Tobalia Bete nu potipa nabou
8
1 Eimo poko nuanu nipololita-ku ei: Ngkapuri ei nariamo sadua Tobalia Bete to nagana mpuu si kita. Ia noparenta noroa ante Allatala To Nabete Mpuu ri suruga. 2 Ia nolayani Allatala najadi Tobalia Bete ri pearia to nipatani bona rapenombai ri Allatala, ri rara bambaru nu Allatala ri suruga. Bambaru ee nipowia dodo ni Pue, tado nipowia nu manusia. 3 Butu dua tobalia bete niongko bona mangkeni tinuwu pade penomba ntanina ri Allatala. Iweetu mbiimo Tobalia Bete-ta kana mangkeni tinuwu ri Allatala. 4 Ngkapuri ei Ia najadi Tobalia ri suruga, tado najadi tobalia ri dunia ei. Ri dunia ei nariamo tobali-tobalia to nambei penomba ri Allatala, ante nantutu Parenta ni Musa. 5 Tobalia-tobalia ee nobago ri bambaru penombaa ri dunia ei. Pobago-ra ri dunia ei ewa pobago ri suruga, agiana tado nasimbei. Niulimo nu Allatala nuanu ee impia si Musa, tempo ni Musa nopatinda Bambaru to nagasa ee. Tempo ee, Allatala nanguli iwei si Musa: “Toramo! Powiamo sumawena ee ewa jonjo to nitudoka-Kuko ri wumbu nu bulu ee.” 6 Agiana ngkapuri ei i Yesus niweikaka bago to neliu kabetena lako ri bago nu tobalia-tobalia ri dunia ei. Apaa Ia-mo to nantolosi tempo nu Allatala nowia potipa to nabou, sabana Allatala notipa nuanu to neliupa kabetena ri manusia.7 Sabana, ande potipa to paramulana tado naria kakurangana, tadomo rapowia potipa to nabou. 8 Agiana, niratamo nu Allatala kasalaa nu todea-Na, nangkajadika nangulimo Allatala si sira iwei:
“Ronge belo-belo. Kana marata tempona,
Yaku kana mowia potipa to nabou ante to Israel,
pade to Yehuda.
9 Potipa to nabou ee tado nasimbei ewa potipa to nipowia-Ku ante totua-ra impia,
tempo-Ku nangkeni-ra nesuwu lako ri tana Mesir.
Sabana isira tado natundu ri potipa-Ku ee,
nangkajadika tadomo nipeiliKu-ra. Iweemo lolita ni Pue.
10 Agiana ngkapuri ei, eimo potipa to nabou to kana kupowia ante to Israel,
maopupa tempona potipa to paramulana ee.
Yaku, i Pue, nololita: Yaku kana mowia-ra mampekiri oa parenta-Ku pade Yaku kana mowia-ra mantora pade matundu ri parenta-Ku.
Yaku kana majadi Allatala to rapenombai-ra,
pade isira kana majadi todea-Ku.
11 Isira tadomo mampatuduki tongki-ra,
ba sarara-ra bakote isira,
kana manguncani-Ku,
sabana isira sumawee kana manguncani-Ku bakote Yaku-mo Allatala-ra,
mopamula lako ri ngana kodi duuna ri totua-ra.
12 Yaku kana mampotowe-ra, noudamo nadea kasalaa pade jeko nipowia-ra.
Yaku mpuu-mpuu kana mangkalingani jeko-jeko-ra.”
13 Tempo nu Allatala nololita nancambelai potipa to nabou ee, niuli-Na potipa to paramulana to nasaemo ee tadomo ratutu. Jadi, nuanu to tadomo ratutu pade tadomo nolotu tadomo masae kana malipomo.