I Yesus Kristus eemo parawatu
2
1 Etumo sabana, tadiakamo lako ri koro-mi sumawee inggu nadaa, nemo oa maboa, pade nemo mabelo wongko. Nemo masingki rara, pade nemo mokanene tou ntani. 2 Ikomi kana moinggu ewa ngana kodi lako niote, to nampodota oa ue ncusu nu tina-na. Ue ncusu ee lolita nu Allatala. Ande ikomi manginu oa ue ncusu ee, ikomi mamala matuwu pade rapakasalama. 3 Apaa ri rara nu Buku Nagasa nitulisi ewa ei: “Ikomi namparasaimo dodo bakote i Pue nabelo si komi” 4 Etumo sabana, kameimo si Pue. Ia ewa watu to natuwu, watu to nitadiaka nu manusia apaa nipekiri-ra tado naria guna-na, agiana Allatala nampelisi-Ya najadi watu to nasuli. 5 Ikomi mbii ewa watu to natuwu ee. Etumo sabana, kameimo si Kristus. Ante iwee-mo komi masimbei ewa watu to nipelisi nu Allatala bona mopatinda Sou nu Allatala. Ikomi kana mobago isee pade majadi tobalia-tobalia, to natuwu nipatanika Allatala. I Yesus Kristus nampowia komi mamala moparata penomba to nagasa mantutu dota nu Allatala. 6 Apaa ri rara nu Buku Nagasa nitulisi ewa ei:“Kakono-konona, niboli-Kumo ri Sion saongu watu to nipelisi,
saongu parawatu to nasuli,
pade yema to mamparisaya-Ya tado rapakaeya.”
7 Etumo sabana si komi to neparisaya, watu ee nasuli mpuu, agiana si isira to tado neparisaya, nadupamo lolita ei:
“Watu to nitadiaka nu basi,
najadi parawatumo,
pade watu ee nowia tou natetancunu,
pade nampakadungkara.”
8 Isira natetancunu apaa tado niparisaya-ra lolita nu Allatala. Ewa eemo to nipakatatapu nu Allatala si sira.
9 Agiana ikomimo todea to nipelisi, tobalia-tobalia to nolayani Mbagou, todea to nagasa, nipatani nu Allatala, todea nu Allatala dodo. Allatala nampelisi komi pade nampokio komi mesuwu lako ri kadedia bona mesua ri rara nu kabaasana to newanta, ante patuju bona ikomi mampopowole kareba nancambelai parabuata-parabuata-Na to neliu mpuu.
10 “Impia komi tado todea nu Allatala,
agiana ngkapuri ei, ikomi najadimo todea nu Allatala.
Impia komi tado nipotowe nu Allatala,
agiana ngkapuri ei, ikomi nantarimamo towe rara-Na.”.
Pepopatora bona matuwu ewa batua nu Allatala
11 Sarara-sarara to nipotowe-ku! Ikomi torata pade to peodo ngata ri dunia ei. Etumo sabana kuperapi mpuu-mpuu si komi, nemo mantutu dota rara-mi to nangewa dota nu inosa-mi. 12 Ikomi kana moinggu mabelo riolo nu tou-tou to tado namparisaya Allatala. Bona ande rakanene-ra komi ewa tou daa, isira kana mampomole bagomi to nabelo, mangkajadika-ra kana mangune Allatala ri eo karata mpanculi-Na.
13 Ri rara nu sanga ni Pue, ikomi kana matundu ri sumawee tou-tou to nipangka: Ri Mbagou Bete to najadi topoparenta to neliu nalangko, 14 iwee mbii ri gubernur to nitudo nu Mbagou Bete bona mosuku tou to nowia nuanu nadaa pade mampabila tou to nowia nuanu nabelo. 15 Sabana Allatala madota bona ante inggu-inggu-mi to nabelo ikomi nowunta wiwi ntou to nololita nadoyo. 16 Ikomi kana matuwu ewa tou nabebasi, agiana nemo mampake kabebasi-mu ee bona mowunta nuanu nadaa, agiana katuwumo ewa batua nu Allatala. 17 Bilamo sumawee tou, potowemo sarara-sarara-mi singka toKarasitee. Kaekamo si Allatala, pade bilamo Mbagou Bete.
Kapepaa ni Kristus rapajadi jonjo
18 Sarara-sarara to najadi batua, katundumo ri maradika-mi ante pebila mpuu-mpuu-mi, tado kawule si sira to nabelo rara pade nanondo, agiana si sira mbii to naseke. 19 Allatala kana mantiroi komi, ande ikomi manguncani bakote Allatala namporoasi komi, bona ikomi mancabara oa ri tempo mangkolo kapepaa noudamo kapepaa ee tado masipato mi-rasai. 20 Sabana nuapamo bunduna ande ikomi mancabara mangkolo kapepaa to kana mi-tarima apaa nasala? Agiana ande ikomi ante mancabara mangkolo kapepaa to mi-rata apaa nowia nuanu nakono, i Pue kana mantiroi komi. 21 Ee-mo sabana Allatala nampokio komi, apaa i Kristus mbii nangkolo kapepaamo bona mantulungi komi, pade nambei jonjo si komi, bona ikomi mantutu inggu-Na.
22 “Tado naria-Ya nowia jeko,
pade tado naria-Ya nebagiu.”
23 Tempo-Na nikanene nu tou, tado nibalasi-Na ante nangkanene-ra. Tempo-Na nantodosaka kapepaa tado nasodo-Ya, Ia kawule noparata kara-kara-Na ri Allatala, Topotangara to nanoa ee. 24 I Kristus dodomo to nantodosaka kapepaa ri kou salib apaa nangkolo jeko-jeko-ta, bona ikita tadomo mowia jeko oa. Ante ee-mo ikita mamala matuwu mantutu dota nu Allatala. Ikomi nipakaorimo apaa bela-bela ni Kristus nampakaori komi. 25 Impia komi ewa bimba to napusa, agiana ngkapuri ei komi nikeni nculimo bona mantutu Topoewu. Ia-mo to nopasisi pade notalendusi komi.