4
1 I Kristus nantodosakamo kapepaa ri kou salib. Ee-mo sabana ikomi mbii kana masadia mantodosaka kapepaa pade mampowia nuanu ewa ni powia ni Kristus. Tou to nantodosaka kapepaa ri dunia ei kana madota mampawia jeko. 2 Etumo sabana, ikomi kana matuwu ri dunia ei mantutu dota nu Allatala, pade tado mantutu dota nu manusia. 3 Ri eo nasaemo naliu, nadeamo nuanu nadaa nipowia-mi ewa tou-tou to tado nanguncani i Pue. Ikomi tado natuwu nabelo. Ikomi nantutu dota rara dodo-mi, samata nalangu, noangka bago nampakasana katuwu-mi, pade nenomba ri karampua to nipetagii. 4 Ee-mo sabana tou-tou to tado namparisaya Allatala ee nabatoro nangkalio komi. Isira nangkanene komi apaa ikomi tadomo nadota nampogalo-ra bona mowia nuanu nadaa ewa to nipobelo-ra nowia. 5 Agiana isira ngoni kana mamboikaka tanggu jawa-ra si Allatala to nasadiamo mosuku tou to natuwu pade to namate. 6 Ee-mo patuju ni Kristus noparata Kareba Belo ri tou-tou to namatemo, apaa isira kana ratangara, nasimbei ewa sumawee tou. Agiana ngoni isira mamala matuwu ewa katuwu nu Allatala.Katuwu toKarasitee
7 Kaopua nu ngaya ngilana majungkumo, etumo sabana ikomi kana mojaga koro-mi pade mainga bona ikomi mamala mosambaya. 8 Pelabiana lako ee ikomi kana mombepotowe mpuu-mpuu sadua bo ntanina, sabana towe ewa ee-mo nadea mpuu nogempu jeko. 9 Ikomi kana mombetarima sadua bo ntanina ri sou-mi, ante tado mokangua. 10 Ikomi sore-sore nantarimamo rasi lako ri Allatala. Pake sumaweena ee ante belo-belo. Jadi pakemo rasi ee bona mantulungi singkapada manusia-mi. 11 Tou to nangkeni kareba, kana moparata kareba lako ri Allatala, tou to nolayani tou ntani, kana melayani ante karosoa lako ri Allatala, bona ri sumawee ngila ngayana, Allatala rapemabose ri rara ni Yesus Kristus. Ia-mo to nakuasa pade to masipato rapemabose duuna masae-sae. Amin.
Mapepa ewa toKarasite
12 Sarara-sarara to nipotoweku! Ngkapuri ei komi napepa mpuu apaa ranca-mi nipesori. Agiana nemo mamoleara, pade manguli naria nuanu nabete najadi si komi. 13 Pegoliana ikomi kana madonu apaa netutu nantodosaka kapepaa noroa-roa ante i Kristus, bona ngoni ande pampemabose i Kristus rapopakalio, ikomi kana madonu. 14 Ande tou mangkanene komi apaa ikomi nantutu i Kristus, ikomi kana madonu. Ei-mo to kana mowia komi manguncani bakote Inosa Gasa nu Allatala to nakuasa ee natuwu ri rara-mi. 15 Nemo maria saduaa lako riolo-mi mantodosaka kapepaa apaa nepatesi, ba mangio, ba najadi tou nadaa, ba nogalo urusia nu tou ntani. 16 Agiana ande ikomi mantodosaka kapepaa sabana ikomi toKarasitee, nemo rapokaeya nuanu ee. Ulimo nadea belo ri Allatala bakote ikomi nangkeni sanga ni Kristus. 17 Naratamo tempona Allatala motangara dunia. Pade todea nu Allatala dodomo to kana ratangara mokoulu. Pade ande Allatala mopamula potangara-Na si kita, beiwamo ngoni kajadiana ante tou-tou to tado neparisaya ri Kareba Belo lako ri Allatala ee? 18 Ri rara nu Buku Nagasa nitulisi ewa ei:
“Ande tou-tou to nabelo nakaja rapakasalama,
beiwa mo ngoni jadina ante tou-tou najeko to tado nanguncani i Pue!”
19 Etumo sabana bakote tou-tou to mantodosaka kapepaa apaa natundu ri Allatala kana mowia nuanu nabelo oa. Ante eemo, isira nambei mpuu-mpuu koro-na ri Allatala to nopajadi-ra. Allatala nopadupa oa potipa-Na.