Penomba to nagana mpuu
10
1 Parenta Taurat ee kawule wao nu kasalamaa to kana marata ngoni ngkola-da, agiana tado woto mpuu nu kasalamaa ee. Apaa ante penomba to nasimbei, to nipopenomba oa butu mpaena, Parenta Taurat tado mamala mampakagana tou to narata nangkeni penomba ee ri Allatala. 2 Ande rapana tou-tou to nangkeni penomba ri Allatala ee mpuu-mpuu nipakagasamo lako ri jeko-jeko, batuana isira tadomo oa mampekiri jeko, pade penomba tadomo oa rakeni rapopenomba. 3 Agiana ntanono tinuwu-tinuwu to nipopenomba butu mpaena ee nampopatora oa-ra ri jeko-jeko-ra. 4 Sabana raa nu japi tuama pade kebe tuama kakono-konona tado mamala mogempu jeko nu manusia.5 Apaa tempo ni Kristus nesua ri dunia, Ia nanguli ri Allatala:
“Iko tado nampodota tinuwu bo penomba ntanina.
Agiana Iko nopasadiamo woto-Ku ei bona Ku-popenomba rapotinuwu.
6 Iko tado nampodota tinuwu to nitunu
ba tinuwu to rapopoampungi jeko.
7 Pade niuli-Ku: O Allatala, ei Ku-mo!
Yaku narata bona mowia dota-Mu,
ewa to natetulisimo ri rara Buku Nagasa nancambelai-Ku.”
8 Niulimo ni Kristus isee: “Iko tado nampodota tinuwu bo penomba ntanina. Iko tado nampodota tinuwu to nitunu ba tinuwu rapopoampungi jeko” noudamo nipopenomba nantutu parenta Taurat. 9 Pade naopupa ee nanguli mbiimo i Kristus: “O Allatala, ei Ku-mo! Yaku narata bona mowia nuanu to nipodota-Mu.” Jadi Allatala nogempu ngila ngaya nu tinuwu to impia ee, pade nosambei ante tinuwu to nabou, Ia-mo i Kritus. 10 Pade ante eemo i Yesus Kristus mpuu-mpuu nowiamo nuapa to nipodota nu Allatala. Nipopenomba-Namo koro dodo-Na ri Allatala sangkani ngkola duuna masae-sae bona mampakagasa-ta.
11 Butu dua tobalia to nelayani nantutu parenta Taurat nowia bagona butu eona. Isira nowia oa tinuwu ri Allatala nampake binata-binata. Agiana sumawee tinuwu ee tado namala nogempu jeko. 12 Agiana Tobalia Gasa-ta i Kristus sangakani ngkolada nampopenomba koro-Na nipotinuwu bona mamala mogempu jeko-jeko, tinuwu ee duuna masae-saemo. Naopupa ee, nalou Yamo ri suruga pade noncunda mbira ri ngkana nu Allatala. 13 Pade ngkapuri ei i Kristus kawule nompopea Allatala damo mampowia bali-bali-Na matundu siYa pade meari riunde nu palata mpaa-Na. 14 Sabana ante nambei koro-Na nipotinuwu sangkani ngkola ee, i Kristus nampakaganamo tuo-tou to nipakagasa duuna masae-sae. 15 Pade nancambelai nuanu ee Inosa Gasa nu Allatala mbii naria nanguli si kita ri rara Buku Nagasa: 16 “Eimo potipa to kana Ku-powia ante i sira,
ri tempona to kana marata,” I Pue nanguli:
“Yaku kana mampowia-ra mampekiri oa parenta-parenta-Ku,
pade Yaku kana mampowia-ra mantora oa parenta-parenta-Ku.
17 Pade Yaku tadomo mantora oa jeko-jeko
pade kasalaa-kasalaa-ra.”
18 Jadi, jeko-jeko pade kasalaa-kasalaa ee niampungimo nu Allatala. Batuana, tadomo niparalou oa mampopenomba tinuwu bona mamala moampungi jeko.
Katundu
19 Jadi, sarara-sarara, ngkapuri ei tadomo maeka-eka-ta mesua ri rara nu Pearia to Nagasa Mpuu ee, apaa raa ni Yesus Kristus dodomo nangkeni-ta mamala mesua ri rara nu Pearia ee. 20 Ikita mamala mesua apaa i Yesus Kristus dodomo to notate dala nabou nampopogaa powide to nampopogaa-ta lako ri Allatala. Dala ee nopanotosi si kita bona matuwu duuna masae-sae. Powide ee koro ni Kristus dodomo. 21 Pade ngkapuri ei mbii nariamo Tobalia Bete-ta to nokapalani Sou nu Allatala ri suruga. 22 Etumo sabana ikita kana mamei ri Allatala ante rara to narawa pade mpuu-mpuu meparisaya ri Allatala, apaa rara-ta nipakagasamo lako ri jeko-jeko, pade woto-ta nielasimo ante ue narawa. 23 Etumo ikita kana mangkakamu mpuu-mpuu sarumakaa to niparisaya-ta ee, sabana Allatala mamala raparisaya pade Ia kana mampadupa potipa-Na. 24 Pade ikita kana mombepeili sadua bo ntanina bona ikita mamala mombepakaroso singkapada roa-ta bona mombepotowe pade mampowia nuanu nabelo. 25 Nemo malose-ta menomba, ewa kabiasaa nu basangkia dua tou. Pegoliana ikita kana sore mombepakaroso, sabana ngkapuri ei najungkumo tempona i Pue kana marata mpanculi.
26 Sabana ande ikita motungkei oa mampowia jeko, noudamo nincani tamo pepatuduki to nakono, tadomo maria oa tinuwu ntanina to mamala mogempu jeko-ta. 27 Pade ande ikita mampowia oa jeko, ikita kawule mamala mamparasai eka to melabi mpuu ri rara nu popea-ta tempona Allatala mantangara sumawee tou ngoni pade mampongayo apu to nengkalalaa, to kana mampakaropu tou-tou to nangewa Allatala. 28 Impia, ande rapana maria sadua tou to tado mantutu Parenta Taurat, pade ande nasabiti nu rodua ba totolu tou, ia kana rasuku mate tado maria ampuna. 29 Nantomo ntotopa suku to kana natarima nu tou to nampalisa-lisa Ana nu Allatala. Tou ee nampakarumu raa potipa nu Allatala, eemo raa ni Kritus to namate ri kou salib bona mampakagasa tou lako ri jeko. Pade ia mbii nangkanenemo Inosa Gasa nu Allatala to nambei asi rara siya. 30 Sabana ikita nanguncani mpuu bakote i Puemo to nanguli iwei:
“Yaku-da to kana masipato mobalasi. Yaku dodo-da to kana merapi pobayari putu nu tou-tou to nampowia nuanu nadaa.”
“I Pue kana mantangara todea-Na.”
31 Mapepa mpuu ta-ronge ande rapana ikita mamporou Allatala ewa ee, apaa ikita nearimo ri rara mpale nu Allatala to natuwu.
32 Agiana toramo ri tempo to naliumo. Bula-mi tadopa nasae najadi topantutu i Kristus, ikomi neparisaya dodo pade nampesimbukui mpuu noudamo nantodosaka ngila ngaya nu kapepaa. 33 Nariamo komi nikanene pade niduasi ri ngayo nu tou dea. Naria mbiimo komi nangkolo kapepaa noroa ante sarara-sarara ntanina to saongu kaparisayaa to niduasi mbii ewa ee. 34 Pade ikomi mpuu-mpuu nampopekaliomo belo rara-mi ri topantutu i Kristus to nitarungku. Ikomi mbii nasana dodo rara-mi noudamo tou-tou norampaki gagu-mi, apaa nincani-mida bakote nariada gagu-mi to nelabipa kabelona pade naria dodo duuna masae-sae. 35 Etumo sabana ikomi kana maroso dodo peparisaya-mi, apaa nabete mpuu tombo nipasadia nu Allatala to kana mi-tarima. 36 Pade ikomi mbii kana matundu dodo mantodosaka sumaweena ee, bona ikomi mamala mampowia nuapa dota nu Allatala. Ante eemo, ikomi kana mantarima nuapa to nitipaka-Na.
37 Sabana naria nitulisi ri rara Buku Nagasa: “Tado mpuumo masae,
Ia to kana marata ee, tadomo masae marata.
Tado Na-pototento-tento karata-Na.
38 Pade todea-Ku to nakono kana meparisaya bo matuwu.
Agiana ande maria tou riolo-ra mangkosu,
tado masana rara-Ku si-ya.”
39 Ikita ei tado todea nangkosu bo napusa. Pegoliana ikita eimo todea to namparisaya Allatala bo to nipakasalama.