Pedederi pade sambaya kasalamaa
13
1 Ikomi kana mombepotowe oa ewa tou-tou to nosarara. 2 Nemo mantomo rara-mi mantarima torata ri sou-mi noudamo tou ee tadopa nincani-mi. Apaa nariamo to nantarima torata to tadopa nincani-ra ri sou-ra, ntanono torata-ra ee malaeka nu Allatala-da. 3 Toramo tou-tou to ri rara nu tarungku, tora-ramo ewa ikomi-da to nitarungku noroa ante isira. Nemo mi-kalingani mbii mantulungi tou-tou to niduasi, ewa ikomi-da to namparasai ri koro-mi. 4 Sumawee tou kana mampabila poncamboko. Baleilo bo bangkele tado mamala morara ntani. Allatala kana mosuku tou to nobualo pade tou to tado natundu ri bangkele-na ba ri baleilo-na. 5 Nemo majadi batua nu doi komi pade pakaganamo koro-mi ante nuanu to naria si komi. Apaa niulimo nu Allatala: “Yaku kana tado mampalambaka ba kana mampawia-ko.” 6 Apaa Allatala nangulimo ewa elouria, jadi tadomo maeka-ta manguli:
“I Puemo to kana mantulungi-ku, tadomo maeka-ku ri nuapapa.
Tou ntani tado mamala mowia nuapa-pa si yaku.”
7 Toramo tou-tou to najadi topangkeni komi impia. Isira noparatamo kareba nancambelai Allatala si komi. Peiraramo beiwa katuwu-ra duuna ri kamate-ra. Tutumo dala-ra namparisaya Allatala. 8 I Yesus Kristus tado naria nobali, lako impia, duuna eo ngkapuri ei pade duuna masae-sae. 9 Etumo sabana nemo madota mantutu ande maria tou mopatuduki komi ante pepatuduki to nengaya tulina. Sabana nabelo ntotopa ande rara-mi majadi maroso ante asi rara nu Allatala, tado ante atura nancambelai kondia. Atura nancambelai kondia ee tado mamala mantulungi tou to mantutu atura ee. 10 Ikita topeparisaya nariamo meja penombaa-ta ri Allatala. Pade tobalia-tobalia to nobago ri rara sou ni Pue tado mamala mangkondi penomba to naria ri wumbu meja penombaa ee. 11 Biasana Tobalia Bete nangkeni raa nu binata to nipotinuwu ri rara nu Lonta Nagasa. Nuanu ee nopanotosi bakote Allatala tadomo nantora kasalaa nu tou-tou. Agiana tobalia-tobalia biasana nangkeni koro nu binata to namatemo ee ri sawalikuna pade nitunu-ra isee. 12 Etumo sabana i Yesus mbii nantodosaka duuna namate ri sawaliku wombo nu ngata Yerusalem. Ia nampotinuwu dodo koro-Na bona todea-Na mpuu-mpuu masipato majadi todea nu Allatala. 13 Eemo sabana, tumei-tamo malou si Yesus ri sawaliku nu wombo ngata ee, pade metutu rakanene moroa ante Ia. 14 Sabana ri dunia ei tado naria ngata pearia-ta to natatapu. Pegoliana, ikita kana mampesimbukui bona mamparata pearia ri eo ngkapurina. 15 Jadi, apaa i Yesus najadi tinuwu-tamo, tumei-tamo mampopenomba tinuwu ri Allatala ante mosukuru. Etumo lolita-lolita peune to nampangaku bakote Allatala nakuasa. 16 Pade nemo rakalingani mowia nuanu nabelo ri tou-tou to mamparalou. Nasana mpuu rara nu Allatala ri tinuwu-tinuwu ewa ee.
17 Tutumo parenta nu tou-tou to najadi topangkeni komi ante mowia nuapa to niparentaka-na komi, sabana isira nojagai oa komi. Isira ee ngoni kana mopasowa bago-ra ee ri Allatala. Jadi, tutumo parenta-ra, bona isira mamala mobago ante sana rara. Pegoliana, ande ikomi tado matundu, kana masusa rara-ra, pade nuanu ee tado mangkeni belo si komi.
18 Sambayani oa kamo. Ikami namparisaya bakote rara-ka nanoro, apaa ikami nampodota oa mowia nuanu nanoro ri rara nu ngila ngayana. 19 Pade yaku merapi ante mpuu-mpuu si komi bona mosambayani-ka, bona mamala-ku mameiki si komi.
20 Allatala nopatuwu mpanculimo Pue-ta i Yesus Kristus lako ri kamatea. Sabana kamate-Na ee, ngkapuri ei-Ya najadi Topoewu Bete, to noewu-ta bimba-bimba-Na. Kamate-Na ee mbii nampakaroso potipa to tado naria kaopuana to nipowia nu Allatala si kita todea-Na. 21 Palambakamo Allatala puu nu katuwua nabelo ee mampeganai komi ante sumawee nuanu nabelo to niparalou-mi bona mamala mampowia nuapa to nipodota-Na. Pade i Yesus Kristus kana mantulungi komi bona mampowia nuapa to nampakawoe rara nu Allatala. Ia-mo to masipato raune duuna masae-sae! Amin.
22 Sarara-sarara kuperapi si ikomi bona mampeirara pepatuduki-pepatuduki-ku to nitulisi-ku ri rara nu sura-ku ei ante mancabara, sabana suraku-ku ei tado nalanga gaga. 23 Yaku madota bona ikomi maguncani bakote sarara-ta i Timotius, nipakabebasi-yamo lako ri rara nu tarungku. Ande magasi-ya marata si yaku isei, rodua-ka damo ngoni to kana mamei mampotomuka komi. 24 Paratamo tabe-ka ri sumawee to pangkeni komi pade ri sumawee sarara-sarara-ta to todea nu Allatala. Pade sumawee sarara-sarara todea nu Allatala ri Italia mbii nopakatu tabe-ra si komi.
25 I Pue kana mambei towe rara si komi sumawee.