5
1 Allatala nampelisi butu dua tobalia bete lako riolo nu todea nu Allatala, pade niweikaka bago mantulungi todea nu Allatala ri rara nu pombetokaiya-ra ante Allatala. Bago nu tobalia bete ee moparata ngila ngaya nu penomba pade tinuwu ri Allatala bona merapi ampu apaa todea nu Allatala nowiamo jeko. 2 Tobalia bete ee mbii nadea kasalaa-na. Etumo ia kana mancabara ri tou-tou to nowia kasalaa, apaa isira tado nanguncani bakote nuanu nipowia-ra ee nasala. 3 Tobalia bete nobago moparata tinuwu bona ra'ampungi jeko nu todea nu Allatala. Agiana apaa ia mbii nadea kasalaa-na, ia mbii kana mampopenomba tinuwu bona ra'ampungi dodo mbii jeko-na. 4 Tado maria saduaa tou mamala mo'ongko dodo koro-na majadi tobalia bete. Allatala-da to mampelisi tou bona majadi tobalia bete, nasimbei ewa impia Allatala-da nampelisi i Harun. 5 Iwee mbii ante i Kristus, Ia tado no'ongko dodo koro-Na bona majadi Tobalia Bete. Agiana Allatala-da to nampelisi-Ya, pade nanguli si-Ya:“Ikomo Ana-Ku.
Eo ei Ku'uli bakote Iko najadimo Ana-Ku.”
6 Ri tulisia ntani mbiina ri rara Buku Nagasa, Allatala nanguli si Kristus:
“Iko nipelisimo majadi Tobalia duuna masae-sae,
nasimbei ewa i Melkisedek impia.”
7 Tempo ni Yesus natuwu ri dunia ei, nosambaya Ya-mo ante rara mpuu-mpuu, nokeo pade notumangi ri Allatala to mamala mantulungi-Ya lako ri kamatea. Allatala nantarima sambaya ni Yesus apaa i Yesus natundu pade nampotowe mpuu Allatala. 8 Noudamo i Yesus Ana nu Allatala, Ia negurumo bona majadi matundu ri Allatala ante dala nantodosaka kapepaa-Na. 9 Naopupa i Yesus nantodosaka kapepaa ee, Ia mbii mamala mowia sumawee tou to natundu si-Ya masalama duuna masae-sae. 10 Pade Allatala nampakatatapu-Ya bona majadi Tobalia Bete, nasimbei ewa i Melkisedek impia.
Pepopatora bona nemo mangkosu lako ri peparisaya
11 Noudamo nadea-dapa nuanu nancambelai i Yesus pade i Melkisedek madota ku'ulikaka komi. Agiana nakajamo ka-ulikaka komi, apaa nakoomo rara-mi nangkajadika komi tadomo neronge belo. 12 Kakono-konona ngkapuri ei ikomi kana mamalamo mopatuduki tou ntani. Agiana ikomi namparalou oa dapa tou mopatuduki komi, nancambelai nuapapa to nipodota nu Allatala, to impia nipatudukikamo komi lako ri paramulana komi nantutu i Kristus. Agiana ikomi namparalou oa dapa nanginu susu, pade tado nipakule-mi nangkondi kondia to nakoo. 13 Ikomi ei nasimbei ewa ana lei to nesusu dapa. Apaa ikomi tado nanguncani nowia nuanu nakono. 14 Agiana ande tou nabetemo namala ramo nangkondi kondia nakoo, batuana ande tou narosomo peparisaya-ra namala ramo nantarima pepatuduki-pepatuduki to nalangko bo nakaja. Apaa isira nincani-ramo notimba pepatuduki to nabelo bo pepatuduki to nadaa.