Sabi-sabi nu kaparisayaa
11
1 Peparisayaa ri Allatala batuana mancarumaka mpuu bakote rasi-rasi to nisarumaka-ta ee kana madupa. Meparisaya mpuu-mpuu ri Allatala nambei kadupaa nancambelai kajadia-kajadia to tadopa nikalio-ta. 2 Sabana kaparisayaa, nangkajadika tou-tou impia nipobelo nu Allatala.3 Sabana kaparisayaa-ta ri Allatala, ikita nanguncani bakote dunia bo laerawa nipajadi nu Allatala ante lolita-Na. Nuapa to nipajadi-Namo to nikalio-ta ngkapuri ei tado lako ri nuapa to namala nikalio nu Manusia.
4 Sabana kaparisayaa, nipopenombamo ni Habel tinuwu to nabelopa lako ri tinuwu to nipopenomba ni Kain ri Allatala. Apaa i Habel neparisaya-mo, nangkajadika Allatala nosabiti bakote i Habel tou to nakono, apaa Allatala nosabiti-mo nancambelai penomba-penomba-na. Sabana i Habel neparisaya mpuu, noudamo namate-yamo, nololita-ya dapa.
5 Sabana kaparisayaa, i Henokh impia niongko nu Allatala bula-na natuwu dapa. Naopu ee, tadomo naria-ya nipotomu nu tou apaa niongko-yamo nu Allatala. Kakono-konona tempo tadopa niongko-ya nu Allatala, niuli amimo nu Allatala bakote i Henokh nampakasana rara nu Allatala. 6 Agiana tou to tado namparisaya Allatala tado mamala mampakasana rara nu Allatala. Butu dua tou to marata ri Allatala kana mamparisaya bakote Allatala ee naria mpuu-da. Tou ee mbii kana mamparisaya bakote Allatala nampobelo nantiroi tou-tou to mpuu-mpuu nangonco-Ya.
7 Sabana kaparisayaa, i Nuh nampetalingai tempo nu Allatala nangulikaka-ya nancambelai nuapapa to kana majadi ngoni. Allatala nantudu i Nuh mampowia saongu kapala. I Nuh natundu ri parenta nu Allatala ee, nangkajadika i Nuh samposarara namala nasalama. Apaa i Nuh namparisaya Allatala, nangkajadika Allatala nanguli bakote i Nuh tou to nakono. Agiana apaa i Nuh namparisayaa mpuu Allatala, nangkajadika ia nopanotosi bakote tou-tou ri dunia nasala pade masipato nasuku nu Allatala.
8 Sabana kaparisayaa, i Abraham natundu tempo nu Allatala nantudu-ya mesuwu lako ri ngata dodo-na malou ri ngata to kana na-ala bona majadi ngata-na ante mulia-na. Kakono-konona i Abraham tado nincani-na riumba-ya kana malou. 9 Sabana kaparisayaa, i Abraham neari ri tana to nitipaka-ya nu Allatala ee ewa torata ri ngata ntou. I Abraham neari ri bambaru, iwee mbiida ante i Ishak ana-na pade i Yakub tonipotumpuka-na neari ri bambaru. Isira eimo to nancosora nuapa to nitipa nu Allatala ee. 10 Sabana i Abraham nantongoraka oa bona meari ri ngata to nipoliwoi pade napatinda dodo nu Allatala ante pandasi to naroso.
11 Sabana kaparisayaa, i Abraham namala namparata muli lako si Sara, noudamo impia ketadomo moana-ya apaa natua yamo, pade i Sara mbii nalalo. Agiana apaa i Abraham ei neparisaya mpuu ri Allatala, nangkajadika Allatala nampowia-ra namala noana. I Abraham namparisaya bakote Allatala kana mowia nuapa to nitipa-Namo. 12 Jadi etumo sabana, noudamo i Abraham tempo ee natua-yamo tadomo mamala-ya moana, agiana apaa neparisayaa mpuu ri Allatala nangkajadika namala-ya dapa noana pade nadea mpuu mulia-na. Kadeana ewa betue-betue ri langi pade ewa bone ri talinti, duuna tado namala nireke.
13 Sumawee tou to neparisaya ri Allatala ee namate ante tado nantarima nuapa to nitipamo nu Allatala. Agiana isira nampopea dodo potipa ee ante nancabara pade nasana apaa nincani-rada bakote Allatala kana mopadupa potipa-Na ee. Isira mbii nanguli bakote isira natuwu ewa torata to neari kawule singoni ngkola-da ri dunia ei. 14 Sabana tou-tou to nanguli elouria nampopekalio ante kakono-konona bakote isira nampesimbukui mpuu pade naponu ante pesarumakaa bona mamala mamparata ngata to kana majadi ngata dodo-ra. 15 Tado ngata to nipawia-ramo ee to nipekiri-ra. Sabana ande ewa ee, batuana nadeamo loga-ra bona manculi ri ngata ee. 16 Agiana isira nancarumaka pearia to nabelo mpuu, eemo suruga. Jadi, Allatala tado naeya nampangaku bakote isira-mo todea-Na. Nuanu ee nadupa mpuu apaa nipasadia-mo nu Allatala saongu ngata si sira.
17 Sabana kaparisayaa mbii, tempo ni Abraham nipesori nu Allatala bakote mpuu-mpuu-da i Abraham namparisaya-Ya, i Abraham nadota nambei i Ishak rapotinuwu ri Allatala. Kakono-konona i Abraham namparatamo potipa lako ri Allatala bakote ia kana mamparata madea mpuu mulia. Agiana ia nadota nampopenomba anana sadudua ngkola ee. 18 Bo ee impia niulimo nu Allatala si Abraham: “Lako ri ana-mu i Ishak eimo ngoni, iko kana mamparata mulia.” 19 I Abraham namparisayaa mpuu bakote Allatala mamala mopatuwu mpanculi i Ishak lako ri kamatea. Jadi mamala rauli, i Abraham nantarima nculimo i Ishak lako ri kamatea.
20 Sabana peparisayaa, i Ishak mbii nantiroi i Yakub ante i Esau ri eo ngkapurina.
21 Sabana kaparisayaa, i Yakub mbii nantiroi ana-ana ni Yusuf tempo-na moliwo mamate, ante nepalincare ri woo nu tioko-na pade nenomba ri Allatala.
22 Sabana kaparisayaa, iwee mbiimo i Yusuf bula-na moliwo mamate, ia nampololita nancambelai pesuwu nu to Israel lako ri Tana Mesir ngoni. Ia mbii notetesi nuapa to kana rapowia-ra ri dongke-dongke-na tempo-ra mesuwu ngoni.
23 Sabana kaparisayaa, totua ni Musa mbii impia nowuni i Musa rarana tolu mbula lako ri pangotea-ya, apaa nikalio-ra i Musa ee sadua ngana kodi to nagaya, pade tado naeka-ra ri parenta nu mbagou Mesir.
24 Sabana kaparisayaa, natoualupa i Musa, tado nadota-ya nikasangai ana-nu ana bangkele ni Firaun. 25 Apaa nipobelonapa mantodosaka kapepaa moroa-roa ante todea nu Allatala, pade masana-sana ante dala to nadaa to kawule singoni ngkola-da. 26 I Musa nanguli bakote pekanene sabana namparisaya i Yesus Kristus eemo gagu to nabelo mpuu lako ri sumawee gagu to naria ri Mesir. Sabana ia nancarumaka mpuu tombo ri eo ngkapurina.
27 Sabana kaparisayaa, i Musa nampawia Tana Mesir ante tado naria eka-na ri mbagou Mesir. Agiana kana napola oa-ya ewa to nikalio namo Allatala, noudamo Allatala tado namala nikalio.
28 Sabana kaparisayaa, nitudumo ni Musa to Israel mopamula mowia eo bete Paskah. Pade ia mbii nantudu-ra moela raa ri wombo nu sou-sou-ra, bona ana-ana ulumbua-ra tado napateisi nu malaeka to kana marata mopatesi ngana-ngana ulumbua ri Tana Mesir.
29 Sabana kaparisayaa, to Israel mbii namala nolumako ri Tasi Lei ewa to nolumako ri tongo mpada bei. Agiana to Mesir nalome pura tempo-ra nampesoba nantutu to Israel.
30 Sabana kaparisayaa, to Israel namala nampakarobo wala betoo nu ngata Yerikho, ante dala nantoleliki wala betoo ee rarana papitu eo.
31 Sabana kaparisayaa mbii, i Rahab to impia sadua bangkele bajinga, tado namate noroa-roa ante tou-tou to tado natundu ri Allatala ee. Sabana ia nantarima belo to Israel to namei nampenoto bongo ngata ee.
32 Pade nadeadapa to kana ku-ulikaka komi! Agiana tado nagana loga-ku mampololitaka komi nancambelai i Gideon, i Barak, i Simson, i Yefta, i Daud, i Samuel, pade sumawee nabi. 33 Apaa isira ei mbii, sabana kaparisayaa, nangkajadika nadea mbagou pade surodado-na namala nidagi-ra . Isira nowia nuanu nakono pade noparenta ante nanoa, nangkajadika isira nantarimamo nuapa to nitipa nu Allatala. Isira namala nowunta ngudu nu singa-singa. 34 Saganta-ra namala nopateisi apu nengkalalaa. Isira natetalendusi lako ri mata ntaono, namparata karosoa ri rara nu kalentea. Saganta-ra namala najadi tou-tou to naroso ri rara nu poiwalia, nangkajadika-ra namala nampadagi surodado-surodado nu ngata ntani. 35 Sabana kaparisayaa, basangkia dua tina-tina namparata nculimo tou-tou to nipotowe-ra, to impia namatemo, apaa nipatuwu mpanculi nu Allatala. Naria mbii tou-tou to nadota niduasi duuna namate. Isira tado nadota nipakabebasi ande kana meuntu-rada mamparisaya Allatala. Isira nancarumakapa Allatala to kana mopatuwu mpanculi-ra ri rara nu tuwu to nabelo ntotopa. 36 Pade naria mbii tou-tou to nikanene pade nisalapea, apaa namparisayaa ri Allatala. Naria mbii tou-tou to nisilu ante rante pade nipasua ri rara nu tarungku. 37 Saganta to neparisaya ntanina namate niwunu nu watu, nigaragaji, pade nitimbe. Naria to nangani kawule nowaru ante kuli nu kebe bo kuli nu bimba, natuwu netowei, pade niduasi ante dala to nadaa mpuu nu tou ntani. 38 Dunia ei tado pearia to masipato si sira. Ntabubua kaosoa-ra damo ri tongo mpada bei pade ri bulu-bulu. Isira neari ri kamboa ntana pade riolo-riolo nu watu. 39 Isira niulikaka nu Allatala nakono, apaa isira namparisaya mpuu Allatala. Noudamo iwee, tadopa nipeponui nu Allatala potipa-Na si sira tempo-ra natuwu dapa. 40 Sabana naria liwo nu Allatala to nabelo ntotopa si kita. Allatala kana mambeikaka-ra potipa-Na ee ante kagana-ganana tempo-ra moroa-roa ante ikita.