Nancambelai sarara-sarara saongu kaparisayaa
5
1 Nemo mu-pololitaka tou to natua lako si-ko ante sodo agiana pobasaka belo-ya ewa tuama dodo-mu. Ontikamo tou-tou nangura ewa sarara-mu, 2 pade bangkele-bangkele to natuamo ewa tina-mu. Bangkele-bangkele to nangura agina mu-ontika ewa tuei-mu, ante inggu mabelo lako ri rara-mu.Nancambelai Tobalu
3 Bilamo tobalu-tobalu to mpuu-mpuu natuwu sadudua-na. 4 Agiana ande sadua tobalu maria-dapa ana-na ba tumpu-tumpu-na, isira etumo paramulana to kana raweikaka popanotosi bakote isira kana mantulungi totua-ra. Pade mampabalasi kabelo rara nu totua-ra. Apaa nuanu eemo to nampakawoe rara nu Allatala. 5 Tobalu to mpuu-mpuu natuwu sadudua-nadamo, pade tadomo naria yema-yema to mamala mampatuwu-ya, ia aga kawule nancarumaka Allatala. Eo bengina-ya nosambaya oa ri Allatala bona merapi petulungi-Na. 6 Agiana tobalu to madota matuwu masana-sana, kakono-konona ia ee namatemo noudamo natuwu-yadapa 7 Parata mbii pepatuduki-pepatuduki ri tobalu-tobalu ee, bona tado maria tou mampomasala-ra. 8 Agiana ande maria tou to tado mampatuwu sarara-sarara-na, pelabi-labina tou ri rara ncou-na, tou ee nampesapuka kaparisayaa-na, neliupa kadaa-na lako ri tou to tado neparisaya. 9 Tobalu to masipato ratulisi sanga-na ri buku potulisia sanga nu tobalu to mamala ratulungi: Aga tobalu to noumuru neliu lako ri aono mpulu mpae, pade impia sangkani ngkola nobaleilo, 10 nincanika najadi bangkele to nampowia nuanu to nabelo, ewa: Nopasisi ana-ana-na ante nuanu to nabelo, nadonu nantarima torata-torata to meari ri suo-na, mampalayani tou-tou to neparisaya, mampangawa tou-tou to napepa katuwu-na, pade nadeka nampowia ngila ngaya nu bago to nabelo. 11 Nemo ratulisi ri rara nu buku potulisia sanga ntobalu: Tobalu-tobalu to tadopa noumuru aono mpulu mpae. Sabana, ande maria-dapa ngoni dota nu rara-ra mobaleiloki, dota-ra eemo ngoni mowia-ra mangkalingani potipa-ra bona mampalayani i Kristus. 12 Isira kana rasuku apaa tado nampeponui potipa bakote isira nampalayani i Kristus ngkola. 13 Pade isira mbii aga notatadiaka loga ante mesua-suwu ri sou ntou. Pade to nadaa ntoto mbii-pa, isira nampetumbu mopanawu sanga ntou ntani pade mogalo-galo urusia ntou bo mampololita nuanu to tado masipato rauli. 14 Etumo sabana dota-ku bona tobalu-tobalu to nangura-dapa mobaleiloki nculi, bona moana-ki pade mourusi to ri rara ncou-na, bona bali-bali-na tado mamparata loga mampakawou sanga-ta topeparisaya. 15 Yaku nanguli ewa ee apaa naria tobalu-tobalu to napusamo nantutu Mbagou Seta. 16 Agiana ande sadua bangkele to Karasitee naria sarara-na nabalumo, ia kana mantulungi tobalu-tobalu ee, nemo mancarumaka todea nu Allatala damo to mampatuwu-ra. Bona ante iweemo todea nu Allatala mamala mantulungi tobalu-tobalu to tado naria namo saduaa mpuumo sarara-na.
Basangkia ngaya popanotosi pade pedederi
17 Topangkeni todea nu Allatala to nowia bago-na ante nabelo, masipato mantarima pebila pade mantarima tombo rongkani kadeana lako ri pobago-na ee, paramula ntotona isira to nadeka noparata lolita nu Alltala pade nepatuduki. 18 Sabana ri rara nu Buku Nagasa nitulisi: “Japi to bulana nosege gando bona malali lako ri bulina, nemo rawunta nguduna”, iwee mbii: “Tou to nobago, masipato mantarima tombo-na”. 19 Nemo ratarima pamparei sadua topangkeni todea nu Allatala, ande tado napakaroso nu rodua sabi ba melabi lako ri rodua sabi. 20 Ande nakono topangkeni todea nu Allatala ee nowia jeko, ia kana raontika ri ngayo nu sumawee todea nu Allatala, bona tou ntanina majadi maeka. 21 Ri ngayo nu Allatala, i Kristus Yesus, pade malaeka-malaeka nu Allatala to nipelisi-Na, ku-perapi ante mpuu-mpuu bona iko mantutu pepatuduki-pepatuduki ei ante tado maria pekiri madaa basiyema-yema, pade tado ante meposambira. 22 Nemo magasi gaga mountu pale ri sadua tou bona mo'ongko-ya majadi batua ni Pue. Ande tou ntani mowia jeko, nemo ratutu. Jagaimo koro-mu bona tado matepakeni mowia jeko. 23 Nemo kawule manginu ue ngkola, inu mbii-da saodi anggur bona mampakaseha rara nteimu, apaa iko naoso nadua. 24 Jeko nu basangkia dua tou sintou tadopa nitangara, nanotomo nikalio. Agiana jeko nu tou ntani nincani naopu nitangara-damo. 25 Iweetu mbii parabuata-parabuata nabelo kaloulou nikalio. Pade parabuata to tado nagampa nikalio, tado mamala oa rawunika.