Kasalamaa to nabete
2
1 Etumo sabana ikita kana mpuu-mpuu mangkakamu pepatuduki-pepatuduki to nironge-tamo, bona ikita nemo mampawia kaparisayaa-ta. 2 Sabana lolita to niparata nu malaeka-malaeka ri tou-tou impia kana raparisaya oa pade kana ratutu. Apaa butu dua tou to tado nantutu lolita ee see kana mamparata suwa to masipato na-rata. 3 Noudamorauli ande ikita mancapuaka Allatala to madota mampakasalama-ta ante dala-Na to nepakamoleara mpuu ee, ikita kana mamparata suwa. Kakono-konona i Pue Yesus dodomo to paramulana nampopowole lolita ee, pade nipadupa-da nu tou-tou to namparonge lolita ee si kita bakote nakono-da Allatala madota mampakasalama-ta. 4 Allatala dodo mbiimo noparikonoi bakote lolita ee nakono mpuu-da. Ia noparikonoi ante nowia nuanu to nadupa pade nepakamoleara to nampopakalio bakote Allatala nakuasa mpuu pade nowia tou nantarima asi rara lako ri Inosa-Na nantutu dota dodo-Na.Yesus neliu karede-Na singoni ngkola lako ri malaeka-malaeka
5 Sabana tado ri malaeka-malaeka-Na Allatala nambei kuasa bona moparenta dunia bou to kana marata. Dunia bou eemo to najadi patuju-ku ri rara nu sura ei. 6 Agiana ri rara Buku Nagasa naria nitulisi ewa ei:
“O Pue Allatala, yema ntotoda manusia ee, pade nipekiri bo nitora-Mu ra-mo?
Isira kawule manusia ngkolada, agiana nipeirara mpuu-Mu.
7 Iko nampowia manusia neliu karede-na saodi lako ri malaeka.
Agiana naopu ee niweikaka-Mu kuasa nabete mpuu pade poncundaa to nibila mpuu.
8 Iko-mo to nambei kuasa ri manusia bona mokuasai ngila ngayana.”
Jadi ande niuli bakote Allatala nampowia ngila ngayana natundu ri kuasa nu manusia, batuana tado naria namo sangayaa mpuu to tado natundu ri kuasa nu manusia. Noudamo iwee, ngkapuri ei tadopa nikalio-ta manusia nokuasai ngila ngayana. 9 Agiana nikalio-tamo i Yesus nakuasa! Ia neliu karede-Na lako ri malaeka singoni ngkola, bona ante kabelo rara nu Allatala mamala-Ya mamate mantolosi sumawee manusia. Nikalio-tamo ngkapuri ei Ia niweikaka poncundaa to nipemabose pade nibila mpuu, apaa Ia nantodosaka kapepaa duuna namate.
10 Allatalamo to nopajadi ngila ngayana, pade ngila ngaya nuanu nipajadi-Na nantutu dota dodo-Na. Patuju-Na bona madea tou majadi ana-ana-Na pade mamparata bagia ri rara pampemabose-Ya. Eemo sabana pade nipalambaka-Na i Yesus mantodosaka kapepaa duuna mamate, bona i Yesus majadi Topepakasalama to nagana mpuu, to notate dala bona manusia mamala rapakasalama. 11 I Yesusmo nowia-ta najadi todea nu Allatala to nagasa. Ia bo ikita nosaongu Tuama, Ia-mo Allatala to Sadua ngkola ee. Etumo sabana i Yesus tado naeya nangulikaka-ta: “Ikomi eimo sarara-Ku.” 12 I Yesus nanguli ri Allatala ewa ei:
“Yaku kana mampopowole ri sarara-sarara-Ku nancambelai nuapamo to nipowia-Mu.
Yaku kana mangune-Ko ri tempo nu todea-Mu mosintobu.”
13 I Yesus mbii nanguli:
“Yaku kana mancarumaka Allatala.”
Pade niuli mbii-Na:
“Ei Ku-mo noroa ante tou-tou to niweimo nu Allatala si Yaku.”
14 Jadi, apaa tou-tou ee kawule manusia to mamala mamate, nangkajadika i Yesus dodo najadi nasimbei ante isira. Ia najadi manusia bona mamala mamate, bona mamala-Ya mowia Mbagou Seta tadomo makuasa mopatesi manusia. 15 Ante dala eemo i Yesus mbii nampakabebasi tou-tou to sinungka ngkatuwu-na noinggu ewa batua apaa naeka mamate. 16 Natantumo bakote i Yesus nantulungi mulia ni Abraham, tado nantulungi malaeka-malaeka. 17 Etumo sabana, i Yesus kana majadi ewa sumawee manusia ntanina ri rara nu ngila ngayana. Ante ee Yamo mamala majadi Tobalia Betea to nadoli rara ri manusia pade to natundu ri Allatala, nangkajadika Allatala nogempu jeko nu sumawee manusia. 18 Pade apaa Ia dodo mbii naria nipesori pade nangkolo kapepaa, jadi mamala-Ya mantulungi tou-tou to nipesori.