Sura si Filemon
Tabe
1:1-3
1
1 Lako si Paulus, sadua to nitarungku apa nampopowole kareba ni Kristus Yesus pade lako si Timotius sarara-ta. Sura ei nipakatu si Filemon to nipotowe, roa sampobagoa-ka, 2 pade si Apfia sarara-ta bangkele pade si Arkhipus, roa-ta to nampesimbukui nampobagoka i Pue pade ri todea nu Allatala to notobu nosambaya ri sou-mu.3 Yaku nosambaya, bona Allatala Tuama-ta pade i Pue Yesus Kristus, mampopakalio towe rara-Na si komi pade mambei komi kasanaa.
Posukuru
1:4-7
4 Butu ngkani-ku mosambaya, nikasangai oa-ku sanga-mu pade nosukuru ri Allatala. 5 Sabana nironge-kumo bakote iko mpuu-mpuu neparisaya si Yesus pade nampotowe sumawee todea nu Allatala. 6 Yaku nosambaya bona posarara-mu ante topeparisaya ntanina mangkeni-ko mpuu-mpuu manguncani ngila ngaya kabeloa to naria si kita, apaa nosaongu rara ante i Kristus. 7 Sarara-ku i Filemon, towe-mu ri sumawee todea nu Allatala nampakadonu-ku pade nambei karosoa si yaku. Pade sumawee todea nu Allatala mbii najadi nadonu.
Perapia ni Paulus si Filemon nancambelai i Onesimus
1:8-22
8 Ee-mo sabana, apaa ikita najadi sarara to saongu kaparisayaa mamala-kuda mantudu-ko, bona mowia nuapa to kana mu-powia. 9 Agiana apaa yaku nampotowe-ko, yaku kawule merapi ngkola. Yaku ei natuamo, pade tempo ei nitahangi ri rara nu tarungku sabana nampalayani i Kristus Yesus. 10 Yaku, i Paulus, merapi sangaya perapia si-ko nancambelai i Onesimus, to nireke-ku najadi ana-ku ri rara ni Yesus Kristus. Sabana ri rara nu tarungku ei, yaku najadi tuama-na ri rara ni Yesus Kristus. 11 Impia-ya tado noguna si-ko, agiana ngkapuri ei-pa noguna-yamo, tado kawule si-ko, agiana si yaku mbii. 12 Tempo ei ku-tudu mpanculi i Onesimus to nipotowe-ku mpuu ee si-ko. 13 Kakono-konona yaku madota mantahangi-ya bona mamporoasi-ku majadi pancambei-mu, bona mamala-ya mampangawa-ku, sinungka-ku nitahangi ri rara nu tarungku ei sabana nampopowole Kareba Belo lako ri Allatala. 14 Agiana tado madota-ku mowia nuapapa ande tadopa mu-pasitujui. Nipobelo ntoto-kupa ande mu-powia ante kabelo nu rara dodo-mu, tado madota-ku mopasa-ko. 15 Mbelakana i Onesimus ei singoni ngkola-da mampawia-ko, bona mamala-ko mantarima nculi-ya duuna masae-sae. 16 Ngkapuri ei-ya tadomo kawule batuamu-ya, agiana ia neliu lako ee. Ia singka roa-ta to Karasitee to nipotowe. Nadea mpuu guna-na si yaku, peliu-liunapa si-ko! Jadi ia noguna mpuu najadi batua pade noguna mbii najadi sadua sarara ri rara ni Pue!
17 Ee-mo sabana, apaa iko noreke-ku wega-mu singka to Karasitee, tarima nculimo i Onesimus nasimbei ewa pantarima-mu ku. 18 Ande naria kasalaa-na ba inda-na si-ko, yaku-damo mangkolo sumaweena ee. 19 Yaku i Paulus najadi boro-na ante tulisia nu pale dodo-ku, bakote yaku kana mobayari sumawee inda-na si-ko. Kakono-konona iko dodo mbii noinda si yaku, apaa lako si yaku-da pade nirata-mu katuwua nabou.
20 Ee-mo sabana sarara-ku, ri rara sanga ni Kristus, ku-perapi bona iko mowia nuanu to noguna si yaku. Tarima nculimo i Onesimus bona madonu rara-ku sabana posarara-ta saongu kaparisayaa.
21 Yaku notulisi sura ei apaa niparisaya-ku bakote iko kana mowia nuapa to ku perapi. Nincani mbii-ku iko kana mowia nuanu to meliu lako ee. 22 Pade merapi tulungi pasadiaka-ku kamara ri sou-mu, apaa nisarumaka-ku Allatala manconoi sambaya nu sarara-sarara sumawee pade mangkeni nculi-ku si komi.
Tabe kaopuana
1:23-25
23 Naria tabe nipakatu si-ko lako si Epafras, to noroa ante yaku ri rara nu tarungku sabana nampalayani i Yesus, 24 pade lako si Markus, i Aristarkhus, i Demas, pade i Lukas. Isira sumawee ee wega-wega-ku sampobagoa.
25 Towe rara ni Pue Yesus Kristus mamporoasi komi sumawee.