Kaparisayaa nampadagi dunia
5
1 Ikita to nampangaku bakote i Yesus-mo Mbagou Topepakasalama, ikita mbii nampangaku Allatala najadi Tuama-ta. Pade ande ikita nampotowe Tuama, ikita mbii kana mampotowe ana-ana nu Allatala. 2 Ei-mo pampetonondi ande ikita nampotowe ana-ana nu Allatala: Ikita mampotowe Allatala pade matundu ri parenta-parenta-Na. 3 Sabana mampotowe Allatala natantumo natundu ri parenta-parenta-Na. Pade parenta-parenta-Na ee tado nantomo si kita. 4 Sabana butu dua ana nu Allatala mamala mampadagi dunia nadaa ei. Pade ikita mampadagi dunia ante kaparisayaa-ta. 5 Tado-namo yema mpuu to mamala mampadagi kadaa nu dunia ei. To mamalaa mampadagi kadaa nu dunia ei aga ikita to namparisaya bakote i Yesus-mo Ana nu Allatala.Posabiti nancambelai Ana nu Allatala
6 I Yesus Kristus ee dodo-mo to namei ri dunia. Ia nibaptis ante ue, pade raa-Na nibubu, pade namate. I Yesus Kristus namei ri dunia tado kawule ri rara nu ue bo raa, agiana ri rara nu Inosa to nanguli nuanu nakono, apaa Inosa ee tado naboa. 7 Naria totolu sabi: 8 Inosa Gasa nu Allatala, ue, pade raa. Sabi totolu ee nanguli posabiti to nasimbei. 9 Ikita namparisaya ri posabiti nu manusia, agiana posabiti nu Allatala neliu mbipa karosona. Ee-mo posabiti to niwei nu Allatala nancambelai ana-Na. 10 Butu dua tou to neparisaya ri Ana nu Allatala, nantarimamo posabiti ee ri rara-na. Agiana tou to tado namparisaya Allatala nampekiri bakote Allatala nobure boa-Na, sabana ia tado namparisaya nuapa niuli nu Allatala nancambelai Ana-Na. 11 Ei-mo posabiti ee: Allatala nambeika-tamo tuwu liu-liu, pade ana-Na pemberea ngkatuwua ee. 12 Tou to nantarima Ana nu Allatala, nantarima tuwu liu-liu. Pade tou to tado nantarima Ana nu Allatala, tado nantarima katuwua ee.
Kapandea nancambelai tuwu liu-liu
13 Sumaweena ee nitulisi-ku si komi to neparisaya ri Ana nu Allatala, bona ikomi manguncani bakote ikomi nantarimamo tuwu liu-liu. 14 Pade ikita nabia mampotomuka Allatala, apaa niparisaya-ta Ia nantarima perapia-ta, ande to niperapi-ta si-Ya mantutu dota-Na. 15 Apaa ikita nanguncani bakote Ia namparonge-ta ande ikita merapi si-Ya, nangkajadika ikita nanguncani mbii bakote Ia nambeika-ta nuapa to niperapi-ta siYa. 16 Ande ikomi mangkalio sadua sarara-mi mowia jeko to tado mamala mampakaronto tuwu liu-liu ee, ikomi kana mosambaya si Allatala, bona Allatala kana mambei katuwua ee si-ya. Naria mbii jeko to mamala mampakaronto tuwu liu-liu. Mancambelai tou to nowia jeko ewa ee, yaku tado manguli si komi bakote ikomi kana mosambayani-ya. 17 Sumawee inggu to nadaa ee-mo jeko, agiana naria jeko to tado mampakaronto tuwu liu-liu ee. 18 Ikita nanguncani bakote sumawee tou to najadi ana-ana nu Allatala-mo, tadomo oa mowia jeko, sabana Ana nu Allatala nantalendusi-ya, pade Mbagou Seta tado namala nowia nuapa-pa si kita. 19 Ikita nanguncani bakote ikita ei ana-ana nu Allatala, noudamo sumawee dunia ei niparenta nu Mbagou Seta. 20 Ikita nanguncani bakote Ana nu Allatala nameimo pade nambeika-tamo kapandea, bona ikita manguncani Allatala to nakono. Ikita natuwu nosaongu rara ante Allatala to nakono pade natuwu nosaongu rara ante Ana-Na i Yesus Kristus. Ei-mo Allatala to nakono, pade ei-mo tuwu liu-liu.
21 Sarara-sarara-ku, pakakawaomo koro-mu lako ri karampua-karampua.