Eo Peuntua to nipasadia nu Allatala
4
1 Etumo sabana, ikita kana mainga bona tado maria saduaa riolo-ta to nauli nu Allatala tado mamala mesua ri peuntua to nipasadia-Na ee. Niwei-Nadapa kalogaa si kita bona mamala mesua ri peuntua to nipasadia-Na ee. 2 Kakono-konona Kareba Belo ee nipopowolemo si kita nasimbei ewa si sira. Agiana Kareba Belo ee tado naria lotuna si sira. Sabana tempo-ra namparonge ee, tado niparisaya-ra. 3 Agiana ikita to neparisaya nantarima peuntua to nitipa nu Allatala ee. Nuanu ee nasimbei ante to niuli nu Allatala iwei:“Sabana eemo, Yaku nasodo pade nosumpa,
I sira tado mamala mesua bona meuntu mamporoa-Ku.”
Allatala nanguli ewa ee noudamo sumawee to nipowia-Na naopumo nipowia-Na lako paramula nu dunia ei nipajadi. 4 Nancambelai eo kapapituna ee, mamala ta-basa ri rara Buku Nagasa: “Allatala neuntu ri eo kapapituna lako ri sumawee bago-Na nopajadi dunia ei.” 5 Mamala mbii ta-basa ri tulisia ntanina to niuli iwei: “Isira tado mpuu mesua ri rara nu peuntua to nipasadia-Ku.” 6 Jadi, natantumo bakote tou-tou to nokoulumo namparonge Kareba Belo ee tado amimo mamala mesua ri peuntua to nipasadia-Na ee, apaa isira tado natundu. Agiana Allatala nampaliu tou-tou ntanina to neparisaya mpuu mesua ri rarana. 7 Etumo sabana, Allatala nampakatatapu mbiimo sauatu eo ntanina. Eemo eo to niuli “Eo Ei.” Riatu mpae naliu lako ri tempo ni Musa, pade niuli-da nu Allatala si Daud nancambelai nuanu ee, to nitulisikimo ewa ei: “Eo ei, tempo-mi mamparonge wotu nu Allatala,
nemo mi-pakakoo rara-mi.”
8 Sabana, ande kenamala i Yosua nangkeni tou-tou ee nesua ri pearia to nipasadia-Na ee, tantu tadomo nauli nu Alltala sauatu eo ntanina. 9 Jadi, ri todea nu Allatala naria dapa potipa bona meuntu ewa Allatala neuntu ri eo kapapituna. 10 Butu dua tou to nesuamo ri rara nu pearia to nitipa nu Allatala ee, kakono-konona tou ee neuntumo lako ri sumawee bagona, nasimbei ewa Allatala neuntu lako ri bago-Na. 11 Etumo, ikita kana mampesimbukui mpuu bona mamala mesua ri rara nu peuntua ee. Nemo maria saduaa to tado mamala mesua ri rara nu peuntua ee sabana tado natundu ri Allatala, nasimbei ewa tou-tou impia.
12 Kakono-konona Lolita nu Allatala ee natuwu pade nakuasa mpuu! Lolita-Na ee natadapa lako ri taono to nomata ntimali. Lolita-Na namala netosu duuna ri rara pade inosa nu butu dua tou, pade namala mbii nesua duuna ri rara nu lesoka-lesoka pade unto-unto nu dongke. Nuanu niuli nu Allatala ee mbii namala nangkalio pekiri pade dota rara nu butu dua tou ba nabelo ba tado nabelo. 13 Pade toramo; tado naria nuanu natuwu ri dunia mamala mowuni koro-na lako ri Allatala. Sabana tado naria to mamala motalendusi nuapa-pa lako ri Allatala apaa Allatala namala nangkalio ngila ngayana ante nanoto mpuu. Ikita kana manguli ri Allatala sumawee ngila ngaya nuanu to nipowia-ta.
I Yesus najadi Tobalia Bete
4:14; 5:10
14 I Yesus, Ia-mo Ana nu Allatala, najadimo Tobalia Bete si kita. Nalou-Yamo ri suruga duuna ri ngayo nu Allatala. Etumo sabana, ikita kana meparisaya mpuu-mpuu si Yesus Kristus. 15 I Yesus to najadi Tobalia Bete-ta, Ia-mo Tobalia Bete to namparasai mpuu kasalaa-kasalaa-ta. Apaa nasimbei ewa ikita, Ia mbii nipesorimo ri rara nu ngila ngayana, agiana tado naria-Ya nowia jeko. 16 Jadi, tumei-tamo ante peparisaya mpuu-mpuu menomba ri Allatala to nakuasa mpuu pade nabelo mpuu rara-Na ee. Nabelo mpuu rara-Na si kita pade nampotowe-ta, Nangkajadika Ia mamala mantulungi-ta ri tempona-ta mamparalou petulungi.