6
Paulus go kebali nebut
1 Ki Wali Iram go kebali sedue atnang ngge gabe. Ngga sogo so, nebutmang atnang lo gabe king-esitugu, “Motnang no Ki Wali Iram go gualaklum taling go ngga, seni kua goso kua lemoy.” 2 Wali Sam klaut ba no Ki Wali Iram lo pu go,
“Ku Genam iwat go nogo-a, motnang lo usi go, Genam mea tup.
Ku Genam lo sesuoy go nogo-a, Genam logo mea tebok.” (Yesaya 49:8)
Yang! Atnang lo pu go, “Nggeasui go, Ki Wali Iram lo iwat go sesuoy genang ku, ngganemot gabe.”
3 Ngganemot sogo so, walikebali so sesemu go sui waluk genaning so, sikabung temu nogo, sak so kok go masi ey kikling go tasam, atnang kua pluok gabe. 4-5 No, Ki Wali Iram go kebali sedue so atnang gabe. Ngga ibe ikum genang tomatup go gabe koklong. Yangga, tap kua go nogo; koywong deding ba logo; sedue lo demun suey go; boy ba no betep go; sagui ba nogo; seguot kangok so pung go nogo; usene kua sesrek go; ten kua dedam go, atnang gabe gling-etugu sang. 6 No, ngga naklay ba nogo, tap ngge-a gabe uwet-etegu: nemudi sogo-a; senong duduing ey; gigling eygo; susuot sogo; Ki Wali Waglo sik sogo pega ey dabui seni logo klum-a gabe tetaling. 7 Nggano, Ki Wali Iram go don lo, seni sogo walitap-a gabe pepen klong. Yang! Pleway dap genang, plesi sono srom genang don ple, ngga: seni eygo nemudi sogo-a gabe wawi-etugu. 8 Suey so atnang sedue lo pu go, piam so pu go; kemla kuep go, ta ey kokong go, ngga nueya! Atnang wamoymlue eygo so pu go, no seni-a nemudi so pepen klong go atnang gabe sang. 9 Yang! Nemot-a atnang glop kalik go sedue, atnang go sui ibe mo senong. Nemot-a kebong genang sogo, seni so, atnang maning gabe. Nemot-a demun suey go, kebong genang kua ne. 10 Esang! Nemot-a u ba lo uwet go sedue, kuno-woyno yakay-a atnang gabe. Nemot-a taut kua go, atnang tang so, sedue mata so wali blong eygo mo pung. Nemot-a, sogo-sogo kua go, naklay-naklay atnang nogo gemang.
Paulus logo klum way blong duoyap se taling
11 Korintus sikabung! Motnang nogo so, dabui bata lo plet go, nenguon so ngge naklay gabe pen-esitugu. 12 Seni so, atnang go dabui ba nogo sip kangok dega so motnang nogo so mo iti. No, motnang go dabui ba nogo atnang nogo sip, seguay so ne itak sang. 13 Duo nogo kalik gabe pu-situgu, “Dabui way, bata so atnang nogo motnang lo se tenuing dali!” a
Paulus lo nebutmang meno klik go
14 Ayanang, mianang! Walitap so tenguo go sikabung eygo, klaya gono andua so motnang eygo ta kua keduik. Se duing: seni eygo, sogo kalik piam eygo ya keduik? Nggano, ku klik, sogo kalik blong eygo ya tegu? 15 Ngga kalik dali, Iram Yesus go Waglo, Kupiamgo ey kua kerlam. Blong duoyap, kukunan sikabung eygo, sogo bu-a mo kerlam? 16 Nggano, Ki Wali yap ba nogo, didemu no takong genang, sogo kalik ya? Yang! Imot ngge Ki Wali Mani Iram go yap gabe. Wali Sam klaut ba no Ki Wali Iram tang so pu go,
“Nemotnang ey, klay goso Genam mea susuing.
Nggano, nemotnang nesip no mea wali.
Genam go blung so nemotnang mea pu.
Nemotnang go Ki Wali Iram so Genam mea suing.” (Imamat 26:12)
17 Ngga nang so, Wali Sam klaut ba no Ki Wali Iram lo pu go,
“Suey, piam eygo klaya sogo yakua tegu.
Tupduk kua keng go sikabung nesip sik sogo motnang nase pung.
Motnang go wali banom so pling go,
tandali kon eygo kua mlak!
Ngga ey, motnang At lo mea wawi. (Yesaya 52:11)
18 Motnang go Wali Aya so Genam mea lemoy.
At go dem-debui so motnang mea pu.
Ngge, Ki Wali Kumam go nebut gabe.” (2 Samuel 7:14, 1 Tawarikh 17:13, Yesaya 43:6, Yeremia 31:9)