I Kristus tonamposabira-ta
2
1 Ana-ana-ku to nipotowe-ku, yaku notulisi sura ei si komi bona ikomi nemo mowia jeko. Agiana ande maria to mowia jeko, naria tonamposambira-ta ri ngayo nu Tuama, Ia ee i Yesus Kristus to nanoa ee. 2 Ia-mo to nampakule mampakabebasi-ta lako ri suku nu jeko-ta. Ia tado kawule noampungi jeko-jeko-ta, agiana Ia mbii noampungi jeko-jeko nu sumawee tou to natuwu ri dunia ei. 3 Ande ikita matundu ri parenta-parenta nu Allatala, ee-mo pampetonondi bakote ikita nanguncani Allatala. 4 Agiana ande maria tou manguli: “Yaku nanguncani Allatala”, ntanono tou ee tado natundu ri parenta-parenta nu Allatala, natantu-mo tou ee naboa, pade Allatala tado naria ri rara-na. 5 Agiana tou to natundu ri lolita nu Allatala, tou ee nampotowe Allatala ante mpuu-mpuu. Ee-mo pampetonondi bakote ikita natuwu nosaongu rara ante Allatala. 6 Ande maria tou manguli bakote ia natuwu nosangkani ante Allatala, ia kana matuwu ewa i Kristus to natuwu-mo.Parenta to nabou
7 Sarara-sarara to nipotowe-ku, parenta to nitulisi-ku si komi ei tado parenta to nabou, agiana parenta to nasaemo. Parenta ei nitarima-mimo nopamula lako peparisaya-mi si Kristus. 8 Noudamo iwee, parenta to nitulisi-ku ei mamala mbii rauli parenta nabou. Kabou nu parenta ei mamala rakalio ri rara katuwu ni Kristus pade katuwu-mi. Apaa tempo kadedia mopamula marontomo, kabaasa to nakono nopamulamo newanta. 9 Ande maria sadua riolo-ta manguli, yaku natuwu ri rara nu kabaasana, agiana ia nampodaa sararana saongu kaparisaya, natantu ia natuwu ri rara nu kadedia-dapa duuna eo ei. 10 Agiana tou to nampotowe sararana saongu kaparisaya, natantumo ia natuwu ri rara nu kabaasana. Pade tou ewa ee tado mampowia tou ntani manawu ri rara nu jeko. 11 Agiana tou to mampodaa sararana saongu kaparisaya, ia ewa tou to nolumako ri rara nu kadedia pade tado nincani-na riumba kalouana. Sabana kadedia ee nampowia-ya tado-mo namala nangkalio nuapa-pa. 12 Yaku notulisi sura ei si komi ana-ana-ku bona mampopatora komi oa bakote jeko-jeko-mi niampungimo nu Allatala sabana nuanu nipowia ni Yesus Kristus. 13 Tuama-tuama, nitulisi-ku si komi, apaa nincani-mimo i Yesus to nariamo lako ri paramulana. Nitulisi mbii-ku si komi to nangura, apaa ikomi nampadagi Mbagou nu Seta. 14 Ana-ana-ku, nitulisi-ku si komi, apaa ikomi nanguncani-mo Tuama-ta. Nitulisi-kumo si komi tuama-tuama, apaa ikomi nanguncani-Yamo to naria amimo lako ri paramulana. Niutulisi-kumo si komi to nangura, apaa ikomi naroso pade lolita nu Allatala naria ri rara-mi pade ikomi nampadagimo Mbagou nu Seta. 15 Ikita nemo mampotowe nuanu nadaa to naria ri dunia pade ba nuapa mpuumo to naria ri rara nu dunia ei. Ande sadua mampotowe sumawee nuanu ri dunia, natantu-yamo tado mpuu nampotowe Tuama ri suruga. 16 Sumawee to naria ri rara nu dunia, ewa dota mowia nuanu nadaa apaa manusia najekomo, pade dota mowia nuanu nadaa to neumba apaa naopu nangkalio banuapa-pa, kalangko nu rara sabana kasugia to naria ri rara ngkatuwua, sumawee ee tado nabelo apaa tado lako ri Tuama, agiana lako ri dunia. 17 Dunia pade sumawee dota to nadaa nopamula narontomo. Agiana tou-tou to nowia dota nu Allatala kana matuwu dodo duuna masae-sae.
Bali ni Kristus
18 Ana-ana-ku, eo kaopua nu dunia majungkumo. Nipanguncanika ami-mo komi bakote bali ni Kristus kana marata. Ee-mo sabana nemo mamoleara komi ande ngkapuri ei madea meumba tou to nampobali i Kristus. Ee-mo pampetonondi bakote Eo Kaopu nu Dunia majungkumo. 19 Bali ni Kristus ee-mo tou-tou to nampawia-tamo, apaa isira tado ami tou-tou to namposambira-ta. Ande isira to namposambira-ta, tantu isira mamporoa oa-ta. Agiana isira nampawia-ta, bona manotomo bakote tado naria namo saduaa lako si sira to mpuu-mpuu namposambira-ta. 20 Agiana nitarima-mimo Inosa Gasa lako si Yesus Kristus. Ee-mo pade sumawee-mi nanguncani pepatuduki to nakono. 21 Yaku notulisi ei si komi, tado sabana ikomi tado nanguncani pepatuduki to nakono. Agiana nitulisi-ku ee apa nincani ami-mimo. Pade ikomi mbii nanguncani bakote tado naria boa ri rara nu pepatuduki to nakono ee.
22 Butu dua tou to nanguli bakote i Yesus tado Mbagou Topepakasalama to nitipa nu Allatala, natantu-mo tou ee bali ni Kristus, ia-mo toboa. Pade tou to ewa ee mbii nancapuaka Allatala Tuama bo Ana-Na. 23 Tou to tado nampangaku bakote i Yesus Ana nu Allatala, batuana ia tado nantarima Allatala. Agiana tou to nampangaku i Yesus Ana nu Allatala, natantu-yamo nantarima Allatala pade Ana-Na. 24 Ee-mo sabana, bolimo mpakabelo-belo ri rara-mi pepatuduki to nironge-mimo tempo-mi nopamula neparisaya. Ande pepatuduki ee mipeirara mpuu-mpuu, ikomi kana matuwu mosangkani oa ante Ana pade Allatala Tuama-Na. 25 Pade ei-mo to nitipa dodo ni Kristus si kita, Yaku kana mambei komi tuwu liu-liu. 26 Yaku notulisi ei si komi nancambelai tou-tou to nampesimbukui mampabagiu komi. 27 Agiana nancambelai koro dodo-mi, nemo ngoni napatuduki komi nu tou ntani, sabana nitarima-mimo Inosa Gasa lako si Kristus. Apaa Inosa Gasa ee dodomo mopatuduki komi mancambelai ngila ngayana. Pade nuanu to nipatudukika-Na komi nakono, tado boa. Ee-mo sabana ikomi kana mosaongu rara oa ante i Kristus ewa to nipatudukika komi nu Inosa Gasa.
Ana-ana nu Allatala
28 Jadi, ana-ana-ku to nipotowe-ku, katuwumo mosangkani oa ante i Kristus, bona tempo-Na marata mpanculi, ikita kana mampotomuka-Ya tado maeka bo maeya. 29 Nincanimi-mo bakote i Kristus natuwu nantutu dota nu Allatala. Ee-mo sabana ikomi kana manguncani mbii bakote butu dua tou to natuwu nantutu dota nu Allatala, isira-mo ana nu Allatala.