Ewu-mo bimba nu Allatala
5
1 Yaku modederi sumawee topangkeni todea nu Allatala. Nasimbei ante ikomi, yaku mbii sadua topangkeni todea nu Allatala. Ntanina lako ee yaku mbii nangkalio matamo kapepaa ni Kristus tempo-Na nantodosaka kapepaa. Yaku mbii kana metutu moroa ante i Kristus tempo nu Allatala mampemabose i Kristus ri ngayo nu sumawee tou ngoni. Kuperapi si komi, 2 bona ikomi moewu bimba to niwei nu Allatala si komi, nemo ante kantomo nu rara, agiana ante donu rara ewa to nipodota nu Allatala. Nemo mowia bago-mu bona mamparata tombo, agiana apaa ikomi mpuu-mpuu madota molayani-ra. 3 Nemo moinggu ewa to nakuasa ri tou-tou to niparisayaka komi mi-urusi, agiana pakabelo inggu-mi rakalio-ra, bona mamala ratutu-ra. 4 Pade tempo ni Kristus, Topoewu Bete ee marata ngoni, ikomi kana mantarima makota pampemabose to tado mamala mausa. 5 Iwee mbiimo sarara, tou-tou to nangura, katundumo ri tou-tou natuamo. Ikomi sumawee nemo malangko rara-mi pade mombelayani ante maede rara. Sabana ri rara nu Buku Nagasa nitulisi ewa ei,“Allatala nampodaa tou to nalangko rara-na,
agiana nampotowe tou to tado nalangko rara-na.”
6 Ee-mo sabana, nemo malangko rara-mi ri ngayo nu Allatala to nakuasa, bona Na-pemabose komi ande maratapa tempona. 7 Weikakamo pura nuapa nipokantabuka nu rara-mi ri Allatala, apaa Ia-da to nopasisi komi. 8 Ikomi kana mainga pade masadia oa! Sabana Mbagou nu Seta bali-mi. Ia ewa singa nolumako welou bo tumei nogoroo nangonco tou to napatesi pade nakondi. 9 Ewa-yamo ante peparisaya to naroso, sabana ikomi nanguncani bakote sarara-sarara singka to Karasite ntanina ri dunia ei mbii mangkolo kapepaa nasimbei ewa ikomi. 10 Ikomi mantodosaka kapepaa singoni ngkola, agiana maopu ee Allatala dodomo kana mampakabelo ngila ngayana si komi. Ia kana mojagai komi bona ikomi mancabara dodo, matundu oa pade mamparisaya i Kristus. Ia kana mampowia apaa Ia nabelo mpuu. Ia nampokio komi bona ikomi mamala mamparata bagia ri rara nu kuasa to niwei nu Allatala si Kristus duuna masae-sae. 11 Ia-mo to nakuasa duuna masae-sae! Amin.
Tabe kaopuana
12 Sura-ku to tado nalanga ei kutulisi si komi ante petulungi ni Silwanus, to nipajadi-ku sadua sarara to Karasite to natundu pade niparisaya-ku. Yaku madota mampakaroso rara-mi bakote nuanu to nitulisi-ku ei, kareba to nakono nancambelai towe rara nu Allatala. Ikomi kana mangkakamu mpuu towe rara ee.
13 Tou-tou to Karasitee ri Babilon nopakatu tabe-ra si komi. Isira mbii nipelisi nu Allatala. Pade i Markus, roa-ku sampobagoa, to niongko-ku najadi ana-ku, nopakatu mbii tabe-na si komi. 14 Pombetabemo komi sadua bo ntanina ante towe ewa sarara to Karasitee.
Kasanaa lako ri Allatala mamporoasi komi pura to neparisaya si Kristus. Amin.