Sura ni Petrus to Paramulana
Tabe pamulana
1
1 Lako si Petrus, suro ni Yesus Kristus. Sura ei nipakatu ri tou-tou to natida ri ngata ntani to nipelisi nu Allatala pade natida ri provinsi-provinsi: Pontus, Galatia, Kapadokia, Asia kodi pade Bitinia. 2 Ikomi nipelisi najadi todea nu Alllatala nantutu liwo nu Allatala, Tuama-ta. Pade Inosa Gasa nopajadimo komi todea to nagasa, to nipatanika Allatala, bona ikomi matundu si Yesus Kristus. Sabana i Yesus Kristus namate ri kou salib, nangkajadika Allatala noampungi komi. Towe rara pade kasanaa lako ri Allatala ratambeika komi duuna melabi-labi.Pancarumakaa, peparisaya pade towe
3 Tumei-tamo mosukuru ri Allatala, Tuama ni Pue-ta i Yesus Kristus to ante asi rara-Na, nambeika-ta tuwu to nabou ante katuwua mpanculi ni Yesus Kristus lako ri kamatea. Nuanu ei nambei-ta sarumakaa to naroso. 4 Ee-mo sabana ikita nanguncani bakote ikita kana mantarima rasi to nipasadiaka-tamo nu Allatala ri suruga. Rasi ee tado mamala maropu, tado mamala mawou, pade tado mamala mobali. 5 Sumaweena ee raweikaka komi, apaa ikomi namparisaya Allatala. Pade ikomi rajagai ante kuasa nu Allatala bona ikomi mantarima kasalamaa to nasadiamo rapopakalioka komi ri Eo Kaopu nu Dunia ngoni. 6 Etumo sabana ikomi kana masana rarami, noudamo ngkapuri ei basangkia ntempo komi kana masusa apaa ikomi mamparata ngila-ngaya nu pesori. 7 Patujuna ee bona mopadupa ba mpuu-mpuu-da komi neparisaya si Pue ba tado. Bulawa to namala narusa, nitunu ante apu. Peparisayami neliupa olina lako ri bulawaa, jadi kana rapesori mbii bona majadi maroso. Pade ante ee-mo komi kana raune bo rabila pade rapemabose ri eo ni Yesus Kristus marata mpanculi. 8 Ikomi nampotowe-Ya, noudamo impia komi tado nangkalio-Ya. Pade ikomi neparisaya si-Ya noudamo ngkapuri ei ikomi tado-mo nangkalio-Ya. Etumo sabana ikomi nadonu, pade namparasai kasanaa to neliu mpuu pade to tado namala rauli. 9 Ikomi nasana apaa Allatala nampakasalama komi. Nuanu ee najadi apaa ikomi neparisaya pade natundu si Kristus. 10 Kasalamaa eimo to niparesa mpuu-mpuu pade nipekuku nu nabi-nabi, pade isira nampopokarebamo bakote kasalaama ei kana nawei nu Allatala si komi. 11 Isira noparesa mpuu-mpuu beiwa pade neipia kasalamaa ee kana madupa, mantutu Inosa ni Kristus. Inosa ni Kristus nobago ri rara nu koro-ra. Inosa ee-mo to nanguli si sira bakote i Kristus kana mapepa. Agiana maopu ee Allatala kana mampemabose-Ya. 12 Allatala nampopanguncanikamo nabi-nabi ei bakote kareba ee tado kawule si sira dodo, agiana niweika mbii-da ikomi. Nirongemi-mo kareba ee lako ri tou-tou to noparata si komi. Tou-tou ei noparata ante kuasa Inosa Gasa nu Allatala to nitudu lako ri suruga. Malaeka-malaeka mbii madota manguncani kareba ee.
Kagasa pade towe mosarara
13 Etumo sabana, ikomi kana mampasadia pekirimi pade mainga oa. Ikomi kana motahangi rara-mi. Ikomi mbii kana mpuu-mpuu mancarumaka bakote Allatala mantiroi komi ri tempo karata mpanculi ni Yesus Kristus ngoni. 14 Katundumo ri Allatala, pade nemo matuwu mantutu dota-mi to impia, tempo-mi tadopa nanguncani Allatala. 15 Pegoliana, ikomi kana magasa ri rara nu ngila-ngaya to nipowia-mi, nasimbei ante Allatala to nampokio komi ee mbii nagasa. 16 Ri rara nu Buku Nagasa nitulisi: “Ikomi kana magasa, apaa Yaku mbii nagasa.”
17 Ikomi nangkasangai Allatala ee Tuama. Ee-mo sabana ikomi kana mampabila Allatala sinungkami matuwu ri dunia ei. Ikita nanguncani bakote Ia nobotusi kara-kara nu sumawee tou ante nanoa pade tado neposambira. Ia notangara butu dua manusia nantutu nuanu to nipowia-ra. 18 Ikomi nanguncanimo nuapa to nipopotolosi bona mampakabebasi komi lako ri katuwua to tado naria gunana to nipoadaka-mi lako ri totua-mi. Potolosi ee tado nuanu mamala magero ewa salaka ba bulawa, 19 agiana nuanu to nasuli mpuu olina, ee-mo koro dodo ni Kristus to namate ewa sambaa ana bimba to tado naria kakerutana najadi tinuwu ri Allatala. 20 I Kristus nipelisi nu Allatala sintou tadopa nipajadi dunia. Pade ri eo-eo mapara kaopua nu dunia ei, Ia narata ri dunia bona ikomi rapakasalama. 21 Allatala to nopatuwu nculimo i Yesus Kristus lako ri kamatea pade mampemabose-Ya. Ri rara ni Yesus ee mbiimo ikomi namparisaya Allatala pade nancarumaka bakote Allatala kana mampeponui potipa-Na.
22 Ikomi nantutumo pepatuduki to nakono nancambelai i Yesus Kristus. Jadi tempo ei ikomi nipakagasamo lako ri jeko-jeko-mi. Etumo sabana ikomi kana mampotowe sarara-sarara-mi to neparisaya si Pue ante rara mpuu. Ikomi kana mombepotowe oa. 23 Ikomi kana mombepotowe, apaa ikomi nantarimamo tuwu to nabou. Ikomi nantarima tuwu to nabou ee tado lako ri manusia to mamala mamate, agiana lako ri Allatala to tado mamala mamate. Ikomi nantarima tuwu to nabou ri rara lolita nu Allatala to nakuasa pade tado naria pobaliana. Lolita ee lako ri Allatala. 24 Ri rara nu Buku Nagasa nitulisi ewa ei:
“Sumawee manusia ewa kawoko,
pade sumawee karambana ewa sese nu kawoko.
Kawoko nalalo, sese mbiina nanawu,
25 agiana lolita nu Allatala bate-batena duuna masae-sae.”
Lolita ee-mo Kareba Belo to niparata si komi.