Inosa Gasa nu Allatala pade inosa bali ni Kristus
4
1 Sarara-sarara to nipotowe-ku, nemo miparisaya sumawee tou to nangaku naria Inosa Gasa nu Allatala si sira. Agiana kalio ncala ulu, bona mincani inosa to naria si sira ee ba lako ri Allatala-da ba tado. Apaa nadeamo nabi-nabi to tado nakono narata riumba-umba. 2 Iweeimo dalana komi manguncani ba Inosa Gasa nu Allatala-da ee ba tado: Tou to nangaku bakote i Yesus Kristus narata ri dunia najadi manusia, ee-mo tou to naria Inosa Gasa nu Allatala si-ya. 3 Agiana tou to tado nampangaku i Yesus Kristus, ee-mo tou to tado naria Inosa Gasa nu Allatala si-ya. Tou ee naria inosa bali ni Kristus si-ya. Nironge-mimo ande ngoni kana marata inosa bali ni Kristus, pade ngkapuri ei naria-yamo ri rara dunia ei. 4 Agiana sarara-sarara-ku, ikomi ei lako ri Allatala, pade nidagi-mimo nabi-nabi to tado nakono, apaa narosopa inosa to naria si komi pade inosa to naria ri tou-tou ee. 5 Nabi-nabi to tado nakono ee lako ri dunia ei, etu-mo pepatuduki-pepatuduki-ra nasimbei ante tou-tou nampekiri kasanaa ri dunia. Ee-mo sabana, tou-tou to nampekiri dunia ngkola namparonge-ra. 6 Agiana ikita lako ri Allatala. Etumo sabana tou-tou to nanguncani Allatala, namparonge-ta. Agiana isira to tado lako ri Allatala tado namparonge-ta. Ante dala ei-mo ikita mamala manguncani pontania umba Inosa to nambei pepatuduki to nakono, pade inosa to nepakapusa.Allatala-mo towe
7 Sarara-sarara to nipotowe-ku, kamei-tamo mombepotowe sadua bo ntanina apaa towe ee lako ri Allatala, pade butu dua tou to nepotowe ia-mo ana nu Allatala pade nanguncani mpuu- mpuu Allatala. 8 Tou to tado nepotowe, tado nanguncani mpuu-mpuu Allatala, sabana Allatala ee-mo towe. 9 Allatala nopanotosi bakote Ia nampotowe-ta ante nantudu Ana-Na to sadudua ee namei ri dunia ei bona ikita mantarima tuwu liu-liu lako ri Ana-Na ee. 10 Ei-mo towe ee: “Tado ikita to nampotowe Allatala, agiana Allatala-da to nampotowe-ta pade nantudu ana-Na bona lako ri Ana-Na ee ikita mamparata peampungi lako ri jeko-jeko-ta.” 11 Sarara-sarara to nipotowe-ku, ande Allatala nampotowe mpuu-ta, ikita mbii kana mombepotowe sadua bo ntanina. 12 Tado naria-namo saduaa mpuu to nariamo nangkalio Allatala. Agiana ande ikita mombepotowe, Allatala mosangkani ante ikita pade towe-Na magana mpuu ri rara nu tuwu-ta. 13 Apaa Allatala nambeimo Inosa-Na si kita, nincani-tamo bakote ikita natuwu nosaongu rara ante Allatala-mo, pade Allatala natuwu nosaongu rara ante ikita. 14 Ikami dodo-mo to nangkalio mata Ana nu Allatala, pade ikami no parata bakote Ia nitudu nu Tuama bona majadi Mbagou Tomampakasalama dunia ei. 15 Yema-yema to nampangaku bakote i Yesus ee Ana nu Allatala, Allatala natuwu nosaongu rara ante tou ee, pade tou ee mbii natuwu nosaongu rara ante Allatala. 16 Ikita dodo nanguncani pade mamparisaya towe nu Allatala si kita.
Allatala ee-mo towe. Tou to naponu ante towe, tou ee nosaongu rara oa ante Allatala pade Allatala mbii nosaongu rara ante tou ee. 17 Towe nipeganai ri rara katuwua-ta, bona ikita mabia ri Eo Potangaraa. Ikita kana mabia, sabana katuwu-ta ri dunia ei nasimbei ewa katuwu ni Kristus. 18 Ande towe lako ri Allatala ee naria ri rara-ta, natantumo ikita tado-mo maeka oa ri suku nu Allatala. Apaa towe to nagana mpuu nampakalipo eka. Yema to naekadapa natangara nu Allatala, natantu-yamo nampekiri koro-na masipato rasuku. Etumo tou to naeka ewa ee tadopa namparasai towe nu Allatala to nagana mpuu ee. 19 Ikita nepotowe, apaa Allatala nokoulu-mo nampotowe-ta. 20 Ande maria tou manguli: Yaku nampotowe Allatala, agiana ia nampodaa sarara-na, natantu-mo tou ee to naboa. Sabana tou to tado nampotowe sararana to nikalio-na ee, tado mamala mampotowe Allatala to tado nikalio. 21 Ee-mo sabana, ei-mo parenta to niwei ni Kristus si kita: Yema-yema nampotowe Allatala kana mampotowe sarara-na mbii.