I Yesus neliu kalangko-Na lako si Musa
3
1 Etumo sabana sarara-sarara, to nipokiomo nu Allatala najadi todea-Na, peiraramo nancambelai i Yesus to niparisaya mpuu-ta bakote Ia-mo to nitudu nu Allatala pade bakote Ia-mo Tobalia Bete. 2 I Yesus natundu oa ri Allatala to nampelisi-Ya. Iwee mbii impia i Musa natundu ri rara nu bago-na nampaurusi todea nu Allatala. 3 Agiana kakono-konona butu dua tou kana mampabila i Yesus melabi lako ri pampabila-ra i Musa. Sabana, nelabipa pampabila tou to nopatinda sou ante pampabila sou to nipatinda-na ee. 4 Butuongu sou tantu naria topopatinda, agiana topopatinda ngila ngayana iamo Allatala. 5 I Musa najadi topelayani to natundu ri Allatala ante nampaurusi todea nu Allatala. Ia nopanotosi nuapa to kana nauli nu Allatala ri eo ngkapurina. 6 Agiana i Yesus Kristus, to nipoana nu Allatala natundu najadi topangkeni todea nu Allatala. Ikita eimo todea nu Allatala, ande ikita tado mogoli pade meparisaya oa bona mamparata nuapa to nisarumaka-ta, pade nipopea-ta ante rara mpuu-ta.Maropu sabana nangkosu lako ri peparisayaa
7 Etumo sabana, ewa to niulimo nu Inosa Gasa nu Allatala:
“Ri eo ei, ande mi-ronge wotu nu Allatala,
8 nemo mi-pakakoo rara-mi
ewa totua-mi impia nangewa Allatala,
tempo-ra nampesori Allatala ri tongo mpada bei.
9 Radou totua-mi nampesori-Ku
noudamo nikalio-ramo nuanu to nipowia-Ku si sira rarana aopo mpulu mpae kasaena.
10 Etumo sabana, nasodo mpuu-Ku si sira, pade niuli-Ku:
Isira tado oa natundu si Yaku,
pade tado nadota nantutu parenta-Ku.
11 Yaku nasodo pade nosumpa:
tado mamala-ra mesua ri ngamba ee bona mampopeuntu lenge-ra moroa ante i Yaku.”
12 Etumo, sarara-sarara, mainga-da komi bona tado maria riolo-mi to nadaa pade to tado madota meparisaya, mangkajadika mampawia Allatala to natuwu. 13 Pegoliana ikomi kana mombepakaroso butu eona, kambatu naria dapa "Eo ei" si kita, bona tado maria saduaa lako si komi to nabagiu nu jeko. 14 Kakono-konona ikita sumawee najadimo wega-wega sampobagoa ni Kristus, asala ikita mangkakamu dodo kaparisayaa ri Allatala sinungka ngkatuwu-ta, nasimbei ewa tempo-ta nopamula neparisaya. 15 Eimo to natetulisi ri rara Buku Nagasa:
“Ande Eo ei, bula-mi namparonge wotu nu Allatala,
nemo mawatu komi ewa totua-mi impia nangewa Allatala, tempo-ra nampesori Allatala ri tongo mpada bei.”
16 Jadi yema-da tou-tou to namparongemo wotu nu Allatala, agiana nangewa Allatala? Tantu, tou-tou to nikeni ni Musa nesuwu lako ri Mesir. 17 Pade si yema Allatala nasodo rarana aopo mpulu mpae? Tantu ri tou-tou to nowia jeko. Isira namate pade bata-bata-ra notantare ri tongo mpada bei. 18 Yema niulikaka nu Allatala nanguli ewa ei: “Isira tado mamala mesua ri peuntua to nipasadia-Ku?” Tantu ri tou-tou to tado natundu ri Allatala. 19 Jadi nanotomo rara-ta, bakote isira tado mamala mesua ri pentua to nipasadiamo nu Allatala ee, apaa isira tado namparisaya Allatala.