I Kristus Pade I Melkisedek
7
1 I Melkisedek ei mbagou lako ri ngata Salem pade Tobalia nu Allatala To Neliu kalangkona. Tempo ni Abraham nanculi lako ri poiwalia nampadagi mbagou-mbagou ante surodado-surodado-ra, naloumo i Melkisedek nampotomuka-ya pade nantiroi-ya. 2 Pade niweikaka yamo ni Abraham saongu bagia lako ri sampulu bagia parewa to ni rampaki ni Abraham lako ri mbagou-mbagou to nidagii-na ee. Paramulana, sanga Melkisedek batuana mbagou to noparenta ante nanoa. Ia mbii mbagou nu ngata Salem, batua mbiina mbagou to nangkeni posingkabelo. 3 Nancambelai i Melkisedek ei tado naria tou to nanguncani bakote naria tuama-na ba tina-na ba to nuapa-ya. Tado naria tou to nanguncani ipia-ya niote pade ipia-ya namate. Agiana i Melkisedek ei ewa Ana nu Allatala pade ia najadi dodo Tobalia duuna nase-sae.4 Natantumo i Melkisedek ei tobete, apaa i Abraham dodomo, totua-ta nambeikaka-ya saongu bagia lako ri sampulu bagia parewa to nirampaki-na lako ri mbagou-mbagou to nadagi ee. 5 Mantutu parenta Taurat, nipakatatapumo bakote tobalia-tobalia muli ni Lewi kana mangala sabagia lako sampulu bagia lako ri pamparata nu to Yahudi, to najadi sarara mboto-ra, noudamo i sira sumawee nipomulika ni Abraham. 6 I Melkisedek tado muli ni Lewi, agiana i Abraham nambeikaka-ya saongu bagia lako ri sampulu bagia parewa to nirampaki-na ee. I Melkisedek mbii nantiroi i Abraham, noudamo i Abraham-da to nantarima potipa lako ri Allatala. 7 Nincani pura tada bakote tou to nalangko pangka-na mantiroi to riunde-na. 8 Tobalia-tobalia muli ni Lewi ee nantarima sabagia lako ri sampulu bagia pamparata nu sarara-sarara-na. Agiana isira mbii mamala mamate ewa tou ntanina. I Melkisedek mbii nantarima sabagia lako ri sampulu bagia parewa to nirampaki ni Abraham. Agiana Buku Nagasa tado naria nanguli i Melkisedek namate. 9 Iwee amida, muli ni Lewi kana mantarima saongu bagia lako ri sampulu bagia pamparata nu todea Israel. Agiana mamala ta-uli to Lewi mbii nambeikaka sabagia lako ri sampulu bagia si Melkisedek, tempo ni Abraham nambeikaka i Melkisedek sabagia lako ri sampulu bagia parewa to nirampaki-na ee. 10 Noudamo to Lewi tadopa niote tempo ni Melkisedek nampotomuka i Abraham, totua-ra. Agiana mamala rauli bakote to Lewi nariamo ri koro ni Abraham, apaa ri eo ngkapurina to Lewi ei muli ni Abraham mbiida.
I Kristus-mo Tobalia to neliu kalangko-Na lako si Harun
7:11-28
11 Ri tempo nu tobalia-tobalia Lewi nobago eemo, atura nu agama Yahudi niweikaka ri todea Israel. Apaa tobalia-tobalia Lewi ei impia tado namala nowia bagora nabelo mpuu nantutu ewa to kana rapowiara, nangkajadika kana maria tobalia ntanina, agiana kana masimbei ewa tobalia i Melkisedek, pade tadomo oa lako ri muli nu tobalia i Harun. 12 Jadi, ande mobalimo poncundaa nu tobalia-tobalia, batuana kana mobali mbii atura nu agama Yahudi. 13 Tobalia bou to nipololita isei Ia-mo i Pue-ta. Ia nipoanaka lako ri muli ntanina, pade tadopa naria namo saduaa lako ri muli-Na nobago najadi tobalia. 14 Sumawee tou nanguncani i Pue-ta niote lako ri muli ni Yehuda. Tado naria niuli ni Musa bakote maria ngoni tobalia lako ri muli ee. 15 Sumawee nuanu nipololita ei nanoto ntotomo ngkapuri ei, apaa nariamo tobalia bou to ntanina, to nasimbei ewa i Melkisedek. 16 Ia najadi tobalia tado nipelisi nantutu atura-atura pade suku to nipowia nu manusia. Agiana Ia najadi tobalia sabana Ia nakuasa pade natuwu duuna masae-sae. 17 Sabana ri rara Buku Nagasa nitulisimo nancambelai-Ya ewa ei:
“Iko nipelisimo-Ko majadi Tobalia duuna masae-sae,
mantutu atura ni Melkisedek.”
18 Jadi, atura to nasaemo tadomo mamala ratutu oa ngkapuri ei, sabana atura ee tado naroso pade tado mamala mampakasalama manusia. 19 Sabana atura Taurat tado namala nowia saduaa tou najadi nakono ri ngayo nu Allatala. Agiana ngkapuri ei nariamo dala bona ikita mancarumaka nuanu to nabelo ntotopa, to nowia-ta najungku ntotomo ri Allatala. 20 Pade mbii, sumaweena ee niparikonoi ante posumpa lako ri Allatala. Tado naria posumpa ewa ee tempo nu tobalia-tobalia ntanina niongko. 21 Agiana tempo nu Allatala no'ongko i Yesus najadi Tobalia, Allatala nanguli si-Ya:
“I Pue nosumpamo,
pade tado mobali rara-Na,
Nipelisimo-Ko najadi tobalia duuna masae-sae.”
22 Ante posumpa eemo, i Yesus najadi potolosi bakote Ia kana mampeponui potipa bou to naroso ntotomo ee. 23 Nadea tobalia-tobalia ntanina, apaa butu dua-ra namate nangkajadika tadomo namala-ra nopapola oa bago-ra, jadi isira kana nasambei nu tou ntanina. 24 Agiana i Yesus natuwu duuna masae-sae. Etumo sabana, Ia kana majadi dodo Tobalia pade tado maria tou to kana mancambei-Ya. 25 Etumo sabana i Yesus mamala mampakasalama butu dua tou duuna masae-sae, sumawee tou to madotamo mamei ri Allatala kana nakeni ni Yesus. Ia maria oa mangkeni tou-tou ee ri ngayo nu Allatala, apaa Ia natuwu duuna masae-sae.
26 Kakono-konona i Yesusmo Tobalia Bete to mamala mampangawa-ta ri rara nu ngila-ngayana. Apaa Ia nagasa, Ia tado naria nowia kasalaa nuapapa pade tado namo saodia jeko-Na. Allatala nopatani-Ya lako ri tou-tou to najeko pade nambeikaka-Ya pearia to nibila mpuu ri suruga. 27 Ia mpuu-mpuu nontani lako ri tobalia-tobalia bete ntanina. Butu eona isira kana mampopenomba tinuwu ri Allatala bona mogempu ncala jeko dodo-ra, pade jeko nu todea-da. Agiana i Yesus sangkani ngkola nowia tinuwu ri Allatala, tempo-Na nambei koro-Na nipotinuwu. Tinuwu-Na eemo nipotinuwu nu sumawee tou duuna masa-sae. 28 Ande mantutu atura ni Musa, tou-tou biasa to nowiamo jeko mamala-da raongko majadi tobalia. Agiana Allatala nowia potipa to nabou nampeganai atura ee. Ante rara mpuu-mpuu Allatala notipa bakote Ana dodo-Namo to kana majadi Tobalia Bete to nagana mpuu duuna masae-sae.