12
Wali Waglo klaya taitiwalipega-a miam ey
1 Dem-debui blong duoyap! Nggeasui go, suey so motnang no Wali Waglo lo iti go taitiwalipega sogo, gabe pen-asitugu. 2 Tandali motnang se duing! Maning walitap kua keng go nogo, blong kua go didemu no, naklay motnang dabui mo iti. No, ta lo semu go mawo sogo didemu logo tap yakua taling. 3 Ngganemot sogo so, suey so motnang se senong: Wali Waglo ey go logo, ngga kalik mea kua taling. Yang! Nando lo pu go, “Yesus piam”, Wali Waglo eygo logo nebut ngga yakua pu seni. Ngga ey, nando lo pu go, “Yesus ngga, Woy Dem”, Wali Waglo seguong logo so, nebut ngga mea yang. 4 Seni so, Wali Waglo klaya seguong. No, Nemot sik sogo taitiwalipega-a sukmeno-sukmeno so gabe. 5 Bumeno-bumeno so walikebali gemang. Woy Dem-a, klaya seguong gabe. 6 Sammeno-sammeno so tasam don eygo gemang. Sikabung naklay ba nogo, ngga Ki Wali Iram klaya golo gemang pupluok-sing. 7 Wali Waglo lo taling go blong, nemotgo-nemotgo ba nogo taitiwalipega mea ikum. Ngga ey, klay gono blong duoyap bubuong genang. 8 Meno duo nogo, senongkalong eygo lo pepen genang taitiwalipega Wali Waglo lo gemang iti. Duo meno nogo, kalong ey nebut ngunguok genang Wali Waglo kerlam golo gemang iti. 9 Meno duo nogo, dabui lo keng genang don Wali Waglo lo mea iti. Meno duo dali nogo, sadui pepali genang taitiwalipega gemang iti. 10 Duo meno nogo, tasam kangok go pupluok genang don, Wali Waglo lo gemang iti. Meno duo nogo, Wali Waglo go senong suey so taling genang, nggano meno nogo nebut ngga go seni mlak genang, taitiwalipega gemang iti, “Wali Waglo lo taling go? Kuasep sik sogo?” Meno duo nogo, Wali Waglo lo iwot go nebut pepen go, taitiwalipega gemang. Nggano, meno dali nogo, nebutiwot go ngga, nemot go seni senong genang, taitiwalipega gemang mo iti. 11 No, taitiwalipega ngge naklay, Wali Waglo klaya go seguong lo pupluok go. Nggano, sikabung klay-klay, nemotgo-nemotgo Wali Waglo tang so duing go kalik, gemang wasey.
Tamasi miam ey saysuk-a klaya
12 Yang! Saysuk go tamasi miam ey. No, saysuk-a klaya seguong gabe. Ngga kalik dali Blong Dem go ‘saysuk’. Ngga Nemot go blung so pu go gabe. 13 Seni so, Wali Waglo klaya go ba lo imot naklay bu mo degut. Ngga tang so saysuk klaya so mo lemoy. Imot naklay Wali Waglo klaya golo gabe keduik-sing. Nemot-a sedue Yahudi, saula-saula, koybutasemu, taitak go sikabung imot gabe. 14 Se senong: saysuk ngge klaya goso kua pu. No, tamasi naklay-naklay so, pu go gemang. 15 Ngge kalik masi lo pu go, “Ta so genam kua usi! Saysuk nogo genam kua degut!” Esang! Masi, saysuk so kua pu? Kua, masi ngga saysuk dali. 16 Nggano, kama lo pu go, “Genam ngge, nemutegun yabung, saysuk so kua pu!” No, saysuk so kama yakua pu? Kua, ngga saysuk dali. 17 Nago so mo! Nemutegun seguong-a saysuk ngge semu go. Sogo lo ya tup? Nggano kama seguong-a go, sogo kalik golo nemon ya dop? 18 Ki Wali Iram, Nemot lo duing go kalik, saysuk temoy no tamasi nogo sip, nemotgo-nemotgo mo iti-sing. 19 Tamasi klaya go seguong-a ngge naklay semu go, sogo kalik saysuk so ya pu? 20 Yang! Saysuk klaya seguong so, tamasi miam eygo lo gabe klik. 21 Ngganemot sogo so, ta sogo nemu lo yakua pu, “Ta! Mot, genam moyso.” Nggano, masi sogo wengkabui lo yakua pu dali, “Masi! Mot genam moyso.” 22 Kua, ngga kalik go yakua pu! Ngge-a se duing: don kua go tamasi-a, seni dega ey gemang! 23 Blong kua go tamasi, nemublup kua go-a, suey so yay ta ey mea kong. 24 Seni so, imot go tamasi blong eygo, nemublup ey kua go, yay kua suing go, nueya! Blong ey nemot tang go gemang! Tamasi naklay suey dato so Ki Wali Kumam lo mo klik-ngam. Ngga ey, tamasi blong kua go nogo, banom so ta ey suey so yay kokong genang. 25 Yang! Way-way so tamasi tetebok genang, se ikum. Saysuk banom-banom suep genaning! 26 Kua kay! Meno-a iseng tra go, naklay-naklay, iseng mea tra dali. Meno no ta ey kong go, naklay-naklay yakay mea tra dali. 27 Motnang naklay Iram Yesus go saysuk, klay-klay go Nemot go tamasi motnang gabe. 28 Se senong! Blong duoyap ba nogo sipsuing Ki Wali Iram lo mo taling gabe. Yangga, klaya tete sogo: Iram Yesus lo mot-dak go tamot; namon tete sogo: Ki Wali Iram lo taling go senong eygo sedue; nangglik tete sogo: Iram Yesus go tap nguok genang klui-klui.
Nggano, taitiwalipega don ey go sikabung, ngge kalik gabe: tasam kangok go semu genang sogo; sadui pali genang sogo; walitakebali tebok genang sogo; wengkabui so lemoy genang sogo; Wali Waglo lo iti go nebut iwot go pepen genang sogo.
29-30 No se duing: nemotnang naklay ngga, tamot sogo; senong eygo sedue; klui sogo; tasam kangok go tetaling genang; sadui pepali genang; Wali Waglo lo iti go nebut iwot go pepen go; nebut iwot go seni senong go pepen genang, ngga naklay klaya duo logo yakua pluok. 31 No ngge-a usey go se iti: taitiwalipega don eygo, nemu klaya seni-a, se mlak!
No, banim motnang no, teguop tap naklay go dato-a, genam lo, gabe tetaling.