Katuwu sangkani nu tou noncamboko
3
1 Nasimbei ewa toKarasitee to kana matundu si Kristus, iweetu mbii ikomi bangkele-bangkele kana matundu ri baleilo-mi. Bona ande baleilo-mi tado namparisaya kareba lako ri Allatala, inggu-mi ee mamala mowia-ra megoli meparisaya. Tado mingki miuli ba nuapa-pa si sira, 2 apaa ande rakalio-ra ikomi natundu ri Allatala bo noinggu nabelo, isira mbii kana meparisaya. 3 Nemo kagaya-mi kawule ri sawaliku ngkolana, ewa mampakagaya wulua ba mampake ramba-ramba bulawa, ba mowaru masuli-suli. 4 Agiana kagaya-mi meumba lako ri rara-mi, moinggu madole bo manondo. Ee-mo kagaya to tado mamala malipo pade nasuli mpuu olina ri pangkalioa nu Allatala. 5 Apaa impia iwee mbiida bangkele-bangkele to namparisaya Allatala nampakagaya woto-ra ante natundu ri baleilo-ra, 6 ewa i Sara natundu si Abraham pade nipokio-na maradika. Tempo ei ikomi najadi ana-ana ni Sara ande ikomi mowia inggu-inggu to nabelo pade tado maeka ri banuapa-pa. 7 Ikomi mbii baleilo-baleilo, ikomi kana matuwu maponu ante pekiri mabelo ri bangkele-mi, apaa isira tado naroso ewa baleilo. Bilamo bangkele-mi, apaa isiramo roa-mi to kana mantarima tuwu liu-liu lako ri Allatala. Powiamo sumawee ee bona tado maria nuanu molawa sambaya-mi.
Towe pade kasintundu
8 Kaopuana, ikomi kana mampekiri masimbei nancambelai nuapa to kana mi-powia. Ikomi kana mombepotowe ewa toposarara. Ikomi kana mosingkabelo, pade tado malangko rara. 9 Ande tou mowia nuanu nadaa si komi, ikomi tado mamala mowia nuanu nadaa si sira. Ande tou mangkanene komi, tado mamala komi mangkanene-ra. Agiana ikomi kana merapi bona Allatala mantiroi tou ee, apaa Allatala nampokio komi bona mantiroi tou ntani. Ante ee-mo Ia mbii kana mambei petiroi si komi. 10 Ri rara nu Buku Nagasa nitulisi ewa ei,
“Yema to madota mabelo katuwuna
pade madota masana butu eona,
ia kana mampesimbukui bona tado manguli lolita-lolita to nadaa ri tou ntani,
pade meuntu maboa.
11 Tou ee kana meuntu mowia jeko, pade mowia nuanu nabelo.
Ia mbii kana mampesimbukui mpuu-mpuu bona matuwu mosingkabelo ante tou ntani.
12 I Pue nopasisi tou-tou to nowia nuanu nakono, pade namparonge bo nosonoi sambaya-sambaya-ra.
Agiana i Pue mosuku tou-tou to nowia nuanu nadaa.”
Mancabara ri rara nu kapepaa
13 Yemamo to madota mowia nuanu nadaa si komi, ande ikomi nowia nuanu nabelo oa? 14 Agiana noudamo ikomi kana mantodosaka kapepaa apaa nowia nuanu to nabelo, naria-da bunduna si komi! Nemo maeka basiyema-yema, pade nemo mokantabu rara. 15 Ante rara mpuu-mpuu ikomi kana menomba si Kristus pade mampabila-Ya apaa Ia-mo i Pue! Ntanina lako ee, ikomi kana masadia oa mopanotosi ri sumawee tou to nerapi popanotosi nancambelai nuanu to nisarumaka-mi ante mpuu-mpuu ee. 16 Agiana kana mi-powia ante madole pade mebila. Jagaimo bona rara-mi marawa dodo. Jadi ande maria tou mangulikaka komi bakote ikomi nadaa noudamo ikomi nowia nuanu nabelomo najadi topantutu i Kristus, tou ee kana maeya dodo napowia nu lolita-na ee. 17 Aginamo mantodosaka kapepaa apaa nowia nuanu nabelo ande eemo dota nu Allatala, agiana nemo mantodosaka kapepaa apaa nowia nuanu nadaa. 18 Apaa i Kristus namate sangkani ngkola duuna masae-masae sabana jeko nu manusia. Tado naria jeko-Na, agiana Ia nangkamateka tou to najeko, bona mamala-Ya moniniri-ta malou ri Allatala. Tou-tou nopatesi-Ya tempo-Na noinggu ewa manusia, agiana nipatuwu mpanculi-Ya ante kuasa Inosa Gasa. 19 Pade nikeni-Yamo nu Inosa Gasa nalou nampopowole Kareba Belo ri inosa-inosa to nitarungku ri dunia ntomate, 20 inosa ee-mo inosa nu tou-tou to tado natundu si Allatala ri tempo katuwua ni nabi Nuh ngkoulu. Tempo ee Allatala ante pancabara-Na nampopea i Nuh nowia duanga bete. Agiana kawule uwalu ngkola tou to namala nesua ri rara nu duanga bete ee, to nipakasalama nu Allatala lako ri ue bose ee. 21 Ee-mo sabana, kajadia ee najadi porapaika lako ri pebaptis bona mampakasalama komi ri tempo ei. Pebaptis ei tado bona mampakarawa koro lako ri sumawee nuanu to narumu, agiana najadi potipa-mu ri Allatala lako ri rara to nabelo. Pebaptis ee mampakasalama komi apaa i Yesus kristus natuwu mpanculimo lako ri kamatea, 22 pade nentode ri suruga. Tempo ei Ia nakuasa noroa ante Allatala pade noparenta sumawee malaeka, sumawee to nakuasa pade sumawee nuanu naroso.