14
Taitiwalipega so tandali pen go
1 Yang! Klum-a kangok so se usey! Nggano, taitiwalipega iti genang sogo motnang lo se uwet dali! Seni so, taitiwalipega, Wali Waglo lo taling go walitap pen genang-a, banim seni se iti! 2 Nebutiwot so pepen go, sikabung temu sono kua pepen gemang. No, seni so, nebut ngga ibe logo kua senong. Ngga, Wali Waglo lo iwot go nebut pepen go, Ki Wali Iram seguong nogo so keklak go. 3 No, Wali Waglo lo taling go walitap pen genang-a, ibe nguok genang gemang. Senong eygo sedue lo pepen go, blong duoyap dabui suot go mangking eygo lo mea bubuong. 4 Nebutiwot so nando lo pepen go, nemot tang go wali seguong-a mea buong. No, ibe no walitap pen genang-a, blong duoyap mea bubuong. 5 Yang! Nebutiwot so motnang naklay pepen go, genam yakay. No, ibe no walitap motnang lo pepen go-a, genam yakay kangok. Walitap so ibe no pepen go ngga, nemot go seni kangok gemang. Nando nebutiwot go pepen go, nemot go seni blong duoyap nogo, kua. No, tandali suey so seni pen go-a, seni ey mea ikum. Ngga kalik so blong duoyap mea buong.
6 Dem-debui, blong duoyap! Motnang mit no genam weng go, nebutiwot seguong so pen go, seni sogo piam? No, nemudi sogo-a genam lo se pen! Ki Wali Iram ba so gigit go-a; senong duduing-a; walitap pen genang-a; walidemu nguok genang-a! Ngga kalik genam lo taling go-a, seni ey mea tagot. 7 Nebutiwot so pepen go ngga, kluim eygo taut kalik: suling; bloma; meno-meno lo sik so pung go kluim. Kluim klaya go-a pupung go, sikabung meno logo sogo kalik ya lek? 8 Yatrang meno: ple sogo kabui u go, no kluim suey so kua tup go, ple sogo nando-a ya ip go klong? 9 Ngga kalik dali, nebutiwot so motnang lo pepen go, ibe logo, sogo kalik ya senong? Ngga, nebit tap no tebadali gemang betep. 10 Kukunan saula go nebut, miam dega ey gemang. Tagu i genang, genam logo yakua. Se duing: klaya nang go seni kua go nebut, kua. 11 Nenep sogo nebut seni genam kua senong go, sedue ngga nogo nenep dali so genam gemang. 12 Nenep dali so motnang kua lemoy! Kangok so taitiwalipega Wali Waglo sik so iti genang duing go, ngge kua kay: sogo kalik go taiti logo-a, blong duoyap ya buong?
13 Ngganemot sogo so, nebutiwot so nando pepen go, nemot tang go dewi se pu dali, nemot no taitiwalipega kekayso seni ey pen genang, se pung dali. 14 Se duing: nebutiwot so genam dewi keklak go ngga, waglo seguong lo gemang pupu. Genam go senongduduing eygo kua keng. 15 Ngga kalik go, sogo kalik genam logo ya pupu? Waglo lo dewi genam pupu go, senongduduing eygo se keklak dali! Yang! Waglo lo usam kluo go, senongduduing eygo se keklak dali! 16 Waglo ba seguong lo Ki Wali Iram sono taitisuey mot pupu go, nenep so pluep go sedue temu tup go, sogo kalik ya pu, “Yang, seni!” Esang, nemot mea nega. 17 Mot go waglo lo Ki Wali Iram sono taitisuey pupu go, suey dali. No, don kok go meno duo buong genang, ya kua.
18 Se senong! Taitiwalipega nebutiwot dabui lo pen genang, genam no iti go, motnang ey kua kerlam. Ngga tang so, Ki Wali Iram sono taitisuey genam gabe pupu. 19 No, blong duoyap buong genang, seguay dato so senongduduing ey pen go-a, yakay ey genam lo gabe ngunguok. Tebadali walong-bata so nebutiwot eygo lo pepen go, genam moyso.
20 Dem-debui, blong duoyap! Denok kalik motnang kua duing. Segu go sedue so, don ey se duing. Yang! Taybat semu genang-a, denok kalik se. No, kunala iguong plet go sedue so mot se ip! 21 Se senong: nebutiwot so pepen golo, kunala yakua plet. Ngga senong genang so, Wali Sam klaut ba no Ki Wali Iram lo mo pen, “Blung nggenemot nogo saula meno go lom ba lo, nebut iwot goso Genam lo mea pen. No, esang! Genam go wali nebutdrom ngga kalik go nogo, tupduk nemotnang kua dali.” Ngga Ki Wali Iram lo pu go. a
22 Ngga sik so mea senong: nebutiwot so pepen go ngga, Woy Dem kua senong go sikabung taling genang tasam gemang. Blong duoyap nogo so kua, tap meno-a nemotnang nogo gabe. Yangga, ibe no Wali Waglo lo taling go walitap. 23 Se duing: blong duoyap klay gono yaluim go nogo, sikabung naklay, nebutiwot so bumeno-bumeno so pepen go, dia idi sik sogo sikabung degut go, nebut iwot tup go, ngge yakua pu, “Yam so motnang mo puplu ba?” 24 No, Wali Waglo lo taling go walitap ibe senong genang-a pepen go, dia idi sik sogo sikabung degut go, nemot go dabui ba sogo kuklue ngap go, blong duoyap lo suey so mangking go mea taling. 25 Ngga tang so, nemot go dabui ba so kok go gigit go, dia no naklay mea plet. Ngga ey, Ki Wali Iram no ta kong so, nemot unuik go mea pu, “Seni so! Motnang nesip so Ki Wali Iram gabe.”
Blong duoyap iyaluim go tap
26 Dem-debui, blong duoyap! Genam lo pen go seni, sogo piam? Genam lo duing go, ngge kalik: nago no, motnang yaluim go, Ki Wali Iram sono go iway sikabung klay-klay lo se keklak. Usam-a sedue meno lo kukluo go, walinebut meno duo lo se nguok! Ki Wali Iram sik sogo duduing-mang king-a meno lo se taling! Iwot go nebut so temu lo se pepen! Ngga no, nebut ngga go seni senong genang, meno lo se pen dali! No, ngga naklay, wali don kok go, blong duoyap buong genang so se! 27 Nago no, taiti walipega lo nebutiwot go gemang go, namon duo so se! Kua go, nangglik si seguong lo, klay-klay se pen! Nggano, nemot go seni duo meno lo se pen dali! 28 Seni pen genang sedue kua go, nemot-a yakot so se suing. Ki Wali Iram sono go-a, dabui ba lo nemot tang go se pepen!
29 Ngga kalik dali so, nemotnang sik sogo lo, Ki Wali Iram go duduing mang ibe no kiking go, namon duo lo, kua go, nanggliksi lo nebut se pen. Nemotnang lo pen go-a suey so temu lo se peplet! 30 Ngga sogo sedue meno no, Ki Wali Iram sik sogo senong taling go, nebut so maning pepen go, yakot so se suing. Nggano ibe sono senong go nebut ngga se pen. 31 Yang! Ibe no Wali Waglo lo taling go walitap, motnang naklay lo mea pen. Ngga sik so, nguok go senong go, motnang klay-klay don kok genang. 32 Ibe no Wali Waglo lo taling go nebut-a pepen go ngga, wagloduduing waysagi ey mo mlak gemang. 33 Se senong: suep-suep sogo Ki Wali Iram kua duing. No, yakay ey ngengam go-a Nemot gabe iwat.
34 Ki Wali Iram go blung yaluim go nogo, kabung-kabung yakot so se suing. Seni so, ibe nogo nebut nemotnang yakua pen. Wali Sam klaut no klik go kalik, sedue ba no nemot se ip. 35 Yap ba no nemotnang senong genang kenin no se usi. Seni so, blong duoyap no, nebut kabung lo pen go, ngga suongsut ey demu kua.
36 Esang, dabui klum! Demu ngga, sogo tang so, motnang kua kekeng? Motnang sik so Ki Wali Iram go deguo teguop pung go mo wasey? Kua go, motnang seguong no Ki Wali Iram go deguo teguop mo iti? Sip meno nogo kua? 37 Nando lo duing go, “Walitap senong go taitiwalipega eygo genam gabe.” Meno duo lo duing go, “Wali Waglo eygo, genam gabe.” Ngga seni sogo, nemotnang tang go se senong, “Genamnang no Paulus lo kiklik go ngge, Ki Wali Iram lo mot-dak go demu seni so gabe.” 38 No, demu ngge ta kua mlak go, sedue ngga nogo blong duoyap temu mea kua keng dali.