Sura nipakatuka to
Ibrani
Lolita nu Allatala to niparata ni Kristus
1
1 Lako paramulana nadea ngkanimo Allatala nololita ri totua-ta. Allatala nololita si sira ante nengaya tulina niparata nu nabi-nabi. 2 Agiana ngkapuri ei ri tempo kaopuana, Allatala nololita si kita niparata dodo nu Ana-Na. Nipajadimo nu Allatala sumawee dunia ei ante Ana-Na ee. Allatala mbii nampakatatapu bakote Ana-Na ee-mo to masipato mangkakamu ngila ngayana. 3 Ana-Na eemo nampopewanta kakuasaa nu Allatala. Ia mpuu-mpuu nasimbei ewa Allatala. Ri rara nu parenta-Na to naponu ante kuasa, Ia nojagai bona dunia ei mabelo dodo. Ia-mo to najadi saba nangkajadika Allatala noampungi tou lako ri jeko-jeko-ra. Maopu ee moncunda-Ya-mo ri poncundaa to nibila mpuu ri suruga, mbira ri ngkana nu Allatala, bona moparenta moroa ante Allatala. 4 Ana-Na ee namparata poncundaa to neliu kalangkona lako ri malaeka-malaeka. Pade Allatala mbii nambei Ana-Na sanga to nibila mpuu, neliu lako ri pampabila sanga nu malaeka-malaeka.Ana nu Allatala neliupa kalangkona lako ri malaeka-malaeka
5 Kakono-konona tado naria Allatala nanguli ri malaeka:
“Ikomo Ana-Ku.
Eo ei Yaku najadi Tuama-Mu.”
Allatala mbii tado naria nanguli ri malaeka:
“Yaku kana majadi Tuama-Na,
pade Ia majadi Ana-Ku.”
6 Agiana tempo nu Allatala nantudu ana-Na ulumbua ee namei ri dunia ei, Ia nanguli:
“Sumawee malaeka kana menomba ri Ana-Ku ee.”
7 Agiana nancambelai malaeka-malaeka-Na, Allatala nanguli ewa ei:
“Allatala nowia malaeka-malaeka-Na majadi ewa ngolu mpamburu,
pade topolayani-topolayani-Ya majadi ewa pengkalalaa nu apu.”
8 Agiana nancambelai Ana-Na Allatala nanguli:
“Ana-Ku, ikomo Allatala to kana moparenta duuna masae-sae.
Iko kana moparenta todea-Mu ante kakonoa pade kanoaa.
9 Iko nampobelo mpuu nuanu nanoa pade nampodaa mpuu inggu nadaa.
Etumo sabana Allatala, Allatala to nipenombai-Mu, nampelisimo-Ko
pade nambeika-Ko poncundaa to nibila mpuu to nampakasana rara-Mu,
neliu lako ri kasana nu wega-wega-Mu.”
10 Allatala mbii nanguli ri Ana-Na:
“Iko, Pue, lako ri paramulana nopajadi dunia,
pade langi mbii nipajadi nu pale-Mu.
11 Langi bo dunia kana malipo,
pade sumaweena ee majadi ewa powaru nausa.
Agiana Iko kana maria oa duuna masae-sae.
12 Iko kana motika dunia bo langi ewa motika powaru,
pade kana Mu-sambei ante dunia bo langi to nabou.
Agiana Iko tado maria-Ko mobali,
pade Iko kana matuwu duuna masae-sae.”
13 Allatala tado naria nanguli ewa ei ri sadua malaeka-Na, agiana kawule ri Ana-Na:
“Poncundamo mbira ri ngkana-Ku, ri poncundaa to nibila mpuu ei,
duuna Ku-powia bali-bali-Mu matundu si-Ko.”
14 Sumawee malaeka, eemo inosa-inosa to nampalayani Allatala. Allatala nantudu-ra bona mantulungi tou-tou to kana napakasalama nu Allatala.