Pedederi bona matundu ri rara nu kaparisayaa
12:1-17
12
1 Nadea mpuu tou to nosabiti katuwu-ta. Etumo sabana, ikita kana motadiaka sumawee nuanu to nampakantomo-ta. I kita mbii kana motadiaka sumawee jeko to nerika oa ri koro-ta. Pade ante mpuu-mpuu kamei-tamo mantutu posilumba to nipakatatapu-mo kana ta-tutu. 2 I kita kana mosilumba ante mata mangolole i Yesus, to nampowia-ta namparisaya Allatala pade to nangkeni oa-ta bona meparisaya dodo duuna kaopuana. I Yesus nantodosakamo kapepaa ri kou salib. Noudamo tou ntani nangkanene-Ya, tado nipeirara-Na. Ia nanguncani bakote Allatala kana mampowia-Ya masana maopu ee. Ngkapuri ei-Ya naria ri pearia to nibila mpuu ri suruga mbira ri ngkana nu Allatala pade noparenta noroa ante Allatala. 3 Toramo beiwa i Yesus nancabara dodo nampongayo tou-tou to najeko to mpuu-mpuu nangewa-Ya. Pekirimo nuapa to nitodosakamo ni Yesus, bona ikomi maroso dodo pade tado masue rara-mi. 4 Sabana ri rara nu pampesimbukui-mi nangewa jeko, tadopa naria komi nampesimbukui duuna nampopesuwu raa. 5 Pade nemo mangkalingani pedederi nu Allatala ei, to niwei si komi ana-ana-Na:“Ana-Ku, nemo mi-pandaente pepatuduki ni Pue,
pade nemo makodi rara-mi ande Na-posodo komi.
6 Sabana i Pue nampaduasi butu dua tou to nipotowe-Na,
pade Ia nosalapea butu dua tou to nipangaku-Na najadi ana-Na.”
7 I komi kana mancabara mantutu pepatuduki nu Allatala. Kakono-konona ikomi nipotowe nu Allatala ewa ana dodo-Na. Tado namo saduaa ngana to tado nipatuduki mpuu nu tuama-na. 8 Ande i komi tado rapatuduki nu Allatala, batuana ikomi tado ana ngkoro-Na, agiana ikomi kawule ewa tado ana ngkoro. 9 Naria tuama-ta ri dunia ei. Ia nopatuduki-ta, pade ikita nampabila-ya. Noudamorauli Tuama-ta ri suruga, tantu kana meliu ntotopa katundu-ta si-Ya bona matuwu-ta. 10 Tuama-ta ri dunia ei nopatuduki-ta singoni ngkola-da. I sira nopatuduki-ta nantutu nuapamo to nipekiri-ra nabelo. Agiana Allatala nopatuduki-ta bona mantulungi-ta mamparata kagasaa ewa Ia dodo. 11 Tado ami nasana rara-ta ande mamparata pepatuduki to nakarasi, apaa pepatuduki ee nepakadua mporara. Agiana maopupa pepatuduki ee, ikita kana majadi matuwu ante kasanaa, apaa ikita nopamulamo natuwu ante nowia nuanu nakono.
12 Etumo sabana, pakarosomo pale-ta to nalede pade wukotu-ta to nokasiridi. 13 Pade polumakomo oa mantutu dala narano, bona paa-mi noteda ee tado matebancilu, agiana majadi mabelo mpanculi.
14 Pesimbukuimo matuwu mosingkabelo ante sumawee tou. Pade pesimbukui mbiimo mangkawaosi jeko. Apaa tou to tado madota mangkawaosi jeko tado mamala mangkalio Allatala. 15 Jagaimo belo-belo bona nemo maria saduaa komi to mampawia Allatala to nampotowe mpuu-ta. Pade jagai belo-belo mbii bona nemo maria dua rara to meumba riolo-mi. Etu nasimbei ante rasu, to mampakasusa komi pade mampakagero katuwu nu tou dea. 16 Jagaimo belo-belo bona tado maria to matuwu mogousala ba tado mampabila nuanu to nipatani, ewa to nipowia ni Esau. I Esau nobalu kaulumbua-na bona mamparata saloya kondia. 17 Apaa nincani-mida nuapamo to najadi naopupa ee. I Esau ei madota mancosora rasi ee, agiana tadomo namala-ya nancosora. Noudamo ante keo-keo-na nampesimbukui bona mamparata, agiana tado mpuumo nirata-na kalogaa bona mampowiaki nuapa to najadimo ee.
Tanggujawa to nantomo
18 Sabana ikomi narata tado ewa to Israel impia, narata ri nuanu to mamala rakakamu. Ikomi narata tado bona mangkalio apu to nengkalalaa, kadedi mbongoa ba ngolu mpamburu. 19 Pade ikomi mbii narata tado ewa i sira to namparonge oni nu tabue to narimbuku mpuu pade namparonge Allatala nololita. Ranca nu to Israel namparonge Allatala nololita, i sira nerapi bona nemo oa mololita Allatala si sira noudamo sangkani ngkola. 20 Apaa tado nantahangi-ra mamparonge wotu nu Allatala manguli ewa ei: “Sumawee to motui bulu ei, ba binata ba manusia mpuumo, kana rawunu ante watu duuna mamate.” 21 Pade nuanu to nikalio-ra ee nampowia-ra naeka mpuu, nangkajadika niulimo ni Musa: “Nokasiridi pura-ku notahangi eka-ku.” 22 Agiana ikomi ei, naratamo ri Bulu Sion. Eemo Yerusalem to ri suruga, pearia nu Allatala to natuwu noroa ante malaeka-Na, to rinjobuna kadeana. 23 Pade ikomi naratamo bona mampotomu tou dea ee, to ewa potobua nu ana-ana ulumbua nu Allatala. Sanga-ra nariamo ri suruga. Ikomi naratamo bona motomu ante Allatala, to mantangara sumawee tou. Ikomi naratamo bona motomu ante tou-tou nakono to namatemo, to nipakaganamo nu Allatala. 24 Pade ikomi narata bona motomu ante i Yesus Kristus. Iya-mo to pangkeni potipa to nabou lako ri Allatala. Ikomi mbii narata bona mantarima pesiwe nu raa-Na to nampakagasa-ta. Raa ee nambei petolosi to nabelopa lako ri raa ni Habel.
25 Jadi maingada bona ikomi tado mamporou tempo nu Allatala mololita. Impia Allatala nololita ri tou-tou ri dunia ei, agiana isira tado namparonge-Ya, pade nabela-ramo suku. Noudamorauli ikita to namparonge Allatala nololita si kita lako ri suruga. Ande tado taronge-Ya, ikita kana Nasuku. 26 Impia wotu nu Allatala ee narimboso mpuu, namala nampopondui dunia ei. Agiana ngkapuri ei notipa-Yamo: “Sangkanipa kana Ku-runta tadomo kawule dunia ei agiana ante langi mbii.” 27 Ante panguli-Na “Sangkanipa” nopanotosi bakote sumawee ngila ngayana ri dunia ei to nipajadimo kana rarunta pade ratadiaka, bona to maboli kawule nuanu to tado mamala rarunta damo. 28 Jadi, apaa ikita nesua ri rara nu poparentaa nu Allatala to tado mamala rarunta, kamei tamo mosukuru ri Allatala. Ante eemo ikita nenomba ri Allatala ante dala to nampakasana rara-Na, ante mpuu-mpuu nampabila pade natundu mpuu si-Ya. 29 Sabana Allatala-ta ee, ewa apu to mamala mampakaropu nuapa-pa.