, se senong! Taitisopuit go trang dega ngga sedue dali. Don kua go, nemot mea kenuong. Ngga ey, blung logo ide, nemot mea tra dali. Yang, kua senong go tang so, tap nega go, takebali piam go-a pupluok go sikabung nemot lo se tebok. 3 Ngga nang sogo, blung nogo ey, nemot tang go piam kuklue konkebamling eygo nogo taiti se puit dali. 4 Se senong! Taitisopuitgo trang dega so lemoy genang, nemot tang go sui-a iti genang so yakua. No, Ki Wali Iram lo usi go kuoy go-a, taitisopuit go trang dega sogo mea suing. Banim dega keduong so Harun b usi go kalik.
5 Ngga kalik dali Iram Yesus gabe! Se senong! Ngengam Iram sogo, Nemot tang so, Nemot go sui-a kua iti gabe. No, Ki Wali Iram tang golo kuoy go mo taling. Nemot sono Ki Wali Iram lo pu go,
“At go Duo Mot gabe!
Mot go Aya so, Genam gabe.” (Mazmur 2:7)
6 Nggano, ngge kalik Wali Sam klaut ba no Woy Dem sono Ki Wali Iram lo mo pu dali,
“Ngengam Iram dega, tong-kua tong go,
Iram Melkisedekc ey i go, Mot-a gabe.” (Mazmur 110:4)
7 Se senong dali: kukunan blo so maning Iram Yesus got-akam go nogo, u ey kayang eygo dewi ba lo Ki Wali Iram nogo mo wadong, “O, Ki Wali Iram! Mot lo iwat go, Genam no se tebok! Kebong sik so Genam sesuoy genang don, Mot-a gabe.” Yang! Ki Wali Iram no tupduk go, takong eygo tang so, Nemot go dewi mo tup.
8 Se duing! Nemot-a, Yesus tang go Ki Wali Danon, koywong iseng lek golo tupduk tap senong sogo, Nemot-a mo saboy gabe. 9 Nggano, Nemot go wali naklay teguop so pung go, Yesus tang go-a sesuoy nuik so mo lemoy. Sesuoy nuik sono dabui lo kengduk go-a, wali sesuoy min kok go mea gigit.
10 Ngga nang sogo so, Ngengam Iram so Nemot-a Ki Wali Iram lo mo temuit. Seni so, Ki Wali Iram lo yang go, “Mot-a, Melkisedek go sipsuing ey i go d gabe.”
Seni eygo walinebut senong genang
11 Yang! Melkisedek go sipsuing ey Yesus kerlam go seni senong genang, mata so gabe pen-asitugu. No, senong ngga naklay motnang lo mlak genang, deding ba lo. Keda so tup go motnang logo kua mlak ne. 12 Sogo temoy no, nggeasui go walitap so nguok go klui sogo, motnang tang go maning kua lemoy? Yang! Kuduong so, Ki Wali Iram go deguo teguop senong genang, klui meno-a motnang ne uwet. Motnang maning denok kalik. Walitap tamlak genang-a minip kalik gabe gugut. Dawin eygo taling go motnang logo yakua dam go gut.