5
Ki Wali Iram go blung piam kua pupluok
1 Dem-debui! Ki Wali pega lo taling go duo dabui dalip so, motnang se suing. 2 Ngga ey Iram Yesus lo taling go klum lo motnang se uwali. Yang, klum tang so, Nemot go saysuk imot sono iti go mo kebong. Ngga, taiti teguop seni, kinemon eygo, Ki Wali Iram lo iwat goso, mo lemoy.
3 Ki Wali Iram go blung teguop go motnang gabe. Ngga tang so, kamea, tabat suk kua go, nenagluim, tasam kua seni go ngga kua semu. 4 Nebut suk kua go, nebut semu, seni kua go nebut, naklay ngga motnang blong duoyap logo kua pen seni. No, Ki Wali Iram sono taiti suey-a, senang so se keklak. 5 Suey so senong: si kamea, taybat, nenagluim duo nogo sipsuing, Iram Yesus ey Ki Wali Iram eygo blongdon duduing ba nogo kua gemang. Se duing: nenagluim go seni, lema no ta kokong go ey mo kerlam.
Iram Yesus go blong ba no babu genang
6 Ayanang, mianang! Nebut semu seni kua golo, motnang go walitap, mlue go nega genaning! Se senong: Ki Wali Iram no tupduk kua go sikabung nogo, Ki Wali Iram go koy mea blon. 7 Piam eygo sikabung ngga kalik go ey, ta kua keduik seni. 8 Se duing! Banim nogo ku klik go ba lo motnang tang go mo wali. No, nggeasui go Woy Dem ey klay gono blong ba so motnang gabe. Blong ba lo motnang se koklong. 9 Blong sik sogo tasam suey go-a, nemudi sogo, seni eygo-a se pupung. 10 Woy Dem lo iwat go senong genang-a, motnang logo se u-usey. 11 Ngga ey, ku klik ba sogo sikabung lo tasam kua seni go sesemu go, motnang logo kua pupluok! No, blong sono neguon so se ta-sing. Seni piam go ngga nenguon genang. 12 Yang! Kuklik go ba no maykok so pupluok go, ngga piam kangok. Pu genang sogo, lom suali ey. 13-14 Tasam naklay blong lo ngap go, mablong so itak go, ibe mea ikum. Ngga nang sogo Wali Sam klaut ba no mo klik,
“Buong-a, usne so maning sesrek go,
kebong sik sogo nglong-a!
Mot blo nogo neblong Iram Yesus lo mea ngap.”
15 Ngganemot sogo so motnang go walitap suey so se ikum. Puplu sogo sikabung kalik kua. Senongkalong eygo sikabung so motnang se uwali. 16 Nggeasui go ku ngge piam gabe! Ngganemot sogo so mot go ku suey go gemang go, wali kebali suey so se pluok.
17 Puplu so kua, Woy Dem lo iwat go-a suey so ikum go se senong. 18 Bu lo motnang kua yane. Bu logo motnang go wali mea waluk. No, mot go wali-a, Ki Wali Waglo go don lo se damoy. 19 Klay gono blong duoyap yaluim go nogo, yakay ey Woy Dem nogo masmur-a, iway-a, Ki Wali Waglo lo taling go usam-a se i-iti. 20 Ki Wali Iram motnang go Wali Aya! Ngga ey, kuno-woyno, naklay-naklay pupluok go nogo, Ki Wali Iram sono taiti suey-a, Iram Yesus go sui no motnang logo se keklak.
Nin-senun nogo nebut
21 Blong duoyap! Iram Yesus imot go wengkabui gabe. Nemot go sui iway iti genang-a, way-way so suali ey motnang se suing.
22 Mianang, sedue go senun! Mot go sedue nogo suali ey se, Woy Dem so suali go kalik. 23 Se duing: kenin ngga senun go wengkabui, blong duoyap go wengkabui Woy Dem lo suing go kalik. Blong duoyap-a, Nemot lo sesuoy go saysuk gabe. 24 Iram Yesus so Blong duoyap lo suali go kalik, naklay-naklay ba nogo, suali ey nin nogo senun lo se tetaling.
25 Ayanang, kabung go kenin. Yang! Blong duoyap sesuoy genang so, Iram Yesus go saysuk taiti so iti go mo kebong. Iram Yesus lo klum go kalik, Mot go kabung nogo klum, mot lo se tetaling dali! 26-27 Iram Yesus kebong go klum logo so, blong duoyap go piam konkebamling bu mo lu. Yangga, bu degut go ey, walinebut eygo lo, seni ey teguop so pupung genang. Iram Yesus lo wawi go suey so Nemot ey suing go, blong ey blung ngga naklay mea gigit. 28 Ayanang, kabung go kenin! Yesus lo klum go kalik, senun nogo klum kenin logo, mot tang go saysuk no klum go kalik se. Senun nogo klum, dabui lo suey so taling go, nemot tang go saysuk no gabe klum. 29 Se duing: nando-a mo, nemot tang go saysuk kua klum go? Ngga kalik go kua. Imot tang so, saysuk nogo ten, bu, amka, naklay suey so, yay gabe suing. Blong duoyap yay Iram Yesus lo suing go kalik. 30 Yang! Iram Yesus go saysuk Blong duoyap, Nemot go tamasi imot gabe. 31 Wali Sam klaut ba no mo ngge mo klik,
“Unen-nglangin itak go, klaya gono senun ey sedue se suing.
Ngga ey, saysuk klaya so, nemotnamon gabe lemoy.” (Kejadian 2:24)
32 Yang! Nebut pen-situgu go, seni kok go, babu dega gabe. Genam, Paulus lo duing go, “Kunala ngge go tegan, Iram Yesus ey Nemot go blung eygo so taling go.” 33 Kenin-senun logo kua kay! Kunala ngge motnang ey mo dok dali. Kenin, mot go kabung nogo klum dabui lo se tetaling! Senun, mot go sedue nogo, suali ey ta se kokong!