Sura ni Yohanes Paramulana
Posabiti nu suro nancambelai lolita nu Allatala
1
1 Isi nu sura ei nancambelai lolita to nambei katuwua, pade to naria amimo sintou tadopa nipajadi dunia ei. Nironge-kamo pade nikalio-kamo ante mata dodo-ka. Nikalio-kamo, pade nikakamu-kamo ante pale dodo-ka. 2 Kakono-konona, tempoo ei ikami nosabiti pade noparata si komi nuapa to nironge-ka impia pade to nikalio-ka nancambelai tuwu liu-liu to naria ri rara nu Allatala Tuama-ta, to impia nipopakalio si kami. 3 Nuapa to nikalio-ka pade nironge-ka, ee mbiimo to kaparata si komi, bona ikomi moroa ante ikami mamparasai katuwu mosangkani ante Tuama bo Ana-Na i Yesus Kristus. 4 Ee-mo sabana ikami notulisi sura ei si komi, bona rara-ta mpuu-mpuu madonu.Allatala-mo to nabaa
5 Pade ei-mo kareba to nironge-kamo lako ri Ana nu Allatala pade niparata-ka si komi: Allatala ee-mo kabaasana, pade tado mpuu naria kadedia nuapa-pa si-Ya. 6 Ande ikita manguli bakote ikita nosangkani ante Ia, agiana ikita natuwu ri rara nu kadedia, natantumo ikita naboa ri rara nu pololita pade parabuata-ta. 7 Agiana, ande ikita matuwu ri rara nu kabasana ewa Allatala natuwu ri kabasana, natantumo ikita matuwu masiumpu, mosingkabelo sadua ante ntanina pade raa ni Yesus, Ana-Na nampakagasa-ta lako ri sumawee jeko. 8 Ande ikita manguli bakote ikita tado najeko, natantumo ikita nobagiu dodo koro, pade Allatala tado naria ri rara-ta. 9 Agiana ande ikita mampangaku jeko-jeko-ta si Allatala, Ia kana mampopekalio bakote Ia mamala raparisaya pade Ia nanoa. Ee batuana bakote Ia noampungi sumawee jeko to nipowia-ta. 10 Ande ikita manguli bakote tado naria-ta nowia jeko, natantu-mo ikita nanguli Allatala naboa. Ee batuana bakote ikita tado mpuu nobila lolita-Na.