6
1 Tou-tou to Karasitee to najadi batua, kana mampabila maradika-ra, bona tou tado mamala mampakawou sanga nu Allatala ba pepatuduki-ta. 2 Batua-batua to maradika-na to Karasitee, tado mamala mampandaente maradika-na, apaa isira to Karasitee pura-rada. Agiana, isira kana mantambei ntotopa kabelo mpobago-ra, apaa maradika to nipobagoka-ra ee mbii to neparisaya si Kristus to nipotowe-ra.Nancambelai inggu nampobelo nombebili pade nampodoko doi
Sumaweena ei kana mu-pepatudukii pade mu-pedederii. 3 Yema-yema mopatuduki pepatuduki to nontani lako ee pade tado nasimbei ante pepatuduki to nakono lako si Pue-ta i Yesus Kristus, pade ante pepatuduki nu agama-ta, 4 ia-mo tou to nalangko rara-na pade tado nanguncani nuapa-pa! Inggu-na aga nampobelo pombebili nancambelai lolita-lolita to nampopeumba singki rara, posimpogara, nanguli lolita to tado nakono, perei to tado nakono, 5 pade pobungka to tado naria kaopuana, pade to tado nanguncani nuanu to nakono. Niuli-ra ande mantutu i Pue mamala-ra masugi. 6 Iwee ami-da mantutu i Pue, nadea mpuu kabeloa to ratarima, asala maosa rara ante nuanu to naria si-ya. 7 Apaa tempo-ta niote, tado-namo sangayaa nuanu nikeni-ta, iwee mbii tempo-ta mamate! 8 Jadi, ande maria kondia pade powaru, maganamo ee. 9 Agiana tou to madota masugi, manawu ri rara nu pesori pade nasilu nu ngila ngaya dota nu rara to tado naowo to nepakaweso. Dota-dota nu rara ee nampakagero katuwu nu tou ee, pade namparata suwa. 10 Sabana lako ri pampodoko doi, neumba ngila ngaya nuanu to nadaa. Naria saganta tou to nangonco doi nangkajadika tadomo nantutu pepatuduki nto Karasitee, naopu ee isira niruncu nu ngila ngaya kapepaa to nampakadua rara-ra.
Kasudua mpetetesi
11 Agiana Timotius, apaa iko batua nu Allatala, pakakawao koro-mu lako ri sumaweena ee. Pesimbukuimo majadi tou to nanoa ri pangkalioaa nu Allatala, to nantutu dota nu Allatala, neparisaya si Kristus, nampotowe singkapada manusia, nancabara ri rara nu kapepaa pade madole. 12 Pesimbukuimo mpuu-mpuu matuwu mantutu kaparisayaa si Kristus Yesus bona iko mamala mamparata tombo matuwu liu-liu. Sabana ee-mo pade nipokio-ko nu Allatala ri tempo-mu nampangaku ri ngayo nu tou dea bakote iko neparisaya si Kristus. 13 Jadi ri ngayo nu Allatala to nambei katuwua ri sumawee to nipajadi-Na, pade ri ngayo ni Kristus Yesus to nanguli nuanu to nakono si Pontius Pilatus, ku-perapi ei lako si-ko: 14 Katundumo ri sumawee parenta ee ante rara magasa bona tado maria kasalaana duu-na ri eo ni Pue-ta i Yesus Kristus marata mpanculi. 15 Karata-Na nipakatatapu dodo nu Allatala ri tempona. Ia ngkola to nakuasa, Ia nipemabose, Mbagou nu sumawee mbagou, pade Pue nu sumawee maradika. 16 Allatala ngkola to tado mamala nakuasai nu mate. Ia neari ri pearia to nabaa mpuu, nangkajadika tado naria to mamala mampajungkuki-Ya. Tado naria-namo saduaa mpuu manusia to nariamo nangkalio-Ya, ba mamala mangkalio-Ya. Allatala masipato rabila pade moparenta duu-na masae-sae! Amin.
17 Ri tou-tou to nasugi ri dunia ei, aginamo mu-perapi bona isira nemo malangko rara pade nemo mancarumaka gagu-gagu to tado natatapu, ewa kasugia. Isira kana mancarumaka Allatala to nambei ngila ngayana si kita ante neliu-liu bona ikita mamparasai. 18 Perapimo si sira bona mampopekalio kabeloa, bona madea mowia nuanu to nabelo, mangaa rara pade madoli rara. 19 Ande rapowia-ra ewa ee, nasimbei ante isira nopasintobu gagu to nabelo ri suruga to tado mamala maronto. Pade ri eo ngkapurina ngoni isira kana mamparata tuwu to nitipa nu Allatala, eemo tuwu liu-liu. 20 Nuapa to niparisayaka-ko Timotius, jagai pakabelo-belo! Kawaosimo lolita-lolita to tado naria lotuna pade pombebili-pombebili nancambelai to niuli kapandea.
21 Ante mantutu kapandea ee, naria tou-tou to napusamo pade nampawia kaparisayaa to nakono.
I Pue kana mantiroi komi sarara-sarara sumawee.
Tabe lako si yaku, i Paulus.