3
1 Peirara-mo ei! Bona mincani, nabete mpuu towe nu Allatala si kita nangkajadika-ta niuli ana-ana nu Allatala! Kakono-konona ikita ana-ana nu Allatala ami-da. Ee-mo sabana dunia to nadaa ei tado nanguncani-ta, apaa dunia tado nanguncani Allatala. 2 Sarara-sarara to nipotowe-ku, tempo ei ikita najadi ana-ana nu Allatala-mo, agiana tadopa nincani-ta nuapa to majadi si kita ngoni. Agiana nincani-ta ri tempo karataa ni Kristus, ikita kana majadi ewa Ia apaa ikita kana mosintingayo ante Ia pade mangkalio inggu-Na to nakono. 3 Sumawee tou to nosarumaka ei si Kristus, mojagai koro-na bona mpuu-mpuu magasa, marawa lako ri jeko ewa i Kristus mbii nagasa. 4 Butu dua tou to nowia jeko, nangewa parenta nu Allatala, apaa nowia jeko nasimbei ante nangewa parenta nu Allatala. 5 Nincani-mida bakote i Kristus narata bona mogempu jeko-jeko nu manusia, pade Ia dodo mbii tado naria jeko-Na. 6 Sumawee tou to natuwu nosaongu rara ante i Kristus, tadomo nowia oa jeko. Tou to nowia oa jeko, tado naria nangkalio ba nanguncani mpuu-mpuu i Kristus. 7 Sarara-sarara to nipotowe-ku, nemo mipalambaka bayema-yema mpuu-mo mampakapusa komi. Yema nampowia dota nu Allatala, ia-mo ana nu Allatala, nasimbei ante i Kristus ana nu Allatala 8 Yema to nampowia oa jeko, ia-mo ana nu Mbagou Seta. Apaa lako ri paramulanamo Mbagou Seta ee nampowia jeko. Ee-mo pade naratamo Ana nu Allatala, bona mampakaropu bago nu Mbagou Seta. 9 Butu dua tou to najadi ana nu Allatala-mo, tadomo mampowia oa jeko, sabana inggu nu Allatala naria si-ya. Apa Allatala ee-mo Tuama-na, ee-mo sabana ia tadomo mamala mampowia oa jeko. 10 Ei-mo pontania ana-ana nu Allatala pade ana-ana nu Mbagou Seta. Bayema-yema to tado nampowia dota nu Allatala, ia tado ana nu Allatala. Iwee mbii, yema-yema to tado nampotowe sarara-na, ia tado ana nu Allatala.Towe ri sarara majadi pampetonondi katuwu nabou
11 Lako ri paramulana niparata-mo kareba ei si komi: Ikita kana mombepotowe sadua bo ntanina. 12 Ikita nemo ewa i Kain to najadi ana nu Mbagou Seta pade nopatesi tuei dodo-na. Nuapa pade nipatesimo ni Kain tuei-na? Apaa sumawee to nipowia ni Kain nadaa, agiana sumawee to nipowia nu tuei-na nakono. 13 Eemo sabana, sarara-sarara-ku, nemo mamoleara ande tou-tou ri dunia ei mampodaa komi. 14 Nincani-ta ande ikita nesuwu-tamo lako ri kamatea, pade noencu ri rara nu katuwua. Nincani-ta ee, apaa nampotowe-ta sarara-ta. Tou to tado nepotowe, batuana nikuasai nu kamatea-dapa. 15 Tou to nampodaa sarara-na nasimbei ante topepatesi. Nincani-mi bakote topepatesi tado mantarima tuwu liu-liu. 16 Ei-mo dalana bona tancani beiwa mampotowe sarara-ta: “Niweikata-mo ni Kristus tuwu-Na. Iwee mbii ikita kana mambei tuwu-ta ri sarara-sarara-ta.” 17 Ande maria tou to magana katuwu-na, pade nangkalio sarara-na masusa agiana tado madota-ya mantulungi sarara-na ee, natantu amimo tado naria towe nu Allatala si-ya. 18 Sarara-sarara-ku to nipotowe-ku, nemo kawule ri wiwi ba kawule ri lolita ngkola-ta manguli towe. Agiana ikita kana mepotowe ante kabuloli nu rara to narawa, to nikalio ri rara nu parabuata-ta.
Kaparisayaa ri ngayo nu Allatala
19 Iwee-mo dalana ikita manguncani bakote ikita ana-ana nu Allatala to nakono. Ee-mo sabana ikita mamala maroo rara-ta ri ngayo nu Allatala. 20 Apaa ande rara bongo-ta mampomasala-ta, nadeapa to nincani nu Allatala pade to nincani nu rara bongo-ta, pade ngila ngayana nincani nu Allatala. 21 Sarara-sarara to nipotowe-ku, ande rara bongo-ta tado mampomasala-ta, mamala-ta mamei ri ngayo nu Allatala ante tado maeka-eka. 22 Pade banuapa-pa to taperapi si-Ya, ikita kana mamparata, apaa ikita natundu ri parenta-parenta-Na pade nampowia nuanu to nampakawoe rara-Na. 23 Ei-mo to nipeparentai-Na si kita: Ikita kana meparisaya ri Ana-Na, i Yesus Kristus, pade ikita kana mombepotowe, ewa to niparentaka-ta ni Kristus. 24 Sumawe tou to natundu ri parenta-parenta nu Allatala, natuwu nosaongu rara ante Allatala, pade Allatala nosaongu rara ante isira. Pade nincani-ta bakote Allatala natuwu nosaongu rara ante ikita, apaa niwei-Namo Inosa-Na si kita.