6
1 Etumo sabana, ikita tadomo kawule manguncani pepatuduki-pepatuduki to paramula ngkolana nancambelai i Kristus. Pegoliana ikita kana mantambei oa panguncani-ta i Kristus bona maroso ntoto peparisaya-ta. Kakono-konona ikita tadomo oa mamparalou pepatuduki-pepatuduki to paramulana bakote ikita kana meuntumo mowia nuanu to tado naria lotuna, ba rapatuduki nancambelai peparisaya-mi si Allatala. 2 Pade ikita mbii tadomo kawule mampololita nancambelai pobaptis tou, ba nancambelai podampa pale ritanuana nu sadua tou, ba tou-tou namatemo kana matuwu mpanculi, pade ba tou-tou nowia nuanu nadaa kana rasuku duuna masae-sae. 3 Jadi, ande napaliu nu Allatala tumei-tamo meguru pepatuduki-pepatuduki kapolaana bona mantambei maroso peparisaya-ta ri Allatala. 4 Sabana, tou-tou to nakoomo rara-ra, tadomo mamala rapatuduki mpanculi. Apaa isira impia nincani ramo lolita nu Allatala to nakono. Nirasai ramo beiwa kabelo ni Pue. Isira mbii nariamo namparasai kuasa nu Inosa Gasa nu Allatala. 5 Isira mbii namparasaimo bakote nuapa to niuli nu Allatala ee nabelo mpuu-da pade nirasai mbii-ramo kuasa-kuasa to kana napadupa nu Allatala ri tempo to kana marata 6 Agiana naopupa ee, tado mbiimo niparisaya-ra i Kristus. Tadomo mamala-ta mancarumaka bona isira manculiki mampawia inggu-ra to nadaa ee, sabana isira ewa to nosalibkan mpanculi Ana nu Allatala ri rara-ra. Isira mbii nampakaeya i Kristus ri ngayo nu tou dea. 7 Kakono-konona tou to namparisaya mpuu i Kristus mamala raporapaika ewa tana narudu. Tana to naoso nabela uda, kana mabelo nakatuwui nu tinuda ri wumbuna, nangkajadika tou to nampolio tana ee kana masana apaa namparata nadea bunduna. Allatala nantiroi tana ee. 8 Agiana ande tou to nampawia i Kristus mamala raporapaika ewa tana nadusu to nikatuwui nu dono pade rui. Tana ee tado naria lotuna pade ngoni kana napokaranalaka nu Allatala pade kaopuana kana ratunu duuna maopu ante sumawee tinuda ri wumbuna. Mekakamu mpuu ri pesarumakaa
9 Sarara-sarara to nipotowe-ku, noudamo ikami nanguli ewa elouria nancambelai komi, agiana nincani-kada bakote ikomi natuwu ante inggu to nabelo ntotopa. Sabana nipakasalamamo komi nu Allatala. 10 Kakono-konona Allatala ee nanoa mpuu. Ia nantora oa nuapa to nipowia-mimo. Ia mbii nantora oa bakote ikomi nampotowe-Ya, to nipopekalio-mi ante dala nantulungi todea-Na. Ikomi nampowia oa nuanu ee lako impia duuna ngkapuri ei. 11 Agiana nuanu to nipodota mpuu-ka ikomi sumawee sinungka-mi matuwu mampesimbukui mpuu mowia oa nuanu nabelo duuna ri kaopuana, bona ikomi mantarima pura nuapa to nisarumaka-mi ee. 12 Nemo majadi tolose komi. Agiana, ikami madota bona ikomi matuwu ewa tou-tou to nantarimamo nuapa to nitipaka nu Allatala, apaa isira neparisaya mpuu ri Allatala pade nancabara.
13 Tempo nu Allatala notipa si Abraham, niuli-Na bakote Ia kana mampowia nuapa to nitipa-Namo. Pade apaa tadomo naria to neliu kalangkona lako ri Allatala, niuli dodo Na-mo sanga-Na bona mampakaroso lolita-Na ee. 14 Allatala nanguli iwei si Abraham: “Yaku kana mambei nuapapa to nabelo siko ante melabi-labi. Yaku kana mambei madea mpuu muliamu.” 15 I Abraham nopea oa ante nancabara, noudamo nasae. Nangkajadika i Abraham nantarima nuapa to nitipaka-ya nu Allatala. 16 Manusia nololita nampake sanga nu tou to neliu kalangkona lako siya, bona mampadupa bakote nuanu niuli-na ee nakono. Ante dala ee, isira kana meuntu mobungka. 17 Dota nu Allatala ri tou-tou to kana mantarima potipa-Na ee bona mpuu-mpuu manguncani bakote Ia kana mopadupa potipa-Na ee. Etumo sabana, Allatala nampakaroso tipa-Na ante lolita nangkasangai dodo sanga-Na. 18 Allatala tado mobali tipa-Na ba lolita-Na. Sumawee to niuli nu Allatala kana madupa. Etumo sabana, ikita to namparisaya-Yamo niwei karosoa bona mokakamu mpuu sarumakaa to nitipamo nu Allatala si kita. 19 Sarumakaa-ta ee nasimbei ewa patudu nu kapala to nampowia katuwu-ta najadi naroso pade naama. Sarumakaa ee nampaka roso pombepotowe-ta ante Allatala to impia nigaa nu powide nagasa ri rara nu lonta to nagasa mpuu ri suruga. 20 I Yesusmo to notateka-ta dala pade nesua ri pearia ee, bona ikita mbii mamala mesua. Ia najadi Tobalia Bete duuna masae-sae, ewa Tobalia i Melkisedek impia.