Pearia nagasa ri dunia pade ri suruga
9
1 Ri potipa to paramulana, naria atura beiwa tou-tou menomba ri Allatala. Pade naria mbii bambaru penombaa to nipowia nu manusia. 2 Ri rara nu bambaru penombaa ee naria rongu lontana. Lonta ri ngayona nikasangai Lonta Nagasa. Ri rara nu lontana ee naria pambolia poindo, pade meja pambolia roti penombaa ri Allatala. 3 Lonta karonguna, naria ri bengo nu powide karonguna. Lontana ei nikasangai Lonta Nagasa Mpuu. 4 Ri rara nu lonta karonguna ee, naria ewa meja kodi to nipowia lako ri bulawa rapotunui dupa to rapopenomba ri Allatala. Pade naria mbii peti to nilampini ante bulawa. Peti ee nikasangai Peti Potipa. Ri rara nu peti ee naria niboli gumba bulawa nipambolii manna, tioko ni Harun to nencubemo, pade rongkou watu peka to nipotulisii sampulu ngaya parenta nu Allatala. 5 Ri wongko nu poladu peti ee, naria rongkuo gambara nolence ewa malaeka to nisanga kerub to najadi pampetonondi bakote Allatala naria i see. Kapi nu gambara malaeka rongkuo ee naterembe ri wongko nu poladu peti, to niuli poampungia jeko-jeko. Agiana sumaweena ee tado mamala rapanotosi saongu-saongu. 6 Iweemo poatoro sumaweena. Butu eona tobalia-tobalia nesua ri rara lonta paramula bambaru nu Allatala ee mowia bago-ra. 7 Agiana kawule Tobalia Bete ngkola-da mamala mesua ri rara nu lonta karonguna, ee-mo Lonta Nagasa Mpuu. Sampae sangkani. Tempo-na mesua isee, ia kana mangkeni raa nu binata penomba ri Allatala bona mogempu jeko dodo-na pade mogempu jeko nu sumawee todea nu Israel, to nipowia-ra noudamo tado nitungkei-ra nowia. 8 Ante dala ei, Inosa Gasa nu Allatala nopanotosi si kita bakote tadopa mamala tou mesua ri lonta to nagasa mpuu, sinungka nu lonta ri ngayona ee rapake dapa. 9 Sumaweena ee nopanotosi nancambelai beiwa tuwu nu manusia ngkapuri ei. Tobalia-tobalia ee nangkenimo ngila ngaya nu penomba pade tinuwu ri Allatala. Agiana sumaweena ee mpuu-mpuu tado mamala mampakarawa rara nu tobalia-tobalia ee. 10 Sabana, sumaweena ee kawule najadi atura-atura nu agama nancambelai nuapa to mamala rakondi pade rainu, pade ngila ngaya nu atura nu manusia bona mamala mampakarawa koro-ra. Sumaweena ee kawule atura-atura nu manusia to kana napowia nu tou, pade kana maopu ri tempo nu Allatala mampakabou sumaweena.
I Kristusmo Topoparioloti potipa to nabou
9:11-28
11 Agiana ngkapuri ei naratamo i Kristus najadi Tobalia Bete bona mampobago sumawee nuanu nabelo to ngkapuri ei nirasai-tamo. Narata Yamo nesua ri pearia to nagasa mpuu ri suruga, to nabelopa pade nagasapa lako ri sou penombaa to nipowia ni nabi Musa impia. Sou penombaa ee tado nipowia nu manusia, tado lako ri dunia ei. 12 I Kristus nesua ri rara nu pearia Nagasa Mpuu ee sangkani ngkola duuna masae-sae. Tempo-Na nesua ri pearia ee, nipopenomba-Namo raa dodo-Na, tado nangkeni raa nu kebe tuama baa raa nu ana japi. Pade ante eemo nipakabebasi-Na ta-mo lako ri jeko-jeko-ta duuna masae-sae. 13 Mantutu atura ni Nabi Musa, tobalia kana mosiwe tou-tou to narumu ee ante raa nu kebe tuama pade raa nu japi tuama, bo rombo nu ana japi tina to nitunu. Bona tou-tou to narumu ee majadi magasa nculi pade bona mamala mantutu nculi ada nu agama. 14 Jadi, ande raa pade rombo ee mamala mampakarawa karumu nu tou-tou ee, noudamorauli raa ni Kristus. Ante Inosa to natuwu liu-liu, i Kristus nampopenomba koro dodo-Na ri Allatala najadi penomba to nagana mpuu. Raa-Na nampakarawa rara-ta lako ri ada nu agama to tado naria lotuna, bona ikita mamala mampalayani Allatala to natuwu.
15 Etumo sabana, i Kristusmo to nangkeni potipa to nabou, bona sumawee tou to nipokio nu Allatala majadi todea-Na kana mantarima rasi liu-liu to nitipakamo nu Allatala si sira. Nuanu ee mamala-da majadi, apaa noudamo i sira tado natundu ri atura nu Allatala ri tempo naria dapa potipa paramulana impia bo ee i sira kana mamatemo, Agiana nariada i Yesus Kristus to nampakabebasi ramo, ante dala nantolosi-ra bona nemo mamate-ra. 16 Apaa ande maria karatasa awili, tantu kana maria mbii popadupa bakote tou to nowia awili ee namate-mo. 17 Sabana, karatasa awili ee mamala rapake ande namatemo topo awili ee, agiana ande natuwu dapa topoawili ee karatasa awili ee tadopa mamala rapake. 18 Etumo sabana, potipa paramulana kana raparikonoi ante raa. 19 Tempo ee, paramulana i Musa noparata sumawee atura parenta Taurat ri to Israel. Naopu ee nialamo ni Musa raa nu ana japi pade raa nu kebe tuama, pade nigalona ante ue, naopu ee nipoposiwena Buku parenta Taurat ee pade ri sumawee to Israel ante nampake kawoko hisop pade wulu nu bimba to nalei jore. 20 Ranca ni Musa nosiwe, niulina: “Eimo raa potipa to nipakatatapu nu Allatala si komi.” 21 Naopupa ee, nisiwe mbiimo ni Musa Bambaru Penombaa si Pue ante sumawee parewa to nipake nenomba ri Allatala ewa posiwena to Israel ee see. 22 Ri rara parenta Taurat, mamala rauli sumawee ngila ngayana kana rapaka gasa ante raa, pade jeko tado mamala raampungi ande tado maria raa mabubu. 23 Jadi, sumawee nuanu to niuli elouria see kakono-konona kawule nantutu nuanu ri suruga-da, nangkajadika sumaweena ee kana rapakagasa ante dala rasiwe nu raa binata. Agiana sumawee to naria ri suruga neliupa kabelona, jadi nuanu to mampakagasa mbii tantu kana meliu ntotopa kabelona. 24 Sabana i Kristus nelayani tado ewa tobalia ri Lonta Nagasa to nipowia nu manusia. Pearia nagasa ewa ee kawule nantutu jonjo to naria ri suruga-da. Agiana ngkapuri ei i Kristus nesuamo ri suruga, nantingayosi Allatala bona mantulungi-ta. 25 Tobalia Bete si kita to Israel nesua ri Lonta Nagasa ee butu mpaena, pade mampopenomba tado raa dodo-na agiana raa nu binata-da. Agiana i Kristus nesua ri pearia Nagasa ee tado bona mamala mesua suwu mampopenomba koro-Na, apaa Ia kawule sangkani ngkola-da niparalou-Na mampopenomba koro-Na, nuanu ee nipowia Na-mo. 26 Apaa ande i Kristus mesua ri pearia nagasa ee butu ngkanina, batuana Ia kana mangkolo kapepaa duuna mamate butu ngkani mbiina mopamula lako ri popajadi nu Allatala dunia ei. Agiana kakono-konona eimo to najadi: Ia narata ri dunia ei sangkani ngkolada ri eo-eo kaopua nu dunia ei. Ia narata bona mogempu jeko nu manusia ante dala mambei koro-Na rapotinuwu. 27 Natantumo bakote manusia kana mamate sangkani ngkolada. Maopu ee ia kana natangara nu Allatala. 28 Nasimbei ewa ee mbiimo, i Kristus kawule sangkani ngkola-da mampopenomba koro-Na bona mantolosi jeko nu manusia. Maopu ee Ia kana marata mpanculi karongkanina, tadomo bona mangkolo oa jeko nu manusia, agiana bona mampakasalama tou-tou to nampopea-Ya marata mpanculi.